1100 जनऊला (पहेलियाँ)

" जयकारी जनऊला "

-----------------------------------------------

01- पहिली ये पाछू जगदीश। रद्दा खोलय इँखर असीस।।

लागँय जइसे जुड़हा छाँव। साधक जपथें हरदम नाँव।।

-गुरुदेव

02- हाथी जइसन भारी पेट। खाथे लाडू सूँड़ लपेट।।

सबले पहिली येखर नाम। शुरु होथे तब कोनो काम।।

-गणेश भगवान

03- सार कला हे येखर अंस। सुघर सवारी सादा हंस।।

छेड़य वीणा के सुर तान। इँखर कृपा ले जम्मों ज्ञान।।

-सरस्वती माता

04- एक जघा जम्मों सकलान। बइठे पावन आखर ग्यान।।

मंदिर जइसे लागय ठौर। नाँव बता अब करके गौर।।

-इस्कूल

05- धन दोगानी ले झन तोल। येखर कीमत हे अनमोल।।

जे पाये ग्यानी बन जाय। नइ पाये ते मुरुख कहाय।।

-विद्या

06- ज्ञानी जइसन बोलँय बोल। बात बताथें इन अनमोल।।

लइकामन बर हे भगवान। बाँटय  एक बरोबर ज्ञान।।

-गुरुजी

07- पेड़ नहीं पर पाना पोठ। बिन मुँहु के करथे ये गोठ।।

आखर के भारी भंडार। ज्ञान कला के ये आधार।।

-किताब

08- कोरा-कोरा आरुग कोर। लिखना हे तब करथें सोर।।

अंतस के सब भर दे भाव। नइ ते सोज्झे कागज ताव।।

-कापी

09- येखर आगू का तलवार। नान्हें हे येखर आकार।।

स्याही सँघरा सुग्घर मेल। आखर उलगय रेलम-पेल।।

-कलम

10- होथे करिया-करिया रंग। उज्जर आखर येखर संग।।

होय अधूरा ये बिन चाक। कक्षा भीतर  येेखर धाक।।

-तख्ता

11- रहिथे येहा पीठ लदाय। संगे  आथे  संगे  जाय।।

राखय सब ला जोर जँगार। नाँव बतावव करत विचार।।

-बस्ता

12- नाक धरय अउ झींकय कान। रतिहाकुन हो या दिनमान।।

आथे देखे के ये काम। तुरत बतावव येखर नाम।।

-चश्मा

13- बड़े बिहनिया येहा आय। संझौती बेरा मा जाय।।

येखर संगे संग अँजोर। नइ ते अँधियारी घोर।।

-सुरुज

14- सरी जगत के करथे सैर। भुँइयाँ मा नइ राखय पैर।।

दिन मा सोवय, जागय रात। करय अँजोरी रतिहा घात।।

-चंदा

15- गिनत-गिनत मनखे थक जाँय। बगरय बादर कहाँ समाँय।।

रतिहाकुन मा इन टिमटाम। बोलव झटपट का हे नाम।।

-चँदैनी

16- करिया घोड़ा भागे जाय। पाछू घोड़ा लाल कुदाय।।

ऊँच अगासे  बहुते भाय। बोलव  संगी  ये हा काय।।

-आगी

17- बाँध डोर तैं झुलुवा झूल। हवा, दवा, फर देथे फूल।।

मनखे के ये संगी जान। इही बचाथे सबके प्रान।।

-रुखराई

18- नइ हे येखर कोनो रंग। ढलथे येहा सबके संग।।

आँच परे बादर चढ़ जाय। जाड़ परे पखरा

बन आय।।

-पानी

19- दिखय नहीं पर चलथे जोर। सरसर-सरसर करथे शोर।।

जीव जगत के सिरतों आस। येखर बल मा सबके साँस।

-हवा

20- रिंगी-चिंगी  फूलँय  फूल। तितली भौंरा झूलँय झूल।।

रहिथे येमा जी रखवार।। जानव  येला  तुरते यार।।

-फुलवारी

21- नइ तो आवय येहा हाथ। रहिथे फुलुवामन के साथ।।

रिंगी-चिंगी पाँखी संग। रस पी के इन फिरय मतंग।।

--तितली

22- भनभन-भनभन करथें खूब। फुलवा मा इन जाथें डूब।।

बिरबिट करिया इँखरे रंग। कान करा करथें उतलंग।।

-भौंरा

23- रहिथें जुरमिल छाता डार। रानी संगे सौ बनिहार।।

चुहक-चुहक रस, मैंद सकेल। गुरतुर मधुरस ठेलम-ठेल।।

-मछेर

24- चीं चीं चीं चहकैं चिरबोर। फुदकय अपने अँगना, खोर।।

पंख पसारै फुर्र उड़ाय। सबके मन ला नँगते भाय।।

-बाम्हन चिरई

25- बहुते खबड़ा खाँवे खाँव। बोल उराठिल काँवे काँव।।

करिया-करिया येखर रंग। उटपटांग उज्जट उतलंग।।

-कौआ

26- बइठे रहिथे आमाडार। कुलकै भारी कुहकी पार।।

जब बसंत के आवय बेर। तब तो बहुते पारय टेर।।

-कोइली

27- हरियर पाँखी लाली चोंच। समझदार कस येखर सोंच।।

मिरचा देखत जावय डोल। तपत कुरू के बोलय बोल।।

-मिट्ठू

28- पींयर, खैरा, भुरवा रंग। राखय मनखे अपने संग।

मिट्ठू के होथे लगवार। नाँव बतावव करत विचार।।

-मैना

29- घपटे देख घटा घनघोर। नाचय नँगते मया चिभोर।।

पंछी के राजा कहलाय।। अपने पँउरी देख लजाय।।

-मँजूर

30- सादा, करिया, भुरुवा रंग। खेलँय खावँय मनखे संग।।

पहिली इन चिट्ठी पहुँचाय। गजब गुटरगूँ बोल सुहाय।।

-परेवा

31- बड़े बिहनिया मुँह दै खोल। कुकरुस कूँ के बोलय बोल।।

मुँड़ मा कलगी होवय लाल। धीर रास हे येखर चाल।।

-कुकरा

32- भावय येला घुप अँधियार। दिनभर ये राहय थिरथार।।

आँखी खुसरे, धरहा चोंच। का चिरई हे? तुरते सोंच।।

-घुघुवा

33- दशराहा के दिन तैं खोज। दिखय भले ये सब ला रोज।।

टेर्र-टेर्र के बोलय बोल। पंछी ये हावय अनमोल।।

-टेहर्रा

34- येखर थन ले गोरस धार। दूध, दही,  घी  के भंडार।।

पैरा, भूँसा, काँदी खाय। महतारी के पदवी पाय।।

-गाय

35-लाली, धँवरा, सादा रंग। जोड़ी जँमथे नाँगर संग।।

बड़का सिंग, पुछी हे लाम। झट्टे जानव का हे नाम।।

-बइला

36- पाना, पतई पागुर खाय। मेर-मेर बहुते नरियाय।।

खैरी, कबरी बड़ छतरंग। खेत-खार मा चरै मतंग।।

-छेरी

37- चुकता चुन्दी देंह छवाय।। बीच-बीच मा मुँड़ मूँड़ाय।।

कतको काँही आवय जाय। रेंगय येमन मुँड़ी नवाय।।

-भेंड़ी

38- रतिहाकुन ये चौकीदार। दिनभर सुतथे पाँव पसार।।

भूँ-भूँ के करथे आवाज। घर के आगू येखर राज।।

-कुकुर

39- दूध, दही, मलई चोराय। मुसुवा ऊपर धाक जमाय।।

आँखी कर्री ला छटकाय। बघवा के मोसी कहलाय।।

-बिलई

40- बहुत उपाई येखर जात। कूदय, फाँदय, नाचय घात।।

डारा-पाना देवय टोर। खीस-खीस खों, दाँत निपोर।।

-बेंदरा

41- देंह भरे चुंदी भरमार। खाय गजब मधुरस रसदार।।

नान्हें आँखी, नान्हें कान। पुछी छोटकुन, झट पहिचान।।

-भलुवा

42- भारी भरकम हावय पेट। खावय पीयय सूँड़ लपेट।।

सूपा जइसन जब्बर कान। कोन हरय? येला पहिचान।।

-हाथी

43- खदबिद-खदबिद भागय पोठ। हिनहिन-हिनहिन सुनले गोठ।।

चना-चबेना बहुते खाय। सुघर सवारी ये बन जाय।।

-घोड़ा

44-पींयर, करिया, धारीदार। बहुते बलकर, बड़ हुशियार।।

येखर ले सब जीव डराय। वन के राजा इही कहाय।।

-बघवा

45- राहँय जंगल, झाड़ी बीच। बहुते चतुरा,  नँगते नीच।।

माड़़ा खुसरे बखत बिताँय। हुआँ-हुआँ रतिहा इँतराँय।।

-कोलिहा

46-करिया, पींयर, छिटही छाप। दँउड़य भारी एक्के धाप।।

खरखर चढ़थे रुखुवा टाप। कखरो ले झन येला खाप।।

-चितवा

47- सुग्घर-सुग्घर आँखी, कान। सिंग इँखर हे सिरतों शान।।

छिटही, बुंदी, पींयर पाँव। नइ पावव तुम येखर छाँव।।

-हिरना

48- सबले उँचहा येखर ठाट। रेती येखर सोज्झे बाट।

निपटाथे ये नँगते काज। रेगिस्तान के हरय जहाज।।

-उँटवा

49- बोझा डोहारै ये रोज। होथे निच्चट सिधवा सोज।।

तपथे तेला लात जमाय। चिपो-चिपो चोखी चिचियाय।।

-गदहा

50- पानी, भुँइयाँ करे निवास। मछरी कस नइ आवय बास।।

भुँइयाँ मा झप झप झप चाल। चौमासा मा बाजय गाल।।

-मेचका

51- रानी पानी बीच कहाय। भुँइयाँ मा  तुरते मर जाय।।

रोजे येहा धोय-नहाय। तभो कभू नइ तो ममहाय।।

-मछरी

52- पखरा जइसन ऊपर खोल। खाल्हे पींयर, कोंवर सोल।।

चार पाँव मा रेंगय सोज। पानी, भाँठा येला खोज।।

-केछुवा

53- पानी बिन ये महल बनाय। कारीगर ये सुघर कहाय।।

छै ठन रहिथे येखर पाँव। सोच समझ के नाँव बताव।।

-मेकरा

54- लाली मुँहु के नोनी आय। फीता हरियर गजब गँथाय।

जब हटरी मा बइठे जाय। तुरते-ताही ये बेंचाय।।

-पताल

55- आगू-पाछू चलथे चाल। रहिथे करिया, भुरवा, लाल।।

रथे पाँच जोड़ी मा पाँव। बिला भीतरी येखर ठाँव।।

-केकरा

56- मुँड़ी, पुछी हे, नइ हे पाँव। बिला भीतरी येखर ठाँव।।

दाँत, पेट हे, नइ हे कान।। गुजगुज काया हे पहिचान।।

-साँप

57- गेंद नहीं पर हावय गोल। लाम पुछी पर पशु झन बोल।।

धरँय पुछी ला खेलँय खेल। देवँय जम्मों गजब गदेल।।

-फुग्गा

58- सुनै नहीं पर हावय कान। हाथ पाँव हे, नइ हे प्रान।।

जौने येला लँय पोटार। करँय गजब के मया-दुलार।।

-पुतरा-पुतरी

59- चकमिक-चकमिक हावय रंग। रहिथँव लइकामन के संग।।

गोली नोहँव, हावँव गोल। अड़बड़ सस्ता मोरे मोल।।

-बाँटी

60- पाँव नहीं पर नाचय गोल। आगू-पाछू लइका डोल।।

पातर बाती येला नेत। खेलत खानी करले चेत।।

-भौंरा (लट्टू)

61- लानव लकड़ी देवव छोल। आगू-पाछू चोक्खू गोल।।

जतके जादा खावय मार। भागय दुरिहा पल्ला झार।।

-इब्भा (गिल्ली)

62- दू थँगिया हे येखर हाथ। चमड़ा, रब्बड़ देवँय साथ।।

मारन गोली नेत लगाय। चलव बतावव येहा काय।।

-गुलेल

63- लोहा, टीना झट चटकाय। रब्बड़ येला तुरत हराय।।

भुँसा बीच सूजी लय खोज। रथे गोलवा, चाकर सोज।।

-चुंबक

64- बिना पाँव के चलथे घात। बिहना, संझा, दिन अउ रात।।

टिकटिक रेंगय तीनों हाथ। पोंछत राहय अपने माथ।।

-घड़ी

65- इक महतारी, लइका तीस। सात रंग मा सबो गढ़ीस।।

एक बछर मा बारा बेर। जम्मों परथें येखर फेर।।

-महीना

66- शुरू कटे ता बनथे गीत। बीच कटे ता संत पुनीत।।

कटे आखिरी बनथे यार। एक संग मा सुर रसदार।।

-संगीत

67- मोर नाँव मा आखर तीन।  उड़ियाथौ पर हरँव मशीन।

सीधा-उल्टा एक समान। झटपट मोला तैं पहिचान।।

-जहाज

68- लाली डबिया, पींयर पेट। राखय लाखों दाँत समेट।।

फरय पेड़ मा, नइ हे नार। बड़ गुणकारी, बड़ दमदार।।

-अनार

69- एक नानकुन मटकूदास। कपड़ा पहिरै बीस, पचास।।

लाली, सादा येखर रंग। रोवाथे बड़, रहिके संग।।

-गोंदली

70- हावय अइसन एक फकीर। जेखर पेट म परे लकीर।।

उपजय बाढ़य सबके खेत। रोटी पोये करथन चेत।।

-गहूँ

71- एक गुफा के दू रखवार। होय दुनों के जय जयकार।।

करिया, भुरुवा, सादा रंग। रहय सदा मुखड़ा के संग।।

-मेछा

72- पंख नहीं पर उड़ते जाय। संग हवा के ये बतियाय।।

हाथ नहीं पर लड़ते जाय। बिन चाकू के काट गिराय।।

-पतंग

73- एक अचंभा, गजब कमाल। डारव हरियर, निकलय लाल।।

पक्का होवय जतके चाब। सकय न कोनो येला दाब।।

-पान

74- काया मोर गोलवा गोल। नारी जाँथें देखत डोल।।

काँच, प्लास्टिक मोरे अंग। रिंगी-चिंगी हावय रंग।।

-चूरी

75- बात बतावव मैं हा खास। का घटना हे आसेपास।।

रोज बिहनिया सबके द्वार। पढ़के बनथें सब हुशियार।।

-अखबार

76- बइठे-बइठे एक्के ठाँव। पहुँचावव मैं सब ला गाँव।।

डामर करिया मोरे रंग। चलना सब ला मोरे संग।।

-सड़क

77- जतके जादा आगू आय। वतके पाछू छुटते जाय।।

एक संग नइ रेंगे पाय। तभो सबो ला जा पहुँचाय।।

-कदम (पाँव)

78- कर्री आँखी देख डराय। घर भर भारी उधम मचाय।।

कुतर-कुतर करथे हलकान। चीं-चीं के ये गावय गान।।

-मुसुवा

79- दू झन सुग्घर लइका नेक। रंग रूप मा हावय एक।।

रहिथे सँघरा बनथे काम। तुरत बतावव का हे नाम।।

-पनही

80- तीन वर्ण के हावय नाम। कटै शुरू तब जय श्री राम।।

बीच कटै ता फल के नाँव। कटै आखिरी, काट मड़ाँव।।

-आराम

81- दू आखर के मोरे नाम। हरदम रहिथे सरद जुकाम।।

काजग हावय मोर रुमाल। काम मोर हे गजब कमाल।।

-पेन

82- रोवाना हे येखर काम। लाली बाई हावय नाम।।

हरियर पहिरे लुगरा लाम। दू पइसा हे येखर दाम।।

-मिरचा

83- हरियर हँव, पाना झन जान। करँव नकल, झन बंदर मान।।

मिरचा खाथँव मैं हा पोठ। मनखे जइसन करथँव गोठ।।

-मिट्ठू

84- हरियर पींयर हवै मकान। रहँय इहाँ करिया इंसान।।

रहै रंधनीघर मा धाक।।

फागुन मा ये जाथे पाक।।

-सरसों

85- पाँव नहीं पर जाथे पार। खलबल-खलबल बड़ रफ्तार।।

भागय सरपट पानी चीर। बिन पतवार हाल गंभीर।।

-डोंगा

86- आगू-पाछू डोलय मोर। करय कभू नइ काँही शोर।।

अँधियारी मा कहाँ लुकाय। देख अँजोरी तुरते आय।।

-अपन छँइहाँ

87- सबके घर रहिथँव बिन खाय। कोन्हों नइ पानी पीयाय।।

करँय भरोसा सब संसार। महीं हरँव घर के रखवार।।

-तारा (ताला)

