बालगीत - नानी के घर जाबो

बालगीत - नानी के घर जाबो

छुट्टी होगे गरमी के अब, नानी के घर जाबो।

पढ़ना-लिखना छोड़ अभी हम, नँगते मजा उड़ाबो।।

पोठ करे हन पढ़ई-लिखई, हालत होगे खस्ता।

निपट परीक्षा गेहे जम्मों, थीरथार हे बस्ता।

बेर चढ़त ले नींद भाँजबो, सपना सुघर सजाबो।

छुट्टी होगे गरमी के अब, नानी के घर जाबो।-1

खीर तसमई संग करौनी, मिलही दूध, महेरी।

गाय, भँइस के पाछू फिरबो, पाबो बछिया, छेरी।

मलर-मलर मनमाने करबो, इँतरौना इँतराबो।

छुट्टी होगे गरमी के अब, नानी के घर जाबो।-2

बारी-बरछा बइठ बिलमबो, थाँघा झूलना डारे।

आनी-बानी फर हम खाबो, भले पेट ला झारे।

नरवा-नदियाँ, तरिया-डबरी, मनभर डुबक नहाबो।

छुट्टी होगे गरमी के अब, नानी के घर जाबो।-3

ममा पुरोही खँगती-बढ़ती, मामी मया जताही।

गोठ सुजानिक नाना करके, बढ़िया बात बताही।

संग समो के सब ला संगी, सिरतों समझ बढ़ाबो।

छुट्टी होगे गरमी के अब, नानी के घर जाबो।-4

पढ़ना-लिखना छोड़ अभी हम, नँगते मजा उड़ाबो।।

सृजन- कन्हैया साहू 'अमित'

शिक्षक- भाटापारा छत्तीसगढ़

गोठबात - 9200252055

●◆●◆●◆●◆●◆●◆●◆◆◆●◆●◆●◆●◆●