88- कुकरा नो हे, मुँड मा मौर। जंगल, झाड़ी येखर ठौर।।

नाचय बरखा बादर देख। सतरंगी हे, नाँव सरेख।।

-मँजूर

89- करिया हे पर नो हे काग। लंबा हे पर नो हे नाग।।

अँइठन हे पर नो हे डोर। झटपट संगी करलव शोर।।

-बेनी

90- खाथे येहा गोली गोल। डरथे जम्मों सुनके बोल।।

दबथे घोड़ा भागय सोज। ठाठ हाथ मा, गोली खोज।।

-बंदूक

91- कचर कचर सब येला खाँय। काट मुँड़ी तब नून लगाँय।।

बारी-बखरी छछलै नार। भीतर बीजा के भरमार।।

-खीरा

92- खई नहीं पर गजब चबाय। काड़ी कोंवर नीक जनाय।।

दाँत, जीभ चमचम चमकाय। बीमारी ला मार भगाय।।

-दतुवन

93- एक सवारी, चालक चार। सुते जाय ये पाँव पसार।।

आगू-आगू येखर चाल। पाछू मा जनता बेहाल।।

-मुरदा

94- करिया हँड़िया, उज्जर भात। खालव संगी ताते-तात।।

हवय भरे येमा जुड़वास। तरिया भीतर करय निवास।।

-सिंघाड़ा

95- खाय न दाना, पानी, घास। होय तं ये कभू उदास।।

ले जावय बइठा के पीठ। करै कभू नइ येहा ढीठ।।

-साइकिल

96- हावय येखर रानी चार। एक हवय राजा दमदार।।

पाँचों जुरमिल करथें काज। सुग्घर सुमता साजँय साज।।

-अँगरी, अँगठा

97- एक फूल करिया मुस्काय। मुँड मा सबके सुघर सुहाय।।

घाम परै ता खिल-खिल जाय। छँइहाँ मा ये झट मुरझाय।।

-छतरी

98- अपन ददा के रहिथे संग। आगर बेटा के हे रंग।।

उँचहा हावय इँखर मकान। बीच खोतली बसथे प्रान।।

-नरियर

99- नान्हें लइका बाँधय पार।  कूदत-फाँदत कई हजार।।

करनी येखर लाज बचाय। बोलव संगी, काय कहाय।।

-सुजी सूँत

100- ये लइका दू कौंरा खाय। चपक बोंड़री, डहर बताय।।

करय नहीं ये काँही शोर। अँधियारी मा होय अँजोर।।

-टॉर्च

101- एक अचंभा देख सुनाय। पानी पीयय, पुछी लमाय।।

मुँड़ी कोत बड़ ललियाय। आखिर मा जर मर जाय।।

-दीया

102- सोला रानी, तिनठन यार। चार चौंकड़ी गोल बजार।।

खेलँय जम्मों जुगत लगाय। पौ बारा के बोल सुनाय।।

-पासा

103- नान्हें डबिया मा डिबडाब। नइ जानच ता तैं मुँहुँ दाब।।

देखय येहा सब ला जान। तैं नइ देखस, येला मान।।

-आँखी

104- लइका नान्हें, कुबरा पेट। रहिथे दुरिहा सबो समेट।।

बाहिर ले ये कड़क जनाय। भीतर कोंवर, मन ला भाय।।

-नरियर

105- धरे मोटरा मुँड मा तान। गजब डोकरी येला जान।।

अपन लार के फाँदा डार। जौन फँसय वोला दय मार।।

-मेकरा

106- रिंगी-चिंगी फूलय फूल। फर फरथे लमडेरा झूल।।

दिखथे काड़ी हड़ही सार। लेकिन भीतर भरे गुदार।।

-मुनगा

107- माढ़े तरिया के ये बीच। जइसे गोबर या के कीच।।

पखरा जइसन भारी ठोस। रेंगय ये हा कतको कोस।।

-केछुवा

108- चार कुआँ बिन पानीदार । चार मुँड़ा मा खड़े तियार।।

रानी अउ अट्ठारा चोर। जिरमुल जम्मों हें चिरबोर।।

-कैरम अउ गोंटी

109- हवय एकठन घर अउ द्वार। संग रहय वो हा हुशियार।।

कथा-कंथली, बहुते ज्ञान। संगत येखर, बनय महान।।

-पुस्तकालय

110- नान्हें लइका, करिया रंग। खाय भात राजा के संग।।

लइका जूठा राजा खाय। राजा ला बीमारी आय।।

-माछी

111- हरदी के रंगे रंगाय। पीतल लोटा नाँव धराय।।

खा ले बेटा हाथ लमाय। गिर परही तब गय छरियाय।।

-बेल

112- पातर दुब्बर लइका जान। पहिरँव लकड़ी के मैं थान।।

जतको मोला छोलत जाव। नवा-नवा तुम मोला पाव।।

-शीश 

113- निकलय पानी ले रुख एक। नइ हे पाना, डार अनेक।।

खाल्हे कोनो बइठ न पाय। तीर खड़े मा जाड़ जनाय।।

-फब्बारा

115- रानी जेखर तिनठन पाँव। रोज नहावय अपने ठाँव।।

कठवा ले हावय पहिचान। खावय कच्चा, सान पिसान।।

-चौंकी बेलना

116- जब-जब गरमी के दिन आय। सबझन येला तीर बलाय।।

पीयय पानी भर-भर पेट। जूड़ हवा, गरमी दय मेट।।

-कूलर

117- लोहा के दूठन तलवार। करँय लड़ाई बड़ दमदार।।

तभो रहँय इन एक्के संग। दिखथे जुड़वा जइसे रंग।।

-कैंची

118- जीभ नहीं पर बोलँव बोल। पाँव नहीं पर डोलँव गोल।।

राजा परजा सब ला भाँव। मैं जम्मों खुशहाली लाँव।।

-रुपिया

119- चार गोड़ पर नइ रेंगाय। हालय नइ ये बिना हलाय।।

सब ला देवय ये आराम। तुरत बतावव येखर नाम।।

-खटिया

120- फटफट-फटफट धरथे राग। सरपट-सरपट जावय भाग।।

दू चक्का मा जावय डोल। भूख लगय पीयय पेट्रोल।।

-फटफटी

121- थापक थउआ हावय पेड़। बाढ़य बखरी-बारी मेंड़।।

चाकर झाफर येखर पान। बिन बीजा के हे, पहिचान।।

-केरा

122- कटही हावय येखर अंग। पान बहेरा जइसे संग।।

फूल रतन कस रहिथे लाल। फागुन मा ये दिखय कमाल।।

-सेम्हरा

123- एक चघय जी ऊँच पहार। एक रहय जी जंगल खार।।

एक रहय जी खेत मरार। तीनों एक्के करय गुजार।।

-मखना

124- नान्हें बटकी रस भरमार। खावँय चुहकँय ले चटकार।।

होथे हरियर पींयर गोल। का हे तेला तुरते बोल।

-लिमँऊ

125- घपटे रहिथे खाल्हे छाँव। बाप-पूत के एक्के नाँव।

नाती के तैं नाँव विचार। महर-महर ममहावय खार।।

-मउँहा

126- चाकर पाना पातर पेड़। ठाढ़े जंगल खारे मेड़।।

पतरी दोना बनथे पान। फुलवा आगी जइसन जान।।

-परसा

127- कुबरा बुढुवा नुनछुर खाय। बड़े जवनहा अमसुर भाय।।

बीजा आवय खेले काम। मुँह मा पानी लेवत नाम।।

-अमली

128- करिया कुरता सादा अंग। गाँव शहर मा सबके संग।।

पढ़े लिखे अउ अप्पढ़ खाय। नून डार ले, बहुत मिठाय।।

-चिरई जाम

129- ये गरीब के सेब कहाय। हरियर पींयर फर मन भाय।।

गुदा लाल सादा मा होय। चिक्कन डारा झिम्मट सोय।।

-बीही

130- हरियर पींयर रहिथे गोल। काँटा-खूँटी पाना डोल।।

कोंवर बाहिर, भीतर खोल। फोरव गुठलू खालव डोल।।

-बोईर

131- डम डम डम के फूटय बोल। छम छम छम तैं संगे डोल।।

धरे मदारी गँवई आय। भलुवा के नाचा देखाय।।

-डमरू

132- बाहिर हरियर, भीतर लाल। करिया बीजा गजब कमाल।।

खावव चानी-चानी चान। फर ये गरमी मा वरदान।।

-कलिंदर

133- पाना-पाना बड़ भरमार। अंग-अंग हे सरी गुदार।।

नइ तो बीजा कोनो हाड़। बिन लकड़ी के ये हा झाड़।।

-केरा

134- होवय बहुते नदी, कछार। लसलस फरथे, लहसै डार।।

किचपिच बीजा भरे हजार। लाली सादा मीठ गुदार।।

-बीही

135-  कच्चा मा ये साग खवाय। पक्का मा सबके मन भाय।।

करिया बीजा रथे हजार। कोला-बारी उपजै मार।।

-अरंपपई

136-  कच्चा मा बड़ अम्मठ स्वाद। पक्का मा बस गुरतुर गाद।।

झोत्था-झोत्था फरथे डार। छछले रहिथे येखर नार।।

-अंगूर

137- फर के राजा येला जान। हवय 'खास' जी बहुते शान।।

कच्चा मा चटनी तैं डार। पक्का मा गोही चटकार।।

-आमा

138- भुँइयाँ भीतर रहै उदास। निकलय बाहिर, बनजय खास।।

सँघरा सबसे येला जोर। इही बनावय बढ़िया झोर।।

-आलू

139- लाली-लाली कुरता लाल। हरियर फीता फभे कमाल।।

रँधनी घर मा एखर राज। नाँव बतावव तुरते आज।।

-पताल

140- जइसन नाँवे वइसन रंग। लहिथे येहा सबके संग।।

मुँड़ ठाड़े कटही रखवार।। येला खाये सब तइयार।।

-भाँटा

141- हरियर चुन्दी, सादा रंग। गड़े रहय भुँइयाँ के संग।।

भाजी कोंवर सुघर मिठाय। चुरपुर-गुरतुर स्वाद सुहाय।।

-मुरई

142- माथा उपजे धनिया पान। रंग गाजरी हे पहिचान।।

हलुआ खा ले ताते-तात। कच्चा मा तो भाथे घात।।

-गाजर

143- चारों मूँड़ा घपटे पान। सादा पोनी बीचे जान।।

होथे फर भाजी छतनार। खूब मिठाथे ये दमदार।।

-गोभी

144- फरथे येहा लामी-लाम। भीतर बीजा भरे तमाम।।

अँगरी जइसन दिखथे ढ़ंग। हरियर पींयर जानव रंग।।

-रमकेरिया

145-  फुलुवा के राजा तैं जान। कटही तन के हे पहिचान।।

महर-महर ममहाथे घात। संझा बिहना दिन अउ रात।।

-गुलाब

146- पातर-पातर पाना पोठ। डारा फुलुवा रहय न मोठ।।

पींयर-पींयर पँखुड़ी गोल। अँगना के शोभा अनमोल।।

-गोंदा

147- जरी धँसे हे पानी कीच। छछले सुग्घर तरिया बीच।।

खाले फर हावय जुड़वास। चिक्कन डारा, सब्जी खास।।

-कमल/पोखरा/ढ़ेस

148- जेती बेरा ओती घूम। जब्बर जकना, जाथे झूम।।

पींयर फुलुवा, हरियर पान। बीजा रहिथे तेल खदान।।

-सूरजमुखी

149- सरदी के मौसम मा आय। महर-महर अँगना ममहाय।।

सादा-सादा खिलथे फूल। आँखी-आँखी जाथे झूल।।

-मोंगरा

150- लाली-लाली लहसे डार। येखर ले देवी सिंगार।।

अँगना बारी लगे पछीत। गा ले संगे सेवा गीत।।

-मंदार

151- बँधे सघन के बँधना बाँध। कोरे गाँथे झूलय खाँध।।

चाबे नख नइ जाने तेन। मजा उड़ावय जाने जेन।।

-ककई

152- अँइठे गँइठे हवय हजार। बइठै चढ़के ऊँच पहार।।

चघे फूल अउ पतई पान। फेर देवता नो हे जान।।

-पगड़ी

153- सेतचंद हे राजाराय। भुँइयाँ ना येला उपजाय।।

मुँहू फोकला एक न पाय। लाखों फर ला सइघो खाय।।

-करा

154- तन के फुदकी फुदकत जाय। नौ-नौ अँड़वा पार मढ़ाय।।

धागा संगे बदे मितान। अरझे दूनों के हे प्रान।।

-सूजी सूँत

155- एक अचंभा देखन भाय। खाय न खाना, जाय सुखाय।।

खावय खाना तब मोटाय। सदा सुखी हें जे पतियाय।।

-चून्दी

156- चाहे कतको संकट आय। सबके जरथे ता जर जाय।।

साधु बबा के बचै लँगोट। काँपय न कभू येखर पोट।।

-सड़क

157- कच्चा मा ये गुदगुद गाँठ। पक्का मा ये होथे टाँठ।।

चलै चाक पावय आकार। पानी पीयँय तब संसार।।

-मरकी

158-  गर मा डोरी हावय लाम। कारी छेरी परगे नाम।।

चल टूरी चल हाट बजार। तोर बिना कइसे बैपार।।

-तराजू

159- खिलय न कोनो राजा बाग। येखर ले चमकै जग भाग।।

जस गुलाब बिहना मुस्काय। बड़े बिहनिया ये बगराय।।

-बेरा

160- बजत नँगारा चारों खूँट। भागँय पल्ला छेरी, ऊँट।।

खड़े लखन के बरदी खार। दाता येखर हे रखवार।।

-सूरुज, चंदा, चंदैनी, गरजना

161- ठड़गा बइला, ठड़गा सींग। ठड़गा नाचै, टींगे टींग।।

भर-भर मुँह ठाड़े पगुरात। बुता करय जब खावय लात।।

-ढ़ेकी

162- नानुक बटकी रस भंडार। रामा आगू पलथी मार।।

भरे कटोरी रसा खदान। कच्चा पक्का डार अथान।।

-लिम्बू

163- आठ पहर भर अँगना तीर। चौंसठ पल ये खड़े गँभीर।।

नर के ऊपर चढ़हे नार। होवत हे जग मा जयकार।।

-तुलसी

164- जनम धरे तब गज हे साठ। भरे जवानी एक लुवाठ।।

आय बुढ़ापा मा गज तीस। तुरत बतावव काय जिनीस।।

-छँइहा

165- हवय पुछी दू, छै ठन कान। गोड़ा दस हे येखर जान।।

हावय सिरतों मा मुँहुँ चार। बिना जीभ के हाथ पसार।।

-दुहना

166- खन-खन उड़ते-उड़ते जाय। बइठै भीतर पंख बिछाय।।

लाखों जियना मार गिराय। पर ये कुछु नइ कखरो खाय।।

-सौंखी

167- बाप पूत के एक्के नाँव। राहँय दूनों एक्के ठाँव।।

हवय नाँव नाती के और। जभे बताबे, जाबे ठौर।।

-मँउहा

168- कोन तीर मा तरई गाय। मुँह भर ये ओन्हारी खाय।।

बीच पेट मा सबके ध्यान। पूजँय पहिली देव समान।।

-जाँता

169- घोड़ा ऊपर घोड़ा संग। जीन घोड़वा एक्के रंग।।

एक दुसर के पीठ सवार। जावय सँघरा हाट बजार।।

-रउतईन कीरा

170- बन मा काटय, बन मा छील। सावन-भादो नँदियाँ ढील।।

काट बहेरा, घाम सुखाय। जइसे फाँफा छोड़े जाय।।

-डोंगा

171- एक पेड़ के अजब सुभाव। लगे देंह मा बारा घाव।।

तीस-तीस के झोत्था डार। अलग-अलग हे नाँव पुछार।।

-साल, महीना, दिन

172- फरै लकड़िया उँचहा डार। पोर-पोर मा गुण रसधार।।

खाँय सियनहा चाँटे चाँट। छेवरिया ला देवव बाँट।।

-मुनगा

173- मोर ममा के नौ सौ गाय। रतिहा ढिल्ला बड़ बिजराय।।

चारा-पानी कुछु नइ खाय। बिहना लहुटे घर मा आय।।

-चंदैनी

175- तीन भाग हे, चलय समेट। खावय कतको खलखल पेट।।

दिखथे गाभिन पुछी सजोर। रेंगय तुरतुर ओरी ओर।।

-करिया चाँटा

176- चमचम चमचम पाँव मड़ाँव। तोर दुवारी हेरत आँव।।

जाँवर जोड़ी धौंस जमाय। अँकड़ा कोई काम न आय।।

-पनही

177- तरी तेलई ताते तात। एक तेलई ऊपर थात।।

बड़े मिठाई चूरे जाय। सादा-कोंवर गंज मिठाय।।

-पेंउस

178- माटी के बकरा नरियाय। चटकन चीला चटचट खाय।।

जतके परथे येला मार। वतके बनथे ये गुणकार।।

-माँदर

179- बिना हाथ के करय उपाय। बिना गोड़ के खाँधे जाय।।

घोड़ा दाबे बोलय धाँय। मुँह ले बोली निकलै साँय।।

-बंदूक

180- दिखे साँप कस येखर ढंग। दुधवा, सादा, उज्जर रंग।।

नारी गर के शोभा आय। जानय जौने तुरत बताय।।

-सुतिया (सूँता)

181- सुक्खा डबरी तीपत जाय। देख कोकड़ा ह फड़फड़ाय।।

सबके मन ला बहुते भाय। मुसुर-मुसुर सब येला खाय।।

-मुर्रा

182- सात नँगरिया जोतँय खेत। पानी के नइ पावँय नेत।।

ठाडे़ जोगी ध्यान लगाय। बिना बोकला रुखुवा पाय।।

-मंदिर

183- नान्हें लइका चतुरा चंट। दिखथे ये भारी फरजंट।।

मुँह ले बाहिर दतुवन घीस। तुरत बतावव काय जिनीस।।

-चूल्हा

184- माटी के बइला हे जान। माटी के हे चढ़े पलान।।

माढ़ै माटी के देवान। झटपट तैं येला पहिचान।।

-हाँड़ी

185- बादर ले वो छर्रा आय। तेला लेंगय लोग उठाय।।

स्वाद पचर्रा अजब जनाय।। जे खावय वो हा पछताय।।

-करा (ओला)

186- इन्दर राजा फोरै पेट। बादर गड़गड़ देवय मेट।।

बीच बोडर्री निकलै भात। बनय तभे जी सबके बात।।

-कपसा

187- ना डारा ना कोनो पान। जनम धरे हन तबले ध्यान।।

खाय बिना रहे ना जाय। जिनगीभर रहना हे खाय।।

-नून

188- बाढ़य बइला, भागय गाय। खेत खार मा गोड़ लमाय।।

आगू-आगू फुलुवा फूल। आँखी-आँखी जावय झूल।।

-मखना नार

189- पर्रा भर हे लाई देख। बगरै मा नइ सकय सरेख।।

चमकै चमचम ये हा रात। होत बिहनिया गायब बात।।

-चंदैनी

190- छितका कुरिया बाघ बँधाय। चारा देबे बड़ गुर्राय।।

खावय खानी देंह घुमाय। कतको खाथे, कहाँ अघाय।।

-जाँता

191- जेखर ऊपर पाँखी झार। चना, मसूरी, खेती-खार।।

डोंगा बूड़य पानी बीच। कभू-कभू पानी मा कीच।।

-आँखी

192- पचरी ऊपर पचरी जान। रहय मोंगरी परे उतान।।

हावय कोंवर मासे मास। नान्हें हे पर हावय खास।।

-जिभिया

193- हवय टेड़गा येखर राह। जबर कुआँ, नइ पावय थाह।।

आँखी संगें जोड़ी जोड़। जइसे हावय हाथे गोड़।।

-कान

194- जनमै येहा घामे घाम। चमचम चमकै आगर चाम।।

छँइहा मा ये झट मुरझाय। लगय हवा ता मरते जाय।।

-पछीना

195- राहँय जम्मों एक्के संग। पाँचों भाई एक्के रंग।।

अलग-अलग मा काय कहाय। सँघरा मा ये सदा सहाय।।

-हथेरी

196- करिया हे पर नो हे काग। लम्बा हे पर नो हे नाग।।

चढ़ै तेल, नो हे हनुमान। चढ़ै फूल, नो हे भगवान।।

-बेनी

197- उचकुल-गुचकुल कुआँ खदान। पेड़ बतीसा, एक्के पान।।

रहय मोंगरी मछरी एक। सबके सेवा करथे नेक।।

-मुँह, जीभ

198- बिना कहे ये लग जाय। कहे-कहे मा ये तनियाय।।

लाली-लाली तीर कमान। रहिथें दूनों एक समान।।

-होंठ

199- दू दरवाजा मंदिर एक। भुरवा राजा राहय नेक।।

अलग-अलग हे बाहिर भेद। भीतर जाके एक्के छेद।।

-नाक

200- नँदियाँ के ये तीरे तीर। बइठे बगुला धीरे धीर।।

टुपटुप येहा बिनते जाय। जुरमिल के ये जम्मों खाय।।

-दाँत

201- चुकिया जइसे रेंगत बेर। बइठे हे तब दीया ढेर।।

बोहे रहिथे तन के भार। येखर बिन नइ हे निस्तार।।

-माड़ी

202- कारी जंगल बीच निवास। जब-जब ये हा मरय पियास।।

पीयय पानी लाले लाल। तुरतुर-तुरतुर चलथे चाल।।

-जुआँ

203- आवय एक न येला आँच। भुसभुस बन मा नाचय नाँच।।

ककवा ककई ले डर्राय। लीम तेल ले प्रान बचाय।।

-जुआँ

204- राहय तरिया बीचो बीच। जइसे गोबर चोता कीच।।

पखरा जानव येखर खोल। जानव जल्दी, नाँवे बोल।।

-कछुआ

205- मुँहुँ हे चाकर, दाढ़ी लाम। मेर्र-मेर्र बस दिनभर काम।।

खावय भारी बोंइर पान। बहुते सिधवा येला जान।।

-बोकरा

206- अइसन चिरई जानव आज। अपन पाँव ले आवय लाज।।

पुछी धरे पइसा पहिचान। जंगल के ये होथे शान।।

-मंजूर

207- चटर-चटर हे चतुरा चंट।  भनभन-भनभन देत करंट।।

चूमय थोरिक चुप्पे गाल। हो जावय तब बारा हाल।।

-मच्छर

208- आवय डॉक्टर बिना बलाय। बिन पइसा ले सुजी लगाय।।

हाथ-पाँव छैठन हे देख।  नाँव काय हे? चिटिक सरेख।।

-मच्छर

209- दू अण्डा अउ एक्के थार। अलग-अलग हावय व्यवहार।।

हे इक ठण्डा दूजा गर्म। जानव का हे येखर मर्म।।

- सूरुज, चंदा

210- आगी अँगरा लाले लाल। लकठा जाबे बारा हाल।।

सात घोड़वा रथे सवार। पावय कोनो नइ तो पार।।

-सूरुज

211- घटथे बढ़थे येखर रूप। कभू अँजोरी कभू कुलूप।।

जुड़हा जानव येखर छाँव। आसमान हे येखर गाँव।।

-चंदा

212- थारी भर मोती भरमार। खाल्हे कोनो गिरय न यार।।

दिखय न एक्को ये दिनमान। जगजग रतिहा लगै बिहान।।

-चंदैनी

213- नंद बबा के नौ सौ गाय। चरय रात, दिन बेड़े जाय।।

सुग्घर जुड़हा येखर धाम। ओझल होथे देखत घाम।।

-चंदैनी

214- रहिथे येहा तरिया बीच। गड़े नेरवा खाल्हे कीच।।

दिखथे जइसे कंचन थार। लोटय पानी एक न यार।।

-पुरईन पान

215- एती-ओती जावय रोज। कहाँ धराथे येहा सोज।।

आगू-पाछू चलथे संग। बिरबिट करिया येखर रंग।।

-छँइहा

216- बादर ले नरियर ये आय। पाँच रकम के भेला ताय।।

बिन छाली के हावय बीज। बोल तुरत अब ये का चीज।।

-करा

217- सावन-भादो भारी चाल। पानी-पानी बारा हाल।।

माँघ-पूस मा पातर धार। का हे येहा करव विचार।।

-मोरी (नाली)

218- भर-भर हथुआ धरे पिसान। घर भर बाँटय अपने मान।।

येखर बिन नइ हे उजियार। संग रहय ता खुशी अपार।।

-अँजोर

219- आधा मिट्ठू देखव यार। आधा बगुला दिखथे सार।।

हमर देश मा उपजै पोठ। कोनो पातर कोनो मोंठ।।

-मुरई

220- रिंगी-चिंगी फूलै फूल। फर फरथे फुनगी मा झूल।।

दिखथे लकड़ी जइसे अंग। गुदा रसा हे येखर संग।।

-मुनगा

221- दाना ऊपर दाना देख। इचिक-पिचिक हे तहूँ सरेख।।

गोल-गोल दाना दमदार। बने रथें एक्के परिवार।।

-बटरा

222- एक खड़े खंभा खँड़सार। पाना छाहित येखर चार।।

नाँव धरे हें तीने पान। भरे स्वाद निक येमा जान।।

-तिनपनिया

223- एक टाँग के टोपी एक। जोगी निकले बारा नेक।।

बादर गरजय तब ये आय। सबके मन ला बहुते भाय।।

-फुटु

224- हावय हड़िया सादा रंग। भीतर पानी हे दू रंग।।

तुरते ताही नाँव बताव। बाँट बिराजे सब झन खाव।।

-अंड़ा

225- देवय दुधवा नो हे गाय। तीन आँख पर नहीं शिवाय।।

रहै पेड़, चिरई नइ जान। खड़भुसरा येखर पहिचान।।

-नरियर

226- रहय कटोरा संगे खाप। गोरा बेटा साँवर बाप।।

भीतर कोंवर, बाहिर ठोस। गुरतुर-गुरतुर खाव परोस।।

-नरियर

227- साल, महीना चूरे भात। जब खाबे तब ताते तात।।

नानुक फर हे करय कमाल। छू पारे ता आँखी लाल।।

-मिरचा

228- लइकापन हरियर हे हाल। आय बुढ़ापा होवय लाल।।

मया मरे मा अगिन ढिलाय। पानी-पानी सब चिल्लाय।।

-मिरचा

229- हरियर पींयर येखर रंग। टिपटिप रस हा छलकै अंग।।

नान्हें-नान्हें सेसा सार। काट-काट के चटनी डार।।

-लिम्बू

230- थोरिक पानी बीच तलाव। लाल भवानी गाल फुलाव।।

धोय नहाये ताते तात। कहाँ अगोरा खाते खात।।

-सोहाँरी

231- नानुक टूरा मटकू दास। ओन्हा परिहे तीस पचास।।

लाली सादा रहिथे यार। चुरपुर गुरतुर, नँगते झार।।

-गोंदली

232- रतन सिंग हे नाँव धराय। काटय कुड़हा बाँध मढ़ाय।।

हाड़ा-हाड़ा चुहकै सार। चुहक-चुहक के घुरुवा डार।।

-कुसियार

233- फर लड़ुवा कस होथे गोल। पाना गुजगुज लाम टटोल।।

हाँसय येहा, सबझन रोय। कांदा भुँइयाँ भीतर होय।।

-गोंदली

234- बोंवत बटुरा देखँव खार। जामत मा दिखथे कुसियार।।

ढाई महिना होवय पूत। दाढ़ी मेछा होय अकूत।।

-जोंधरी(भुट्टा)

235- एक पेड़ मा ढेलच-ढेल। खावँय लइका खेलत खेल।।

कटही डारा, पाना पीक। सावन मा ये लागय नीक।।

-बेल पेड़

236- खाल्हे हंडा मिलय हियाव। ऊपर हँड़िया देखव पाव।।

पाना डारा बनथे साग। अमसुरहा के धरलव पाग।।

-जिमीकांदा

237-  सौ-सौ घुँघरू एक्के गोड़। हवय गोरिया ये बेजोड़।।

खनखन बाजय, सुनलव टेर। बोलव का झन करव अबेर।।

-मूँगफली

238- बारी बखरी खेती खार। ओन्हा-कोन्हा तीरे तार।।

एक फूल बहुते सुखदास। फर फरथे चालीस पचास।।

-केरा

239- तीन सींग के करिया गाय। अब्बड़ येखर दूध मिठाय।।

राहय येहा तरिया बीच। डेरा येखर कारी कीच।।

-सिंघाड़ा

240-  काय शहर अउ गँवई गाँव। जम्मों करथें खाँवे खाँव।।

फर करिया अउ गुठलु सफेद। कोनो करँय न काँही भेद।।

-जामुन

241- कुबरा बुढ़वा नून म खाय। सोज बाय नइ रहि पाय।।

करिया बीजा हरय चिचोल। सोच समझ के नामे बोल।।

-अमली

242- सुग्घर हावय गोल मटोल। हरियर डारा, लाल कपोल।।

चटक-मटक ये सबके संग। कभू करय नइ ये उतलंग।।

-पताल

243- अइसन सिधवा राजा घात। बइठे छानी ताने लात।।

भुँइयाँ लामे येखर हाथ। फुलवा पाना देथे साथ।।

-मखना नार

244- चार महीना खूब भराय। चार महीना रहि खलियाय।

चार महीना धूल उड़ाय।। चार महीना सब घोलाय।।

-खेत

245- दाई चबरी, बेटी नेक। रहिथें काँटा खूँटी टेक।।

जौन तीर मा येखर जाय। संग चिरोंजी सुग्घर पाय।।

-बोंइर

246- एक दाँत के अलकर लोग। सावन-भादो नइ हे सोग।।

एक मुठा मा थामै मूँठ। दू बइला हा फाँदै ठूँठ।।

-नाँगर

247- रुखराई ना पाना सार। ऊपर छाहित छाता यार।।

चढ़े रखे ये उँचहा रूख। बिन राँधे ये मेटे भूख।।

-अमरबेल

248- बिना पाँव के अहिरा जाय। बिना सींग के देखव गाय।।

देख अचंभा मति चकराय।। येमन खारे खार कुदाय।।

-साँप अउ मेंचका

249- बिना पाँख के सुवना खास। उड़ि-उड़ि जावय ऊँच अगास।।

रंग रूप के नइ हे आस। भूख मरै ना कभू पियास।।

-जीवात्मा

250- कथा, सुपारी, बँगला पान। दू मनखे अउ बाइस कान।।

कभू करँय लंका मा राज। रहिगे अब तो सुरता आज।।

-रावण, मंदोदरी

251- खोड़र-खोड़र खटका गीन। छै आँखी बोड़र्री तीन।।

छै गोड़ा अउ एक फँदाय। एक दुसर के काज बनाय।।

-नाँगर जोतत किसान

252- चरै बोकरा नँदिया तीर। चारा खपगे परगे धीर।।

बिन चारा के बड़ नरियाय। तड़प-तड़प के ये मर जाय।।

-दीया

253- माटी के तरिया खोदाय। पुछी डहर ले पानी पाय।।

जरय मुँड़ी हा धीर लगाय। सादा तन तुरते ललियाय।।

-दीया

254- एक जगा धर आय मढ़ाय। चारों मूँड़ा ये बगराय।।

अँधियारी ला देवय चीर। अइसन नान्हें माटी बीर।।

-दीया

255- बड़का भारी एक जहाज। पुछी लमा के करथे काज।।

मुँह उलगै कुहरा झार। करै तहाँ ये घर उजियार।।

-दीया

256- दिनभर सोवय पाँव पसार। जागय जब होवय अँधियार।।

जतके जागय होय सजोर। अँधियारी ला खाय बटोर।।

-मोमबत्ती

257- दूर देश मा माया जाल। गाँव-शहर हावय ससुराल।।

गली-खोर मा ठाड़े यार। घर-घर मा येखर परिवार।।

-बिजली

258- रतिहाकुन जागय बिरवान। सुतै ससनभर ये दिनमान।।

चारा-पानी कुछु नइ खाय। अँधियारी ला बहुते भाय।।

-बिजली

259- कुटी-कुटी कतको तैं काट। जींयत रहिथे, चाहे पाट।।

चाहे पानी मा दे बोर। छाँड़य नइ ये हमरे कोर।।

-परछाई

260- करिया बइला राहय ठाड़। लाली बइला चढ़ै पहाड़।।

सँघरा दिखथे एक समान। नाँव बतावव का हे जान।।

-आगी

261- खरर-खरर खूँटी ला खाय। पानी पीयत ये मर जाय।।

धीर धरै कुहरा उड़ियाय। ताव चढ़ै जम्मों लेसाय।।

-आगी

262- कुबरी घोड़ी, लाल लगाम। बने बनावय सबके काम।।

ओमा चढ़थे ससुर दमांद। धरे एक दूसर के खाँध।।

-चूल्हा

263- चाबे ले ये कहाँ चबाय। लीले मा लीलावत जाय।।

काँही नइ हे येखर रंग। सँघरै सबके येहा संग।।

-पानी

264- हावय अइसन कारी गाय। देखत रहव करौंदा खाय।।

ढ़ील परे ता आफत आय। भागत बछरू लंका जाय।।

-बंदूक

265- रतिहाकुन ये भारी जान। हरू होय येहा दिनमान।।

चार गोड़ के खोरु सियान। लाखों आँखी देखव तान।।

-खटिया

266- बिन पखरा के हवय पहार। नँदिया हावय बिन जलधार।।

बिन मनखे के दिखथे गाँव। हावय जंगल, नइ हे छाँव।।

-नक्शा

267- एक अजूबा अइसन ताय। लात परै बहुते चिचियाय।।

पियै तेल अउ कुछु नइ खाय। कान अँइठ झट भागत जाय।।

-फटफटी

268- पातर दुब्बर संगी तीन। एक दुसर के रहँय अधीन।।

आगू-पाछू दँउड़त जाय। एक चिटिक नइ तो सुरताय।।

-घड़ी

269- संगे आवय संगे जाय। पानी ला बहुते डर्राय।।

हरय पाँव के ये रखवार। अँकड़ा मा ये हे बेकार।।

-पनही

270- आवय खाँधे, जावय खाँध। राखय येला सुग्घर बाँध।।

नेंग-नेंग मा मारे खाय। हाँसत-गावत बोल सुनाय।।

-माँदर

271- फुदक-फुदक के फुदकत जाय। तुनक-तुनक के बड़ तनियाय।।

छोड़ दुसर के थामै हाथ। कपड़ा, सुतरी जम्मों साथ।।

-सुजी सूत

272- खेत गोरिया, करिया बीज। खाय पिये के नो हे चीज।।

देथे सब ला अक्षर ज्ञान। का हे येखर नाँव मितान।

-कागज-स्याही

273- चारा चरथे चढ़े पहार। पानी पीथे मुँड़ ओथार।।

पथरा संगे चढ़थे रंग। ठलहा राहय बदले संग।।

-छूरा

274- तोरे ऊपर चढ़हे चाब। राख सकच ना येला दाब।।

येखर ले तोरे पहिचान। चाहे रतिहा या दिनमान।।

-नाव

275- अँइठत-अँइठत डारै घात। बाहिर हेरय रस चुचुवात।।

का हे येखर जानव नाँव। रँधनी खोली हावय ठाँव।।

-करछुल

276- बड़ अँइठुल हे येखर गोठ। अँइठन-गँइठन हावय पोठ।।

पाय न कोनो येखर पार। छँइहा करथे, मुँड़ रखवार।।

-पगड़ी

277- दू पाटा हे टाँग पसार। काहय मूँठा भर-भर डार।।

एक खड़े हे दूजा जाय। खीला बीचे धरे जमाय।।

-जाँता

278- करिया डारै, निकलै लाल। मार भकाभक देख सँभाल।।

पानी होजय ताते तात। इही बनावय जग के बात।।

-लोहा

279- करिया मूसर धूम कचार। ताकत येखर हवय अपार।।

काखर हावय देख अगोर। खबर-खबर माटी ला जोर।।

-साबर

280- चाँद बरोबर मुखड़ा खास। ना धरती, ना हवय अगास।।

लगे बहू के गजबे आस। एक घड़ी नइ देखय सास।।

-आईना

281- चार गोड़ के चंपा नार। खेलै अमरिस बानी झार।।

डुबकय सागर भीतर खास। माँगय पानी मरय पियास।।

-मथानी

282- दस-दस खीला हे ठोंकाय। पंगत खातिर ये रजवाय।।

पाना-पतई हरियर रंग। खात खवाई येखर संग।।

-पतरी

283- दस-दस भाई देवँय मार। पाछू भाई पाँच कचार।।

जोर-जार के अँगना लान। चूल्हा-चौका राहय ध्यान।।

-छेना

284- दू ठन बइला एक्के रंग। राहय जुरमिल संगेसंग।।

आगू-पाछू भागँय सार। एक दुसर बिन हें बेकार।।

-पनही

285- उज्जर सादा हावय खेत। करिया नाँगर करथे चेत।।

उलगय कारी-कारी सोन। तुरत बता ये हावय कोन।।

-कलम(पेन)

286- पुछी कोत ला खावत जाय। देखव-देखव मुँड़ी सिराय।।

खाकी कपड़ा पहिरे जान। का हे तेला तैं पहिचान।।

-बीड़ी

287- पाँच हाथ के लंबा होय। बखत परे मा सब ला धोय।।

लम्बू टूरा येखर नाँव। रझ ले मारय एक्के घाँव।।

-लउठी

288- इक महतारी लइका साठ। राजा जइसे सबके ठाठ।।

कोनो चटपट झट अगुवाय। कोनो अल्लर रहै उँघाय।।

-माचिस काड़ी

289- दिखथे करिया येखर हाल। जरते दिखथे येहा लाल।।

फेकें मा ये सादा झार। नाँव बतावव येखर यार।।

-कोइला

290- हावय तरिया करिया रंग। भुरुवा सादा डुबकैं संग।।

कहूँ खियावै भुरवा राम। तभे मतावै तरिया थाम।।

-तख्ता

291- चढ़ै नाक ला धरके जान। धरै हाथ मा दूनों कान।।

कनवा खातिर ये वरदान। तीसर आँखी येला मान।।

-चश्मा

292- गुड़गुड़-गुड़गुड़ गटकत जाय। आगी लागय धुआँ उड़ाय।।

पाना-पतई जम्मों झाँय। खाँखत-खाँसत समय बिताँय।।

-हुक्का

293- गहना गुरिया बने बनाय। चाँदी-सोना देख सजाय।।

कान नाक ला देवव छेद। जात-पात के नइ हे भेद।।

-सोनार

294- धरे हथौड़ा धार धराय। आगी-पानी संग बिताय।।

लाली लोहा ठोंक ठठाय। बइठे भट्ठी काज बनाय।।

-लोहार

295- मया-दया के हवय खदान। घर अँगना के इही सियान।

मोर संग मा इँखरे नाँव। संझा-बिहना लागँव पाँव।।

-बाप

296- रखय ओदरा मा नौ माह। साहय येहा पीर अथाह।।

गजब लुटाथे मया दुलार। जनम धरे हँव मैं संसार।।

-महतारी

297- तउँरय तरिया मा ये रोज। गोड़ हाथ नइ राहय सोज।।

चिक्कन मैदा डार मिलाव। डार चासनी खाते खाव।

-जलेबी

298- कूलर, पंखा गजब सुहाय। शरबत जुड़हा खूब पियाय।।

भावय बर, पीपर के छाँव। ये मौसम के का हे नाँव।।

-गरमी

299- कपसे राहय भारी हाड़। लागय बहुते सब ला जाड़।।

कथरी कमरा भुर्री भाय। ये मौसम हा काय कहाय।।

-सरदी

300- दीया बारन ओरी ओर। चारो मूँड़ा होय अँजोर।।

नवा अंगरक्खा हमन सिलान। मया मितानी बड़ बगरान।।

-देवारी

301- एक पेड़ मा एक्के पान। तीन रंग येखर पहिचान।।

जम्मों देथें येला मान। रक्षा करथें हमर जवान।।

-तिरंगा झंडा

302- एक महल दू ठन द्वार। माल भरे हे इहाँ अपार।।

चोरी-हारी नइ तो जाय। बुड़य गहिर मा तौने पाय।।

-सीपी(मोती)

303- एक चलय चितवा चाल। दूजा घोड़ा जइसे हाल।।

तिसर चलै जइसे गजपाल। तभो मिलय आपस मा ताल।।

-घड़ी

304- ना भुँइया मा माढ़ै भार। ना ऊपर मा रहय सवार।।

करै अँजोरी अउ अँधियार। कभू बरसजय मूसलधार।।

-बादर

305- खोर गली अउ खेत पहाड़। खड़े रहँव मैं झंड़ा गाड़।।

मोर करम रे जग उजियार। मोर बिना हे जग अँधियार।।

-बिजली खम्भा

306- एक पेड़ के पाना एक। फरफर-फरफर लगथे नेक।।

तीन रंग येखर पहिचान। पाँव पखारत देथन मान।।

-तिरंगा झंडा

307- आँखी हावय येखर तीन। तभो दिखय नइ, लागय हीन।।

भरे सरोवर भीतर जान। मेड़ पार हे सादा मान।।

-नरियर

308- रहिथे येहा लामी लाम। फेर साँप नो हे जी नाम।।

आगू-पाछू दूनों जाय। लोहा रद्दा जाये आय।।

-रेलगाड़ी

309- खड़े रहँव मैं एक्के पाँव। खातू माटी मोरे ठाँव।।

सुग्घर सब्जी मोला जान। सादा छाता जइसे मान।।

-पिहरी

310- बादर गरजय जोरेदार। नाचय छमछम हो तैयार।।

बरसत पानी अमित लुभाय। तरपौंरी ला देख लजाय।।

-मंजूर

311- संझा होवत तन थक जाय। रतिहा रानी नींद बलाय।।

मन बइहा हा कइसे सोय। पाछू-पाछू येखर होय।।

-सपना

312- पाँखी हे चिरई झन जान। तँउरत राहँव मैं मनमान।।

पानी हावय मोर अधार। बिन पानी के प्रान उजार।।

-मछरी

313- देखव जादू डंडा खेल। नइ हे भीतर पानी, तेल।।

बटन दबादे तुरत अँजोर। अँधियारी भागय पटटोर।।

-ट्यूबलाइट

314- कारी-कारी हावय रंग। रहिथँव मैं अमरैया संग।।

गुरतुर बानी मीत बनाँव। कुहू-कुहू नित गीत सुनाँव।।

-कोइली

315- भुँइया भीतर बाढ़े जाय। बाहिर मा हरियाली छाय।।

जम्मों भाई कली कहाय। साग भात के स्वाद बढ़ाय।।

-लसुन

316- पाँखी हे ना कोनो पाँव। पानी हा हे येखर ठाँव।।

चलते रहना हावय काम। तुमन बतावव झटपट नाम।।

-डोंगा

317- पाँखी हावय रंग बिरंग। राहय दिनभर फुलुवा संग।।

तीर तार मा थोरिक आय। पकड़े धरबे फुर्र उड़ाय।।

-तितली

318- अपन बिला ला बहुते भाय। घरभर भारी उधम मचाय।।

कुतर-कुतर ये सब ला खाय। मुनु बिलई ला देख डराय।।

-मुसुवा

319- मोर जनम माटी ले होय। माटी मा ही जिनगी खोय।।

देशी कूलर महीं कहाँव। जुड़हा पानी प्यास बुझाँव।।

-करसी

320- हावय अँगना ऊँच पहार। घर भर जगमग बल्ब हजार।।

दिन मा जम्मों सुते उतान। रतिहा बाढ़य बहुते शान।।

-अगास अउ चंदैनी

321- जंगल मा झाड़ी घनघोर। बाढ़य रोजे कोरे-कोर।।

बिन काटे बहुते खजुवाय। जतके काटव बढ़ते जाय।।

-दाढ़ी

322- काबर कहिथस तोरे मोर। राखव झन तुम येला जोर।।

बिन येखर नइ होवय काम। तुरत बतावव का हे नाम।।

-रुपिया, पइसा

323- ना कोनो हे नार-बियाँर। ना कोनो हे कुआँ-कछार।।

सुपा-सुपा टूटय भरमार। भइगे बस घुरुवा मा डार।।

-राख

324- भनभिन-भनभिन गावय राग। बइठ कलेचुप भाते साग।।

एती-ओती उड़ते जाय। मनखे बर बीमारी लाय।

-माछी

325- एक चटाई सातो रंग। राहय बरखा, बादर संग।।

कोनो काहय घोड़ा आय। इन्दर राजा बाण चलाय।।

-इन्द्रधनुष

326- लउठी लागय जइसे बेत। उपजै बरछा बारी खेत।।

हे गठान लाठी भरमार। भीतर गुरतुर रस के धार।।

-कुसियार

327- करिया धोती, एक्के पाँव। जुड़हा मौसम सपटे ठाँव।।

बरखा गरमी मा ये छाय। छँइहा मा झट सुरताय।।

-छाता

328- बड़े बिहनिया येहा आय। दुनिया भर मा फूल खिलाय।।

चिरई चहकै शोर मचाय। कोनो येखर तीर न जाय।।

-सूरुज

329- दिखय सबो ला, कहाँ लुकाय। रूप बदलथे, सुघर सुहाय।

लइकामन के ममा कहाय। रतिहाकुन सबके घर जाय।।

-चंदा

330- सोज-बाय हावँय चार। अड़े-खड़े हें दुनों तियार।।

एक-एक मुँहुँ, दू-दू डार। लकड़ी-डोरी येखर सार।।

-खटिया

331- गोल-गोल मैं घूमत जाँव। बइठ सकँव नइ एक्के ठाँव।।

दाई कहिथे मोला संसार। रखँय तभो तरपौंरी पार।।

-धरती

332- उड़थँव पर चिरई झन जान। मोरो पाँखी बड़ बलवान।।

सरदी-गरमी बरखा आय। मोर अंग नइ तो घबराय।।

-हवाई जहाज

333- एक अचंभा लाठी आय।चुहक-चुहक जम्मों जन खाय।।

राहय रसहा दसो गठान। करदै सबके मीठ जबान।।

-कठई

334- सबके घर मा मोर मकान। प्यास बुझाथँव सिरतों जान।।

बंद परँव तब अँइठँय कान। संगी मोला लव पहिचान।।

-नल

335- आगू-पाछू राहन साथ। तीनों भाई धरके हाथ।।

बंद होय जब हमरो खेल। पीठ डहर ले डारँय सेल।।

-घड़ी

336- अचरज हावय चिरई एक। तरिया तीरे राहय टेक।।

चोंच सोनहा बड़ उजियार। पानी पीयय पुछी उतार।।

-दीया अउ बाती

337- जेखर घर मा खुशी मनाय। मोला बाँधय खूब ठठाय।।

जतके मैं रोवँव चिल्लाँव। वतके जादा मारे खाँव।।

-ढ़ोलक

338- दू आखर के हावय नाम। आवँव मैं खाये के काम।।

उल्टा लिखबे बनहूँ नाँच। मोर नाँव का, तुरते बाँच।।

-चना

339- भाई-बहिनी जागय भाग। नो हे ये डोरी दू ताग।।

उल्टा करदे, बनजँव साग। कचर-कचर खा देवत राग।।

-राखी

340- दू आखर के नाँव सजोर। बहुते मँहगा काँच कठोर।।

उलट-पुलट दे, रेंगत जाव। मुँहु मा रखके, प्रान गँवाव।।

-हीरा

341- उलट लिखे धारा बन जाय। सोज लिखे ब्रजरानी ताय।।

नाम कृष्ण ले आगू आय। शरद पूर्णिमा, रास रचाय।।

-राधा

342- शुरू कटै ता जल हो जाय। कटै बीच ता काल कहाय।।

कटै आखिरी बनथे काज। आँखी तीर मा करथें राज।।

-काजल

343- दिन भर येहा चलते जाय। एक पाँव पर उठ नइ पाय।।

बत्तीस वीर हें रखवार। कोंवर जस रसवंती नार।।

-जीभ

344- मुँड़ी मोर हरियर हे जान। देंह पाँव सब सादा मान।।

आथँव मैं खाये के काम। तुरत बतावव का हे नाम।।

-मुरई

345- खंभा जइसे लागय गोड़। आगू अजगर राखय जोड़।।

पाछू कोती लटकय साँप। भाँप सकत ता का हे भाँप।।

-हाथी

346- कहिथें अइसे संत सुजान। बात इही ला सिरतों ज्ञान।।

बाप ददा के एक्के जान। महतारी के दू ठन मान।।

-गोत

347- बँधे बोकरा बहुते ताय। मेर-मेर मरहा नरियाय।।

मुँहु कोती ले चारा खाय। बाखा ले सरलग पगुराय।।

-जाँता

348- ददा टेड़गा, दाई थार। दिखथे बहिनी सुग्घर सार।।

करिया ओखर फुलगी नाक। नाँव बता तैं लगा दिमाक।।

-परसा पेड़

349- अइसन रुखुवा जानव कोय। काटे मा नइ वो उलहोय।।

जुड़े रथे येखर ले तार। जब तक नइ आये संसार।।

-बोडर्री

350- उरिद कोठरी येला जान। मूँग देव के गरुवा मान।।

बिना दूध बछरू पीयाय। पाछू-पाछू फिरते जाय।

-कुकरी अउ चियाँ

351- बिन मुँड़ के राक्षस इँतराय। गंगा-जमुना लेग सराय।।

चिता जलावय हाड़ा टोर। बनथे नहना चमड़ा जोर।।

-पटवा

352- लदबद लोदा गोड़ लमाय। फदफद फोदा बुता कमाय।।

चिक्कन राखय अँगना द्वार। गोबर, पानी, फरिया सार।।

-लिपनी

353- बइठे कारी गाय करार। देखत हे वोला रखवार।।

बिगड़ै कखरो काँही काम। तुरत बतावव येखर नाम।।

-हँड़िया

354- एक्के दीया हे दमदार। उगलै घर भूसा भरमार।।

सुघर सोनहा जइसे रंग। पर रहिथे अँधियारी संग।।

-चिमनी

355- बइठे-बइठे बहुते बाढ़। रदबद गोबर कचरा गाढ़।।

इहाँ-उहाँ आगू मा देख। का हे येला चिटिक सरेख।।

-घुरुवा

356- चरिहा-चरिहा टूटत जाय। बीच बजारे झट बेंचाय।।

राहय लामे लमरी नार। राजा, परजा खावँय झार।।

-पान

357- खड़े-खड़े रात पहाय। दिनभर भुँइया परे बिताय।।

घेंच, पाँव मा ये लपटाय। गरुवा मन हा रहे बँधाय।।

-गेरवा

358- रेंगत-रेंगत धरसा आय। चिन्हा एको एक न पाय।।

संग रहँय ये लाखों लाख। खोजे मा गोबर ना राख।।

-चाँटी

359- ठुड़गा रुखुवा मारय शोर। ऊपर बुड़गा नाचै जोर।।

सगा-सगा ला देवय काट। करिया लोहा गजब उचाट।।

-टँगिया

360- हवय गोड़ हा मोरो चार। फेर रेंग मैं सकँव न यार।।

बइठ मोर ऊपर सरकार। जानव लकड़ी लोहा सार।।

-खुर्सी

361- घर कुरिया के मैं रखवार। बिना धरे लाठी, तलवार।।

रहँव अकेल्ला डेरा डार। मोर भरोसा अँगना द्वार।।

-तारा, कुची

362- पींयर-पींयर तरिया झार। पींयर अण्डा देथव गार।।

खावँय येला जम्मों बाँट। अमसुरहा चटकारा चाँट।।

-कढ़ी

363- आखर हावय मोरे तीन। रहिथँव मैं हा झिल्ली, टीन।।

उल्टा-सीधा एक्के नाम। आथँव मैं खाये के काम।।

-डालडा

364- सग बहिनी दू झन हे जान। सादा करिया हे पहिचान।।

रहय संग पर मिल ना पाय। हवय गोलवा सब ला भाय।।

-आँखी

365- काठ कठोली धरले हाथ। लोहा, टीना हावय माथ।।

मथे मथानी दू झन जाय। कहाँ लेवना एक्को पाय।।

-आरी

366- आँवर-भाँवर दँउड़े जाँव। दौंरी फाँदे जइसे ठाँव।।

तीन हाथ, मुँहुँ, नइ हे गोड़। गरमी के मैं हावँव तोड़।।

-पंखा

367- सीधा लिखबे ठौर बताय। उल्टा लिखदे ताप बढ़ाय।।

दू आखर के हावय नाँव। पढ़के पहुँचै खच्चित ठाँव।।

-पता

368- फुलुवा नो हँव, कली कहाँव। लुका-छिपी मैं करते जाँव।।

भिथिया मा मैं भागम भाग। किरवा, फाफा भाते साग।।

-छिपकली

369- कहाँ फोकला मोरे पाव। बिन गुठली के मोला खाव।।

पानी के मैं लइका ताँव। सोंच-समझ के बोलव नाँव।

-बरफ

370- चाहे जावव चारों धाम। मोर बिना हे चक्का जाम।।

पानी जइसे मोला मान। झटपट मोला लव पहिचान।।

-पेट्रोल

371- पीठ परे हे करिया धार। तुरतुर भागय रुखुवा डार।।

पुछी हवय झब्बूदार। रामकृपा हे येखर पार।।

-चिटरा

372- जेखर मुँड़ मा कलगी लाल। रिंगी-चिंगी पुछी कमाल।।

बड़े बिहनिया शोर मचाय। कुकरुँस कूँ कहि सुते जगाय।।

-कुकरा

373- लीची जइसे कुरता जान। दिखै पेटला सेठ समान।।

थाँघा-थाँघा चटक बिताय। उलट बेंदरा लटक कहाय।।

-कटहर

374- आँखी लाली-लाली राम। कान रथे बड़ भारी लाम।।

तन ला पोनी गुजगुज जान। सोंच-समझ अउ झट पहिचान।।

-भठइला

375- तन मा येखर दसठन खोल। अँगरी डार घुमाले गोल।।

ट्रिन-ट्रिन के बोलय बोल। गोठबात मा दुनिया डोल।।

-टेलीफोन

376- उड़थे ये पर नो हे चील। पानी देथे नो हे झील।।

गड़गड़ गर्जन करथे शोर। बिजली कड़कै करै अँजोर।।

-बादर

377- छूबे ता ये जूँड़ जनाय। रंग-रूप हा गजब सुहाय।।

रतिहा मोती जस अनमोल। होत बिहनिया पानी गोल।।

-ओस

378- शुरू कटै ता 'परे' कहाय। कटै बीच ता 'कड़क' जनाय।।

तीन वर्ण के हावय नाम। आथे ये पहिरे के काम।।

-कपड़ा

379- लकड़ी घोड़ा लेवँय नाम। तन मा लोहा लगे लगाम।।

घर कुरिया के ये रखवार। तने मुँहाटी, बन सरदार।।

-कपाट

380- बिन धोये सब जम्मों खाँय। खा के सब पाछू पछताँय।।

नाँव पुछे मा सबो लजाँय। कोनो येला कभू न भाँय।।

- धोखा

381- सोज लिखे मा बहते जाय। उलट परे ता 'वाह' कहाय।।

दिखै नहीं पर रहिथे साथ। नइ पकड़ावै, जुच्छा हाथ।।

-हवा

382- कहूँ भटकबे, पथ अनजान। दिही दिशा के येहा ज्ञान।।

संग रखे मा साधय काम। तुरत बतावव का हे नाम।।

-दिशासूचक यंत्र

383- बटन दबाके करव सवाल। उत्तर तुरते, लगै कमाल।।

गुणा-भाग अउ जोड़-घटाव। बिन गलती के सब हल पाव।।

-केलकुलेटर

384- अजगर जइसे लामी लाम। आथे येहा बहुते काम।।

उगलै घर-घर पानीधार। नाँव बताही, वो हुशियार।।

-पानी के पाइप

385- नान्हें हे पर बड़े कहाय। रोज दही के नदी नहाय।।

जन-जन के ये मन ला भाय। अमसुर-गुरतुर गजब मिठाय।।

-दहीबड़ा

386- एक गोड़ के घोड़ा यार। दू झन येमा होंय सवार।।

आगू-पाछू एक न जाय। बेड़ा ऊपर गोल घुमाय।।

-रैहचूली

387- सरी जगत मोला डर्राय। आखर तीने नाँव बताय।।

पर इच्छा के होथे मान। कब का पुछही नइ हे भान।।

-परीक्षा

388- बारी बखरी मैं सिरजाँव। बिना गोड़ के गजब कुदाँव।।

आगू-पाछू गजबे धार। मोला सिरजावै लोहार।।

-कुदारी

389- करिया उज्जर धरहा अंग। रहिथँव मैं घर रँधनी संग।।

सब्जी भाजी काट मढ़ाँव। खड़े फसल ला काट गिराँव।।

-हँसिया

390- शुरू कटे ता गुरतुर गान। कटे बीच ता संत सुजान।।

कटे आखिरी तब हँव यार। तुरत बता अउ बन हुशियार।।

-संगीत

391- घाट-घटौंदा, तरिया पार। होवय चाहे नदी करार।।

पखरा, ईंटा रचे दिवार। जघा एक ये सीढ़ीदार।।

-पचरी

392- ग्वाला हा गर मा लटकाय। धरे कसेली दुहते जाय।।

गरुवा चुन्दी बरै मिलाय। पाँव छँदावय तभे दुहाय।।

-नोई

393- लइका-छउआ मजा उड़ाँय। नेती डारँय खूब चलाँय।।

लकड़ी, खीला छोल लगाय। संगीमन के संग सुहाय।।

-भौंरा

394- काँच गोलवा गोली जान। सस्ता मिलथे सिरतों मान।।

लइका मारय नेम लगाय। सुग्घर खेलँय दाम पदाय।।

-बाँटी

395- हरियर पींयर फर पहिचान। पाना घन बड़ नाने नान।।

आवय येहा बहुते काम। खाव मुरब्बा, जानव नाम।।

-आँवरा

396- बारी बखरी उपजै झार। कटही रुखुवा होवय सार।।

सादा, ललहूँ येखर रंग। दूध रिसै, अमसुर संग।।

-करौंदा

397- पान कोचई संग लपेट। सरपट सरपट कढ़ी पहेट।।

चानी-चानी बेसन संग। अमसुरहा हे, खाव मतंग।।

-इड़हर

398- माटी भाँठा के तैयार। कच्चा माटी साँचा डार।

भट्ठा रचके आगी बार। लाली पखरा देख हजार।।

-ईंटा

399- भरे कसेली दूध चुरोय। महतारी हा मया पुरोय।।

धर रपोट सब दही जमाय। लइका सुतई ले ये खाय।।

-करौनी

400- बीच बियारा धान मिसाय। खरही खाल्हे पैर बिछाय।।

लउठी मा हुक लोहा सार। बुता करय बड़ इही कोठार।।

-कलारी

401- कोंवर-कोंवर हिस्सा बाँस। खावँय मनखे येला हाँस।

नवा रूख बर पिका अगाध। फेर टोरना हे अपराध।।

-करील

402- माटी के हे बरतन खास। राउत भइया भरय हुलास।।

दगा गोरसी ऊपर राख। करिया भाँड़ी गुण हे लाख।।

-कसेली

403- घर, अँगना, परछी, परसार। राहय गरुवा डेरा डार।।

गोबर गँउदन गजबे होय। गाय गरू ये खोली सोय।।

-कोठा

404- जेवन नो हे जम्मों खाय। खा-खा अपने बात बताय।।

कहना कखरो जावय मान। बिन सवाद के हे पहिचान।।

-किरिया

405- काँदी, कचरा, पैरा डार। होवय खोली एक तियार।।

भिथिया, काड़ी, माटी भार। जुड़ बोलय सुग्घर घर द्वार।।

-कुन्दरा

406- बाहिर छछले पाना डार। भुँइया मा काँदा भंडार।।

येखर पाना साग बनाय। राँधे काँदा घलो सुहाय।।

-कोचई

407- बड़का पखरा काट बनाय। पानी पसिया गरुवा खाय।।

जूठा-काठा येमा डार। राहय घर के तीरे तार।।

-कोटना

408- छावै परसा पाना, बाँस। पहिरँय मुँड़ मा मुच-मुच हाँस।।

देशी छाता इही कहाय। पानी बादर घाम बचाय।।

-खुमरी

409- गंगा हे पर नइ हे धार। कटही रुख, फर हवय गुदार।।

अमली जइसे झुलथे डार। कस्सा गुरतुर होथे सार।।

-गंगाअमली

410- गाँव तीर भाँठा मइदान देव साँहड़ा के ये स्थान।।

जम्मों गरुवामन ठोंकाय। मड़ई मातर इहाँ मनाय।

-दइहान

411- बइला, भँइसा रहै फँदाय। दू चक्का मा दँउड़े जाय।।

जुड़ा सुमेला, पटनी पाट। खन-खन बाजत नापय बाट।।

-गाड़ा

412- कपड़ा लत्ता के ये प्रान। बिन येखर नइ राहय मान।।

रिंगी-चिंगी बहुते रंग। सुजी सूँत के राहय संग।।

-गुदाम

413- देख हरेली लइका जात। अंतस मा राहय मुस्कात।।

खाप बाँस बल्ली ला काट। रचरच रेंगय चिखला बाट।।

-गेड़ी

414- बबा घुमय ये धरके हाथ। बाहिर भाँठा जावय साथ।।

मारै खेदय कुकुर भगाय। येखर ले बलकर हो जाय।।

-गोटानी

415- जब-जब बहुते जाड़ जनाय। सब ला येखर सुरता आय।।

माटी, भूसी डार बनाय। छेना, चिलफा ला सिपचाय।।

-गोरसी

416- बाग-बगीचा उधम मचाय। कोंवर-कोंवर पान खाय।।

मुँहुँ ऊपर दू मेछा लाम। खोल पीठ मा, देवय झाम।।

-घोंघी

417- आगी अँगरा जोर उठाय। हाथ जरे ले हमर बचाय।।

रँधनी खोली येखर धाम। चटचट बाजय, का हे नाम।।

-चिमटा

418- चाँउर चिक्कन घोर पिसान। धनिया, मिरचा, नून मिलान।।

जुरमिल जावँय सब परिवार। चटनी संगे खावँय यार।।

-चीला

419- चिक्कन पीसै तिंवरा दार। लाम गोलवा हे आकार।।

बनथे तीजा-पोरा संग। बहुत मिठावै ललहूँ रंग।।

-ठेठरी

420- जमे ठेठरी जोड़ी जान। रहै खसर्रा गहूँ पिसान।।

तिली, खोपरा येमा डार। स्वाद भरे गुरतुर भरमार।

-खुरमी

421- चिक्कन चाँउर घोर पिसान। सादा सोंहारी तैं जान।।

छत्तीसगढ़ी के पहिचान। खावव गुड़ या डार अथान।।

-चौसेला

422- उरिद दार के बनथे जान। गजब स्वाद येमा हे मान।।

पीठी, धनिया, मिरचा डार। माँग-माँग के खावव यार।।

-बरा

423- बदे बरा के संग मितान। चुरै तेलई गहूँ पिसान।।

चौकी बेलन चपकन आज। खावँय सुग्घर सबो समाज।।

-सोंहारी

424- अंड़ी पाना मा लपटाय। मोट्ठा रोटी इही कहाय।।

चटनी येखर स्वाद बढ़ाय। अमित पान रोटी कहलाय।।

-अंगाकर

425- कनकी के लव सान पिसान। झाँझी संगे भाँप दिखान।।

जीरा तिल मा भूँज बघार। नून डारदव स्वाद अपार।।

-फरा

426- दरदरहा चाँउर ला सान। मीठ चाशनी येखर प्रान।।

देशी रसगुल्ला ये आय। चाँट-चाँट अँगरी ला खाय।।

-देहरौरी

427- फरा मितानी येखर जान। बनथे चाँउर, गहूँ पिसान।।

पातर हलुवा इही कहाय। गुरतुर गुरहा स्वाद बताय।।

-पकुवा

428- चिक्कन चाँउर, गहूँ पिसान। खूब आँच के ये पकवान।।

मीठ चाशनी गुड़ मा डार। गवन पठौनी जोरन सार।।

-पपची

429- छत्तीसगढ़ी गुझिया ताय। सूजी, शक्कर, घी भूँजाय।।

साँचा भरके तेल तराय। तीजा-पोरा घर-घर छाय।।

-कुसली

430- भिगो कूट चाँउर ला खास। सबले सुग्घर स्वाद मिठास।।

पाग चाशनी गुड़ मा डार। खच्चित बनथे, बड़े तिहार।।

-अरसा

431- मैदा या तो गहूँ पिसान। मीठ चाशनी संग मिलान।।

मिलै पान के बीड़ा जान। गजब मिठाई येला मान।।

-पिड़िया

432- चिक्कन चाँउर डार पिसान। होय फरा ले बड़का जान।।

मुठा चपकके रोट बनाय। मिरचा, धनिया स्वाद बढ़ाय।।

-मुठिया

433- खेत किसानी के शुरुआत। शुभ दिन भाँवर ले ले सात।।

पुतरा-पुतरी होय बिहाव। मया-दया के अमित हियाव।।

-अकती

434- सावन मा धरती हरियाय। ये तिहार ला तभे मनाय।।

नाँगर बख्खर धोय मढ़ाय। लइका गेड़ी पाँव मढ़ाय।।

-हरेली

435- अनदाता हा धान उगाय। सबझन येमा हिस्सा पाय।।

पूस महीना पबरित आय। छेरिक छेरा खूब सुनाय।।

-छेरछेरा

436- मइके के हे मया अपार। भादो के ये हरय तिहार।।

सबो सुहागिन रहैं उपास। करू करेला येमा खास।।

-तीजा

437- जाँता, चुकिया, बइला लाँय। इँखरे पूजा, भोग लगाँय।।

संगीमन भाँठा सकलाँय। खेलकूद पोरा पटकाँय।।

-पोरा

438- नवा बछर ये हमर कहाय। चइत महीना येहा आय।।

जोत जँवारा जश ला गाँय।। माता सेवा मान बढाँय।।

-चइत नवरात्रि

439- चइत अँजोरी ये दिन आय। राम जनम के बात बताय।।

देवलगन शुभ बेरा मान। बर बिहाव हा बहुते जान।।

-रामनवमीं

440- भादो अँधियारी के पाख। जनम कृष्ण के सुरता राख।।

आठे के दिन होवय खास। लइका मन बड़ रहँय उपास।।

-आठे कन्हैया

441- महतारी के त्याग महान। लइका बर माँगै वरदान।।

नाँगर जोते उपज न खाय। सगरी काशी फूल सजाय।।

-कमरछठ

442- कँड़रा घर के टुकनी लान। आवा माटी गहूँ उगान।।

देवी गंगा गीत सुनाय। तरिया, नँदिया मा बिसराय।।

-भोजली

443- मया पिरित बँधना परिवार। भाई बिहनी गजब दुलार।।

सावन पुन्नी के दिन आय। मुरुवा रक्षा सूँत बँधाय।।

-राखी तिहार

444- फागुन मा बड़ फाग सुनाय। मया पिरित आगी भड़काय।।

होले लकड़ी संग जलाय। रिंगी-चिंगी रंग उड़ाय।।

-होरी

445- कातिक महिना खुशी बलाय। लक्ष्मी दाई सबो मनाय।

फोर फटाका संगी जोर। दीया बारैं ओरी-ओर।।

-देवारी

446- तुलसी चौंरा नँगत सजाय। पूजा करके देव जगाय।।

दाई-बहिनी रहँय उपास। खावँय कठई ये दिन खास।।

-जेठउनी

447- सबो सुहागिन के पहिचान। माथा बइठे बनके मान।।

रिंगी-चिंगी चमकै रंग। लाम गोलवा बहुते ढ़ंग।।

-टिकली

448- गोल-गोल ये काँच समान। हवय बिहाता के पहिचान।।

दुनों हाथ मा पहिरे जोर। खनखन खनखन करथे शोर।।

-चूरी

449- कुआँ पार दू बल्ली गाड़। पानी टेंड़ँय बाँधँय बाड़।।

बारी बखरी पारे पार। पानी बहकय टारे टार।।

-टेंड़ा

450- अपने बारी तक ये जाय। बुड़गा बइगा मुँड़ी हलाय।।

देखत बैरी बदलै रंग। रहि जाथन हम देखत दंग।।

-टेटका

451- दूनों कोती रेंगत जाय। लहू चूहकय मुँह चटकाय।।

तन येखर गुजगुजहा खास। तरिया डबरी करय निवास।।

-जोंख

452- लाली भुरुवा होथे रंग। रहिथे खटिया, दसना संग।।

लहू चूहकय, जेवन पाय। परजीवी ये जीव कहाय।।

-ढ़ेंकना

453- धरती मा ये हे भगवान। देवय हम ला जीवनदान।।

नौ महिमा ले बोहय भार। देवय ममता मया दुलार।।

-महतारी

454- महतारी के जोंड़ीदार। पोसय पालय घर परिवार।।

जबतक रहिथे येखर संग। नइ होवय काँही के तंग।।

-बाप

455- बाप ददा के बहिनी जान। दया-मया के इही खदान।।

बर बिहाव मा पहिली नाम। नेंग-जोख हा इँखरे काम।।

- फूफु

456- हमर फूफु के राहय संग। येखर अलगे दिखथे ढ़ंग।।

बर बिहाव मा बहुते मान। बिकट पदोना कस इंसान।।

-फूफा

457- बाप ददा के भाई जान। लइकामन के सखा सियान।।

होय दुलरवा घर मा छोट। सुघर नियत नइ राखै खोट।।

-कका

458- इही कका के जोड़ीदार। लइकामन ला करय दुलार।।

महतारी के हाथ बँटाय। बहू छोटकी इही कहाय।।

-काकी

459- अपन बाप के वंश बढ़ाय। महतारी ले मया गढ़ाय।।

घर के होवय नंबरदार। अपन ठाँव के राजकुमार।।

-बेटा

460- पढ़े-लिखे मा बड़ हुशियार। बुता-काम मा तुरत तियार।।

दू कुल के ये मान बढ़ाय। ददा दुलौरिन नीक कहाय।।

-बेटी

461- पुरखौती ये बात बताय। नाती पंथी संग सहाय।।

घर के होथे बड़े सियान। येखर संगत मिलथे ज्ञान।।

-बबा

462- कथा, कंथली नँगत सुनाय। गुनी सियानिन इही कहाय।।

नाती पंथी ला पोटार। बाँटय अंतस मया अपार।।

-बूढ़ीदाई

463- होवय हमरे बाप समान। सुग्घर सबके राखय ध्यान।।

जइसे सतजुग राजा राम। वइसे कलजुग येखर काम।।

-भइया

464- महतारी कस अँचरा जान। समझै हम ला कहाँ बिरान।।

सीता मइया जइसे काम। येखर कोरा पाँव अराम।।

-भउजी

465- महतारी के जइसे ताय। दुरिहा रहिके नता निभाय।।

बोलय बाबू सारी मोर। मैं मयारु भाँटो हँव तोर।।

-मोसी

466- मोसी के ये जोड़ीदार। गजब लुटावै मया दुलार।।

हमर बाप के साढू ताय। तुरत बतावव कहिथौ काय।।

-मोसा

467- महतारी के भाई आय। बाबू के सारा कहलाय।।

परथे आके हमरो पाँव।। रहिथे येहा अपने ठाँव।।

-ममा

468- ममा सुवारी सुघर कहाय। पाँव परै अउ पुण्य कमाय।।

लइका येखर कहाँ बिरान। भाई बहिनी येला जान।।

-मामी

469- होय नता मा येहू खास। संग ससुर के राहै पास।।

घरवाली के दाई लाग। मया-दया के घोरय पाग।।

-सास

470- मोर सुवारी के ये बाप। बाबू संगे खावय खाप।।

लइका नाना कहै पुकार। नँगत लुटावै मया दुलार।।

-ससुर

471- घरवाली के भाई ताय। लइकामन के ममा कहाय।।

भाँटो के ये जोंड़ीदार। कोनो सकय न येला टार।।

-सारा

472- गोसईन के बहिनी जान। बेटी जइसे येला मान।।

भाँटो खातिर मया अपार। येखर बिन सुन्ना ससुरार।।

-सारी

473- रहिथे बादर के ओ पार। सूरुज चंदा के घर द्वार।।

दिखथे नीला-नीला रंग। लगथे जइसे हावय संग।।

-अगास

474- जम्मों प्रानी करँय निवास। सौर जगत मा सबले खास।।

पुरवाही पानी भरमार। महतारी कहि करन दुलार।।

-धरती

475- लकलक-लकलक बरते जाय। लाली करिया लपट उठाय।।

येखर ताकत सबो डराय। जेला पावय राख बनाय।।

-आगी

476- जिनगी खातिर अमरित मान। जीव जगत के बसथे प्रान।।

भाप, बरफ येहा बन जाय। ऊपर ले खाल्हे बोहाय।।

-पानी

477- धरती के ये संग सहाय। ढेला, फुतका जघा कहाय।।

दुनिया भर ला ये उपजाय। आखिर अपने संग मिलाय।।

-माटी

478- माटी के ये होथे अंग। मइलाहा, भुरुवा हे रंग।।

पौधा पोषक नँगते पाय।। रेती चिक्कन संग समाय।।

-मटासी

479- सबसे जादा ये दिख जाय। पानी सोंखय उपज बढ़ाय।।

गहूँ, चना, कपसा ला भाय। माटी करिया इही कहाय।।

-कन्हार

480- खन के भुँइया येला पाव। सादा-सादा रंग सुभाव।।

आय लिपे के येहा काम। संगी बोलव का हे नाम।।

-छुही

481- येखर होथे बड़े खदान। सादा पखरा येला जान।।

लिपना, खाना, दवा बनाय। पानी डबकै, हाथ जलाय।।

-चूना

482- माटी ललहूँ येला जान। फसल उपज कमती तैं मान।।

गोंटी जइसे बड़ दलगीर। बनै ठोसलग भवन कुटीर।।

-मुरुम

483- खेत खार के उपजै मेड़। नान्हें लमरी होथे पेड़।।

फर भीतर दाना छै चार। खा ले औंधी, बटकर दार।।

-राहेर

484- खेत उतेरा बीज छिंचाय। लुसलुस भाजी मन ला भाय।।

फल्ली बटकर गजब मिठाय। येखर सुकसा सुघर सुहाय।।

-तिंवरा

485- रबी फसल के मान बढ़ाय। सबो दार के राजा ताय।।

भाजी, होरा येखर खान। होय गुलाबी, खैरी जान।।

-चना

486- पिस पिसान येखर सब खाँय। रोटी कोंवर बड़ पोवाँय।।

बाली, भुरुवा मेछा सार। चारा बनथे पाना, डार।।

-गहूँ

487- हवय दार बहुते गुणकार। नान्हें पौधा लामे नार।।

हरियर खातू इही कहाय। बरी बरा बड़ येखर खाय।।

-उरिद

488- चिटिक समय ये फर जाय। येखर फल्ली, साग सुहाय।।

दार, मुँगेड़ी गजब मिठाय। जरई आये बीज खवाय।।

-मूँग

489- सब कहिथें ये लाली दार। खतम करे ये पेट विकार।।

धनिया पाना जइसे पान। बनै मिठाई, झट पहिचान।।

-मसूर

490- कहिथे येला खरपतवार। हरय गरिबहामन के दार।।

बीज चेपटी करिया रंग। मिलय गहूँ के येहर संग।

-अँकरी

491- करिया-करिया येखर पान। भात गरिबहा के ये जान।

सुगर दवा ये गजब कमाल। चाब पान होथे मुँहुँ लाल।।

-कोदो

492- नान्हें-नान्हें दाना जान। दार सस्तिहा येला मान।।

कोनो ना येला उपजाँय। गरुवामन ला घलो खवाँय।।

-जिल्लो

493- हरियर घर मा हरियर माल। बटकर जइसे साग कमाल।।

सुक्खा मा ये बनथे दार। कच्चा मा हे चरबन सार।।

-बटुरा

494- चाहे चपड़ा कहि दे यार। होवय कीरा रुख के सार।।

चूरी खेलौना सिरजाय। टूटे-फूटे ला चटकाय।।

-लाख

495- हरियर सोना इही कहाय। पाना के बीड़ी लपटाय।।

वनवासी मा लेवँय टोर। पइसा पावँय राखँय जोर।।

-तेंदू पान

496- छोटे बोंइर इही कहाय। अम्मट गुरतुर नीक सुहाय।।

जंगल के हे ये फर खास। गरमी मा तन भरय हुलास।।

-चार

497- खास पेड़ ले रस चुचुवाय। चिपरा जइसे डार छबाय।।

चिपचिपहा ये जिनिस कहाय। भुरवा, सादा, ये चटकाय।।

-लासा

498- चिपचिपहा पर गजब मिठास। ये मछेर के बहुते खास।।

फुलुवामन के रस सकलाय। संगी बोलव काय कहाय।।

-मधुरस

499- लइकामन हा लाय सकेल। हाथ-गोड़ मा पहिरै खेल।।

करिया बीजा, सादा खोल। नून-तेल येखर हे मोल।।

-बंभरी बीजा

500- पोनी के फर येला जान। नान्हें पौधा तैं पहचान।।

मुसुवा लेड़ी बीजा होय। करिया माटी येला बोय।।

-कपसा

501- चाय साग मा स्वाद बढ़ाय। भुँइयाँ भीतर ये उपजाय।।

औखद येहा बड़ गुणकार। चुरपुरहा, भुरवा रसदार।।

-आदा

502- पींयर-पींयर येखर गाँठ। होवय येहा बहुते टाँठ।।

साग-दार के रंग बढ़ाय। बड़ गुणकारी रोग भगाय।।

-हरदी

503- सलगा, डुबकी कढ़ी कहाय। उरिद दार ला फेंट बनाय।।

रतिहा भर के भींजे दार। डबकत चुरथे अमसुर झार।।

-बफौरी

504- गुरहा चीला इही कहाय। गुड़, पिसान अउ गहूँ मिलाय।।

सुग्घर येखर भोग चढ़ाँय। नवाखाय मा सबो बनाँय।।

-बोबरा

505- दूध डार चाँउर डबकाँय। बहुत स्वाद चाँटत सब खाँय।।

लौंग, लायची, काजू डार। खावँय मनखे पलथी मार।।

-तसमई

506- येखर हे अलगे पहिचान। फोरँय लाई डारँय धान।।

कठई रस के पागे डार। मेला-मड़ई मा भरमार।।

-ओखरा

507- नान्हें पंखा हाथ घुमाय। बाँस चीर कँड़रा सिरजाय।।

एती-ओती धर के जाव। लागै गरमी धरव हलाव।।

-बिजना

508- बनै बाँस के सींका सार। होय गोलवा चाकर मार।।

बर बिहाव मा भारी माँग। बरी सुखो ले छानी टाँग।।

-पर्रा

509- बनै बाँस के सींका डार। थोरिक चाकर उठे दिवार।।

धान-गहूँ चाँउर सब छीन। गोंटी माटी येमा बीन।।

-सूपा

510- गोल टोकरी ढक्कन संग। बनै बाँस के सींका रंग।।

बर बिहाव के पेटी जान। सोंच समझ झट पहिचान।

-झाँपी

511- झलझलहा टुकनी तैं मान। बनै बाँस सींका ला तान।।

धोवँय कोदो कनकी दार। निकलै कचरा बाहिर पार।।

-झेंझरी

512- कचरा, काड़ी जोर जमाँय। मुँड़ मा बोहे घुरुवा जाँय।।

बाँस खपच्ची ले तैयार। गोल गहिर चाकर ये सार।।

-झँउहा

513- बनै बाँस के सींका सीक। गिल्ला जीनिस सेंकय नीक।।

बाँस खपच्ची, चद्दर जान। आगी ऊपर भूँज समान।

-झाँझी

514- दाई-माई के मन भार। पाँच-हाथ के लत्ता सार।।

अँचरा ओली येमा जान। संगी तुरते तैं पहिचान।।

-लुगरा

515- कनिहा खाल्हे पहिरे जाय। गोल घाघरा जइसे ताय।।

सिलवाथें सब घेरादार। सबले पहिली नारा डार।।

-साया

516- जइसे लुगरा तइसे रंग। कपड़ा मिलथे लुगरा संग।

छाती ढाँकय लत्ता सार। लुगरा के ये जोड़ीदार।।

-पोलखा

517-फूल मोंगरा रहै गुँथाय। महर-महर बहुते ममहाय।।

बेनी खोपा मा खोंचाय। अपने जोड़ी खूब लुहाय।।

-गजरा

518- कोर गाँथ बेनी लटकाय। रिंगी-चिंगी ये लपटाय।।

होथे पातर, चाकर, लाम। बेनी संगे जुड़थे नाम।।

-फीता

519- पातर पट्टी, लोहा टीन। आनी-बानी हे रंगीन।।

चपकै चुन्दी, राखय दाब। वोमा खोंचे एक गुलाब।।

-किलिप

520- बगरे चुन्दी दाँत दबाय। खुल्ला बेनी बड़ सुहाय।।

प्लास्टिक, लकड़ी बनथे जान। दाँता जइसे सिरतों मान।।

-बक्कल

521- टिकली जइसे रहिथे गोल। गिल्ला, गाढ़ा रंगे घोल।।

खाली माथा सुघर सजाय। रिंगी-चिंगी चिन्ह बनाय।।

-बिन्दी

522- लाली नारंगी हे रंग। भरै माँग माथा के संग।।

सुक्खा, गिल्ला मिलथे जान। हरै सुहागिन के पहिचान।।

-सेंदूर

523- लौंग सोनहा नाके डार। फभथे येहा चुक चकदार।।

फँसय पेंच हा खाल्हे जाय। गहना छल्ला, नाक कहाय।।

-फुल्ली

524- पहिरै येला डेरी पार। फभै नाक बहुते नथदार।

रिंग गोल ये पातर जान। अमित नाक के लटकन मान।।

-नथली

525- करणफूल येला तैं जान। सोना, चाँदी येला मान।।

चटके रहिथे येहा कान।। कान सवाँगा हे, पहिचान।।

-खिनवा

526- रहिथे लटकत येहा कान। गजबे हावय येखर शान।।

दिखै सोनहा झूलनदार। छोट-बड़े फभथे आकार।।

-झुमका

527- रिंग गोलवा दिखथे सार। फभै कान मा लटकनदार।।

बाली के ये जोड़ीदार।। नाँव बतावव सोंच विचार।।

-बाला

528- चाँदी के सिक्का तैं मान। गुँथें रहै दस बारा जान।

करिया रेशम संगे पोह। नारी गर मा पहिरैं चोह।।

-रुपिया

529- सबले मँहगी गर के हार। संग लाख सोना ला डार।।

गोल-गोल माला कस मान। बढ़ै घेंच के बहुते शान।।

-सुर्रा

530- हरै सोनहा गर के हार। लगै छोटका रुपिया सार।।

बहुते मँहगी येला जान। गजबे फभथे सिरतों मान।।

-पुतरी

531- चाँदी माला निंधा सार। बहुते भारी गर के हार।।

बूढ़ी दाई फभथे घात। बर बिहाव मा येखर बात।।

-सूँता

532- फभै बाँह मा सुग्घर जान। नाग साँप जइसे पहिचान।।

चाँदी के हे गहना सार।। नाँव बतावव तुरते यार।।

-पहुँची

533- होय सोनहा, चाँदी सार। गोल रोंठहा पहिरै मार।।

फभै कलाई बहुते जान। काय हरै ये झट पहिचान।।

-कड़ा

534- चाँदी गहना नोंकीदार। चूरी संगे पहिरै डार।।

कंगन जइसे येला जान। सजै कलाई, तैं पहिचान।।

-ककनी

535- कंगन जइसे येला मान। हाथ कलाई पहिरै जान।

चाँदी के ये गहना सार। अँइठे राहय दूनों पार।।

-अँइठी

536- सोना, चाँदी पिटवा मान। पातर सादा चूरी जान।।

पहिरै जादा खाली हाथ। जेखर सुन्ना राहय माथ।।

-पाटला

537- कनिहा के हे गहना खास। रहिथे सब ला येखर आस।।

चाँदी गहना सबो सधाय। कनिहा मा धन बँधे कहाय।।

-करधन

538- सजै पाँव के अँगरी मान। चाँदी के गहना हे जान।।

येखर होथे तभे हियाव। होवय नोनी जभे बिहाव।।

-बिछिया

539- बिछिया जइसे दिखथे ढंग। चाँदी उज्जर चुकचुक रंग।।

पहिर पाँव के अँगरी डार। सोज्झे सादा चाँदी तार।।

-चुटकी

540- खुनखुन बाजै, पहिरै गोड़। नोनीमन बर हे बेजोड़।।

चाँदी के गहना तैं मान। बाजत घुँघरू छुनछुन जान।।

-पैजन

541- सबले बढिया, सबले सार। फभै पाँव हा जोरेदार।।

पातर-चाकर पहिरे जाय। चाँदी गहना बहुते भाय।।

-साँटी

542- पैरी, साँटी जइसे जान। थोरिक अलगे येखर शान।

फिट बइठै ये दूनों पाँव। चाँदी गहना, का हे नाँव।।

-लच्छा

543- पाँवे पहिरे जाथे जान। बड़ गरु गहना येला मान।।

भले पाँव जावय छोलाय।। बड़हर अपने आप बताय।।

-टोंड़ा

544- कनिहा मा हे लटकाय। चाँदी के गहना ये आय।।

संग कुची येमा खोंचाय। नारी मन ला नँगते भाय।।

-कुचीखोंचनी

545- चाँदी सोना जानव सार। पहिरै अँगरी मा ये डार।

कोनो रहिथें नँग जड़वाय। कोनो जोंही नाँव लिखाय।।

-मुँदरी

546- चाँदी, सोना गहना ताय। मुँदरी जइसे बहुते भाय।

रहिथे सादा सोज सपाट। सुघराई मा नइ हे काट।।

-छल्ला

547- घोरै लाली लाली रंग। भावै अपने अँगरी संग।

धीर लगा के पाँव रचाय। तरपौरी हिलु देख मड़ाय।।

-माहुर

548- शीशी मा ये घोरे आय। माहुर जइसे गजब सुहाय।

लागै येहा पोनी संग। सजै गोड़ हा ललहूँ रंग।

-आलता

549- अजर-अमर गहना कहलाय। सरी देंह येला गोदाय।।

करिया हरियर लगथे रंग। चिन्हा जावय मरनी संग।।

-गोदना

550- कुटका कपड़ा के हे सार। धरथें बबुआ खीसा डार।।

चार कोनिया हे पहिचान। मुँहुँ पोछव अउ बाँधव कान।।

-उरमाल

551- पहिरैं सादा सार लिबास। लत्ता पूजा पाठ म खास।।

अलग-अलग पहिरे के ढंग। रहिथे उज्जर सादा रंग।।

-धोती

552- छोटे धोती येला जान। रहै खाँध मा बइठे मान।।

आवय पोंछे के ये काम। कान बाँध जब होवय घाम।।

-पटका

553- बिन अस्तिन के कुरता जान। सोज्झे सादा हे पहिचान।।

काम बुता मा पहिरे जाय। बड़ अराम येखर ले पाय।।

-बंडी

554- अंगरखा ये काट सिलाय। पीठ-पेट छाती तोपाय।।

अस्तिन, खीसा, बाँही खास। राहय येहा सबके पास।।

-कुरता

555- मुँड़ मा ये बइठे जाय। जाड़, घाम ले मुँड़ी बचाय।

फेशन मा ये बहुते भाय। संगी बोलव काय कहाय।।

-टोपी

556- बनथे कोनो समय विशेष। पहिरै तब्भे उँचहा भेष।।

कुरता ऊपर जँचथे शान। बड़हर के हे ये पहिचान।।

-कोट

557- दुनों गोड़ ला देवँय डार। दू मोरी कस लत्ता सार।

कनिहा खाल्हे पहिरे जाय। नारा बाँधय तभे कसाय।।

-पैजामा

558- नवा जमाना लत्ता जान। पैजामा कस येला मान।।

नारा बदला चैन लगाय। अपने फेशन मा रंगाय।।

-पेंट

559- लामी लामा फेटा डार। मुँड़ के ये हे रखवार।।

रिंगी-चिंगी हे पहिचान। मनखे के ये होथे मान।।

-पागा

560- आँखी रक्षा येखर भार। काँच, फायबर, प्लास्टिक सार।

फुतका, कचरा, घाम बचाय। जौने येला नाक चढ़ाय।।

-चश्मा

561- कनिहा पट्टी इही कहाय। पेंट कसे मा रहै सहाय।।

रेगजीन, चमड़ा पहिचान। पेंट संग मा बाढ़य शान।।

-बेल्ट

562- बाढ़य जब हमरो बड़ ठाठ।नवा-नवा घर पूजा पाठ।।

चउँर पिसाने हाथ डुबाय। घर भिथिया मा छाप बनाय।।

-हाँथा

563- ऊँच पेड़ के फर ये जान। भुरवा, पींयर हे पहिचान।।

गोल, लाम फर डाँड़ी पाँच। बड़का औखद, खाले खाँच।।

-हर्रा

564- हर्रा के हे संगत जान। होथे फर अण्डा कस मान।।

फर के छाली आथे काम। कोन बताहू, झटपट नाम।।

-बहेरा

565- साग खाय खातिर ये आय। रहिथे चाकर पी ले चाय।।

चीनी, माटी मलिया मान। रिंगी-चिंगी सुग्घर जान।।

-सासर

566- रहिथे लकड़ी डाँड़ी सार। खाल्हे चकरी हे छै चार।।

दार मथे के आवय काम।। रँधनी घर मा करय अराम।।

-दरघोटनी

567- पीतल, काँसा, तांबा सार। दूध-दही, पानी ला डार।।

छोट गोलवा मुँहुँ देखाय। पेंदी बिन, पेंदी के आय।।

-लोटा

568- छोट कटोरी येला मान। होय गोलवा चाकर जान।।

ताँबा, पीतल, माटी सार। साग-दार ला देवँय डार।।

-मलिया

569- गगरी, मरकी येला मान। बनथे पीतल तेला जान।।

पनिहारिन पानी भर लाय। सुग्घर सबके प्यास बुताय।।

-हँउला

570- पीतल हँउली बड़का होय। बोह सकै ना येला कोय।।

धन दोगानी मानय सार। भरै रहै बड़ चाँउर दार।।

-हंडा

571- पखरा के कुटका आय। टाँच खसर्रा पोठ बनाय।

पीस-पीस येमा सब खाय। देशी मिक्सी इही कहाय।।

-सील

572- सील संग येखर पहिचान। लागय जइसे बदे मितान।।

येखर बिन ना एक पिसाय। लाम गोलवा पखरा ताय।।

-लोढ़हा

573- मंजूर पाँख गुँथ पहिराय। राउत भइया बछरू गाय।।

सोहय सुग्घर मन ला भाय। अपन मवेशी अलग चिन्हाय।।

-सोहई

574- झीन, बाँस, प्लास्टिक गुँथियाय।  चाकर पातर लाम बिछाय।।

रिंगी-चिंगी आथे आज। मान बिछावन, नइ हे लाज।।

-सरकी

575- ले पिसान ला देवँय सान। गोल-गोल गिल्ला ला चान।

इही गोल रोटी बेलाय। संगी बोलव काय कहाय।।

-लोई

576- दाई दुहना दूध जमाय। थोरिक जामन देत मिलाय।

ले सकेल के मही बिलोय। तभे इही हा सकला होय।।

-लेवना

577- कूट पीस अमली ला लान। चुरपुर मिरचा नून मिलान।।

अमसुरहा बड़ चाँटन खान। झन कहिहौ नइ नाँव बतान।।

-लाटा

578- घर कुरिया के ऊपर ताय। कमचिल, खपरा बिकट छवाय।।

सावन के पहिली लहुटाँय। येखर खाल्हे दिन पहुवाँय।।

-छानी

579- ईंटा, पखरा, माटी सार। घर कुरिया के ये आधार।

छानी ला ये लेवय थाम। छेंका करना येखर काम।।

-भिथिया

580- घर कुरिया मा रहै दिवार। जेला भिथिया कहिथन यार।।

जघा छोड़ के जघा बनाय। इही जघा मा जिनिस अमाय।।

-पठेरा

581- गाड़ा बइला इहाँ चलाय। सटा-सटा बड़ मार भगाय।

नान्हें लउठी, डोरी चाम। आथे ये खेदे के काम।।

-कोर्रा

582- गड़हा गाड़ी खूब भगाय। अर्र तता ता, बोल सुनाय।।

एक कोर खीला ठोंकाय। ये लउठी हा काय कहाय।।

-तुतारी

583- लाम बाँस बल्ली ला डार।  झींक-तान के बाँधँय तार।।

गिल्ला लत्ता इहाँ सुखोय। हर घर मा खच्चित होय।।

-डंगनी

584- इही डहर ले निकलत आय। बड़े फजर सूरुज ललियाय।।

रोज उवय बेरा बन छाय। इही दिशा सब जल चढ़हाय।।

-उत्ती

585- दिनभर सूरुज रेंगत जाय। घूमत-घामत बेर पहाय।।

इही दिशा मा संझा आय। उत्ती के ये उलट कहाय।।

-बुड़ती

586- इही दिशा हे यम के द्वार। रहिथें रक्सा डेरा डार।।

अइसन कहिथें मनखे यार। कोन दिशा ये करव विचार।।

-रक्सेल

587- इही दिशा मा रहय कुबेर। करय न कखरो करा अँधेर।।

धन दौलत सुख के भंडार। कोन दिशा हे बोलव यार।।

-भंडार

588- बर पीपर के राहय छाँव। एक ठौर ये होवय गाँव।।

जिहाँ सबो मनखे जुरियाँय। बइठ इहाँ झंझट निपटाँय।।

-गुड़ी

589- बरसाती कीरा ये मान। दूनों कोती मुँहुँ हे जान।।

माटी, गोबर, कचरा खाय। खा-खा खातू खूब बनाय।।

-गेंगरवा

590- पाँखी हे पर तँउरे जाय। दिनभर पानी बीच पहाय।।

सादा पंछी मछरी खाय। चोंच, पाँव राहय ललियाय।।

-बदक

591- भुँइया, पानी मा रहि जाय। माढ़े लकड़ी कस पटियाय।।

दाँत जबरहा बड़का खोल। देखत मा मन काँपय झोल।।

-मँगरा

592- अपन खोंधरा गजब बनाय। दरजी चिरई इही कहाय।।

येखर घर ला देखन भाय। सीख कहाँ ले येहा आय।।

-बया

593- लगै परेवा के परिवार। पर येखर नान्हें आकार।

सिधवा येला पंछी जान। रहै खोंधरा उँचहा स्थान।।

-पँड़की

594- मिट्ठू जइसे बोलय बोल। मनखे जाथे देखत डोल।।

भुरुवा, करिया होवय रंग। करथे मन के, राखव संग।।

-मैना

595- पाँखी रहिके दँउड़े जाय। येला उड़ई कमती भाय।।

रहै गोरिया, भुरवा मान। खेत-खार मा बहुते जान।।

-तितुर

596- पनिहा चिरई इही कहाय। पानी मा ये समय बिताय।।

खोज-खोज मछरी ला खाय। पानी ऊपर नाचत जाय।।

-पनबुड़ी

597- रतिहा जागय दिने उँघाय। उल्टा लटके समय पहाय।।

बड़े-बड़े दू होथे कान। बच्चा देथे सीधा जान।।

-चमगेदरी

598- दिनभर येहा सुते बिताय। रतिहाकुन आँखी बर जाय।।

मुसुवा येला बहुते भाय।। घरखुसरा इही कहाय।।

-घुघवा

599- घर के भीतर येखर ठाँव। रेंगय भिथिया चटकै पाँव।।

माछी, मच्छर गप-गप खाय। कटे पुछी पाछू उग जाय।।

-घररक्खा

600- कुकुर जंगली इही कहाय। बहुते ताकत भुजा समाय।।

जबर शिकारी येला जान। बड़े-बड़े के हरथे प्रान।।

-हुड़रा

 

601- करिया, भुरुवा आँखी लाल। करथे येखर चोंच कमाल।।
ठक-ठक लकड़ी चोंच गड़ाय। निकलय कीरा पकड़य खाय।।
-कठखोलवा

602- हरियर, पींयर, करिया रंग। करथे किरवा बड़ उतलंग।।
दूर देश ले उड़ के आय। नान्हें पौधा चट कर जाय।।
-कनकट्टा

603- घररक्खा कस दिखथे यार। करिया सादा चिक्कन सार।।
इही साँप के मोसी ताय। बारी-बखरी दँउड़ लगाय।।
-घिरिया

604- घररक्खा ले बड़का जान। होय भोरहा मँगरा मान।।
जीभ साँप जइसे फँकियाय। भिथिया, छानी झट चढ़ जाय।।
-गोंइहा

605- फर चिरपोटी नाने-नान। कटही डारा पाना जान।
फुलुवा नीला, पींयर रंग। येखर सेवन भरै उमंग।।
-भसकटिया

606- भुँइयाँ भीतर फरथे यार। बाहिर छछले बहुते नार।
फर मा गजबे गुदा भराय। गुरतुर येहा गजब मिठाय।।
-कांदा

607- अँगना, बखरी छछलै नार। सावन-भादो मा भरमार।।
संझा फूलय पींयर फूल। लाम, खसर्रा फरथे झूल।।
-तरोई

608- इही तरोई चिक्कन ताय। कच्चा फर ला खाय बिसाय।।
पक्का फर ले रगड़ नहाय।। भरे विटामिन, सुघर सुहाय।।
-ड़ोड़का

609- फुलुवा पँड़रा फूले नार। लाम-लाम फर के भरमार।।
कच्चा हरियर, सादा रंग। पक्का बंदन, ललहू संग।।
-कुंदरु

610- फरै गोलवा फर दमदार। छछलै सादा फुलवा नार।
बर्तन, बाजा सुखो बनाय। कच्चा फर के साग सुहाय।।
-तुमा

611- लमरी-लमरी फरथे डार। हरै तुमा के ये परिवार।।
हरियर चिक्कन सादा ताय। चना दार के संग मिठाय।।
-लौकी

612- फरै पेड़ फर बड़का सार। हरियर, पींयर कटही मार।।
कच्चा फर के साग सुहाय। पक्का फर के कोवा खाय।।
कटहर

613- लाम, चेपटी, कोकी सार। फरथे बहुते छछलै नार।
आनी-आनी होथे रंग। बीज फोकला लगथे अंग।।
-सेमी

614- साग हरै ये फल्लीदार। फरथे बखरी, बारी नार।।
हरियर, करिया लामी लाम। बीज दार, फर खाये काम।।
-बरबट्टी

615- उपजै बखरी, खेती खार। लाम, खसर्रा फर भरमार।।
साग सुहावै आलू डार।। गरुवा खातिर चारा सार।।
-चुरचुटिया

616- कुँदरू जइसे छछलै नार। उपजै बखरी, नदी कछार।।
फर कुँदरू ले जादा मोठ। किच-किच बीजा करथे पोठ।।
-परवर

617- छोट करेला इही कहाय। कोंवर-कोंवर साग सुहाग।।
फर हा कटही रेशादार। भीतर कांदा, ऊपर नार।।
-खेखसी

618- छानी, परवा इही सजाय।। माटी साँचा डार बनाय।।
सुखो बनावय नालीदार। पाकय भट्टी मा दमदार।।
-खपरा

619- हरै बाहरी काड़ी सार। अँगना बाहिर दैय खरार।।
पातर-पातर चिलपा बाँस। खरहारँय सुग्घर सब हाँस।।
खरेरा

620- लोहा कुटका जानव सार। माथा संगे चोक्खू धार।।
गाड़य भिथिया ठोंकत माथ। रहै सदा बढ़ई के साथ।।
-खीला

621- उपराहा तरकारी जान। पौल उसन या काट सुखान।।
जे दिन हरियर साग न पाँय। सुघर राँध के येला खाँय।।
-खोइला

622- छेना हथवा चाकर ताय। गाय गरू खुरखेद मचाय।।
सउघे छेना नो हे मान। कुटी-कुटी राहय, पहिचान।।
-खरसी

623- पानी नो हे, पर बोहाय। सादा हे, घर नइ पोताय।।
भँइस, गाय के थन तनियाय। जौन पियै तन पोठ बनाय।।
-गोरस

624- पीथें दुनिया काफी, चाय। इही पिये के बर्तन आय।।
बनथे माटी ले ये जान। लाल गोलवा हे पहिचान।।
-चुकी

625- मंगल कारज, जोत जलाय। लाली भाँड़ी लाय बिसाय।।
नाँदी ऊपर तेल भराय। पूजा मंदिर बउरे जाय।।
-करसा

626- छोटे खटिया येला जान। लइका सोवय येमा मान।।
कभू बइठ खुश होय सियान। गाँथे डोरी बहुते तान।।
-मचोली

627- तरी सकेला पेंदी जान।। ऊपर चाकर मुँहड़ा मान।।
छेना के आगी सुलगाँय। डार हूम घर भर देखाँय।।
-हुमाही

628- गोल-गोल चाकर ये सार। चारों मूँड़ा उठे दिवार।।
पीतल, काँसा, ताँबा, स्टील। जेवन खावँय, करै न ढील।।
-थारी

629- बिन पेंदी के बर्तन गोल। काँसा, पीतल के अनमोल।।
दार-भात राँधे के काम। पुरखौती ले चलथे नाम।।
-बटलोही

630- चाकर मुँहटा कलई मान। बड़का बर्तन येला जान।।
बड़े काम ला लेवय थाम। संगी बोलव येखर नाम।।
-बाँगा

631- अपने रहना बसना होय। लगै थकासी आवय सोय।।
ईंटा, पखरा, माटी सान। इँहचे घर परिवार बसान।।
-डेरा

632- रहिथे लकड़ी चकरी चार। छँड़िया के हुक लटके सार।।
पातर पटवा बाँक बराय। बड़ सुग्घर डोरी अँइठाय।।
-ढेरा

633- लामी लामा लकड़ी डार। पाछू कोती दू खुर सार।
पाँव पीठ मा जब मढ़हाय। बीच बाहना धान कुटाय।।
-ढेकी

634- पखरा के दू पाटा सार। राहँय सँघरा खीला डार।
मुँहुँ ले चाउँर, गहूँ खवाय। हाथ धरै सब गोल घुमाय।।
-जाँता

635- लकड़ी के ये गदा कहाय। सुग्घर चाँउर, दार छराय।।
मुँहुँ मा लोहा कड़ा लगाय। बीच बाहना जाय समाय।।
-मूसर

636- अँगना, परछी गड्ढ़ा खोल। ढ़ेकी मूसर बर ये गोल।।
पखरा, माटी खने बनाय। गड़ढ़ा मा निक धान कुटाय।।
-बाहना

637- बीच बियारा ला चतवार। पैर बगरथे जब कोठार।।
दस बारा बइला ला फाँद। धान मिसावै जोरे खाँद।।
दौंरी

638- लकड़ी, लोहा गोला सार। बइला जोरै डाँड़ी डार।।
मिसय धान ला गोल घुमाय। जानव जल्दी काय कहाय।।
-बेलन

639- लकड़ी, पाटा चीर लगाय। चार खुरा मा ये ठोंकाय।।
सुते बसे के आवय काम। जानव संगी येखर नाम।।
बाजबट

640- लोहा, चद्दर गोल कटाय। एक मुड़ा मा मूँठ धराय।।
आँच परे ये ललियाय। पो ले रोटी खूब मिठाय।।
-तावा

641- लोहा चाकर लाम कटाय। एक मुँड़ा मा बेंठ धराय।।
काड़ी, कचरा जोर उठाय। माटी मलबा टार हटाय।।
-रापा

642- भुँइया माटी खन के काट। खँचवा डिपरा देवय पाट।
रहै कुदारी ले बड़ जान। दुनों मुँड़ा ले खन्ती खान।।
-गैंती

643- माटी, पैरा, कुटी मिलाय। मरकी पेंदी उलट छबाय।
सुक्खा मा गोबर लिपवाय। खरसी, आगी सुलगे जाय।।
-गोरसी

644- गगरी, हौला पेंदी गोल। एती-वोती जावै डोल।।
पैरा गुड़ुवा तरी लगाय। येखर ऊपर सबो मढ़ाय।।
गिरी

645- बेंठ हाथ भर, लोहा सार। बिकटे रहिथे येमा धार।।
छोले-चाँचे आवय काम। बसे रहै मुँहुँ ये खर नाम।।
-बसुला

646- लामी लामा छँड़िया ताय। लकड़ी फाटा बेधे जाय।।
अँइठे-गँइठे खाल्हे धार। बढ़ई के हे ये हथियार।।
-बिंधना

647- ऊपर पटनी काट बिछाय। खाल्हे दू ठन खुरा धराय।।
आवय पहुना दय बइठाय। रिंगी-चिंगी रंग रचाय।।
-पिड़वा

648- धान-पान हा इहाँ मिसाय। रहै बड़े भुँइया घेराय।।
राहय खरही इहाँ गँजाय। दौंरी, बेलन पैर मिसाय।।
-बियारा

649- इही बियारा बारी द्वार। लकड़ी लोहा बाँधे सार।।
आती-जाती परै हटाय। चारों मूँड़ा रहै घेराय।।
-राचर

650- जभे बियारा धान मिसाय। बदरा, कचरा जाय उड़ाय।।
माटी छबना येला जान। रहै खोलखा, राहय धान।।
-कोठी

651- सिढ़िया खाल्हे ठौरे जान। राहय वो हा खाली स्थान।।
परे-डरे धरथें सामान।। तुरते येला तैं पहिचान।।
-गोड़ा

652- बड़हर के घर बहुते माल। राखय बाड़ा सबे सँभाल।
गरुवा के ये डेरा आय। माल मवेशी रात बिताय।।
-गोर्रा

653- घर अँगना मा जौन लगाय। खाँसी सरदी भागे जाय।
ऑक्सीजन बहुते बरसाय।। पाना फुलुवा डारव चाय।।
-तुलसी

654- होयव करु फर बीजा जान। पाना, डारा दवा खदान।।
पाके बीजा मीठ जनाय। तेल गुठलु के लैं पेराय।।
-लीम

655- डारा पाना दूध भराय। थाँघा धरती जरी जमाय।।
पेड़ खड़े राहय सौ साल। फरै गोलवा फर हा लाल।।
-बर

656- पातर झिल्ली पाना जान। बर के जइसे इहू महान।।
ऑक्सीजन के हे भंडार। फर पिकरी होवै रसदार।।
-पीपर

657- येखर पाना पतरी मान। पेड़ दिखै खड़भुसरा जान।।
फागुन लाली अँगरा फूल। पंथी जावय रद्दा भूल।।
-परसा

658- पाना दोना पतरी मान। झँउहा-झँउहा फर ला जान।।
सरी पेड़ हा आवय काम। संगी जानव येखर नाम।।
-मँउहा

659- झाड़ी जइसे रुखुवा जान। काँटा-खूँटी हे पहिचान।
फरै गोलवा फर रसदार। कच्चा पक्का खावँय यार।।
-लिमऊ

660- अमरैया मा करथे राज। अँगना बखरी होवय आज।।
मौरे जब ये कोयल गाय। पाना डारा पूजे जाय।।
-आमा

661- कोकी-कोकी फर हा सार। नान्हें पाना छावय डार।।
फर के भीतर भरे चिचोल। अमसुरहा हे येखर बोल।।
-अमली

662- हरियर पींयर फर हा गोल। अमरित जइसे ये अनमोल।।
अमसुर कस्सा स्वाद जनाय। सेहत सुग्घर देंह बनाय।।
-आँवरा

663- होय गोलवा भाजी पोठ। डारा रटहा, झनकर गोठ।।
फर ला लकड़ी काड़ी जान। इही आयरन अमित खदान।।
-मुनगा

664- कागज कुटका झन तैं जान। समाचार तैं मन के मान।।
मितवा जे राहय परदेश। ओखर लय-दय संदेश।।
-चिट्ठी

665- पहिरे रहिथे लत्ता लाल। खड़े रहै चौके चौपाल।।
मुँह ले खावै जौन खवाय। पेट चीर के धर ले जाय।।
-लेटर बाक्स

666- नान्हें पातर डोर लमाय। दूर देश के बात बताय।।
मुँहें दता अउ कान लगाव। हालचाल सब सुनव सुनाव।।
-टेलीफोन

667- घर बइठे सब दरस कराय। पिक्चर, नाचा, गीत सुहाय।।
समाचार, मनरंजन, ज्ञान। जादू बक्सा येला मान।।
-टेलीविजन

668- ज्ञान खजाना भरे अपार। बइठ जान अपने घर द्वार।।
गूगल बाबा होही भेंट। संसो सब्बो देही मेट।।
-कम्प्यूटर

669- खाकी वर्दी तन मा डार। आवय सबके अँगना द्वार।
झोला खाँधे ये लटकाय। सुख-दुख के पाती दे जाय।।
-डाकिया

670- परथे जब कोनो बीमार। सुजी दवा ले करय सुधार।।
राहय इन ला एखर ज्ञान। रोगी कहय इही भगवान।।
-डॉक्टर

671- लइकामन के संगी जान। बाँटय सब ला आखर ज्ञान।।
विद्यालय मा येखर राज। बहुते देवय मान समाज।।
-मास्टर

672- सड़क, मॉल, घर, पुलिया, बाँध। नक्शा खिंचई येखर खाँध।।
दे दिमाग सब ला समझाय। कइसे बनही, बात बताय।।
-इंजीनियर

673- वरदी खाकी बड़ दमदार। जान-माल के हें रखवार।
अपराधीमन अउ अपराध। इँखर बुतावै येमन साध।।
-पुलिस

674- पहिरै सुग्घर करिया कोट। सहै नहीं ये न्यायी चोट।।
गोठकार बड़ इन ला जान। ज्ञान कानूनी बहुते मान।।
-वकील

675- कथा, कहानी रचनाकार। उपन्यास ला दँय आकार।।
करके बहुते सोंच विचार।। गद्य रूप पुस्तक साकार।।
-लेखक

676- अपने अंतस भाव उतार। कागज के कुटका मा डार।।
रचै गजल, कविता अउ छंद। पढ़के मन  उपजै आनंद।।
-कवि

677- अपन भाव मा भरथे रंग। रिंगी चिंची कुचिया संग।।
सुन्ना-सुन्ना जघा सजाय। जस के तस ये चित्र बनाय।।
-चित्रकार

678- मोटर गाड़ी रेल चलाय। सब ला मंजिल तक पहुँचाय।।
हाथ म हेंडिल, ब्रेक ह पाँव। गाड़ी इँखरे असली ठाँव।।
-ड्राइवर

679- सुग्घर सेवाभावी जान। कोनो ला नइ कहय बिरान।।
सादा कुरता 'कैप लगाय। दीदी सबके इही कहाय।।
-नर्स

680- मास्टर येमन होवय तेज। पढ़हावँय जाके कॉलेज।।
लइकामन के भाग्य बनाय। संगी बोलव काय कहाय।।
-प्रोफेसर

681- सरकारी सेवक सरकार। अपन जिला के लंबरदार।।
जनता के सब काम कराय। अघुवा सबले आगू आय।।
-कलेक्टर

682- समाचार मा खबर लगाय। डरे बिना ये फरज निभाय।।
छानबीन कर कलम चलाय। ये समाज मा निडर कहाय।।
-पत्रकार

683- घर कुरिया ला हमर बनाय। बुता-काम बनिहार चलाय।।
खड़े-खड़े सब ला समझाय। कभू बुता मा खुद भिड़ जाय।।
-ठेकेदार

684- जौन जिनिसमन बिगड़े पाय। देखभाल के सुघर बनाय।।
करै मेहनत बुद्धि लगाय। रोजी-रोटी रोज कमाय।।
-मेकेनिक

685- माटी के तैं सिरतों जान। हाड़-माँस के संग परान।।
नख, चुन्दी अउ चमकै चाम। साँस चलत ले करले काम।।
-काया

686- काया के ये होथे सार। सबले चतुरा, बड़ हुशियार।।
इही इशारा करते जाय। सब ला येहा बुता धराय।।
-दिमाग

687- एक बरोबर दूनों जान। पानी भीतर डोंगा मान।।
करिया, सादा पुतरी ताय। पानी बड़ टिपटाप भराय।।
-आँखी

688- मुखड़ा बाहिर उभरे जान। हाड़-माँस के कुटका मान।
रहय गाल के दूनों पार। सुनथें येखर ले सब सार।।
-कान

689- आँखी खाल्हे उभरे जान। एक गुफा दू रद्दा मान।।
साँसा येमा आये जाय। महक, बसौना इही बताय।।
-नाक

690- नाक तरी मा महल बनाय। बड़का भारी खोल जनाय।।
दाना-पानी जाय समाय। पर खातिर ये खाय कमाय।।
-मुँहुँ

691- मुँहुँ भीतर के यह रखवार। खड़ें सिपाही बड़ दमदार।।
चीर चाब के करदँय पीस। चाकर, चोक्खू इन बत्तीस।।
-दाँत

692- बिना हाड़ के जीव कहाय। रहै सदा मुँहुँ दाँत सहाय।।
खान-पान के स्वाद बताय।। चटर-चटर बड़ मया जताय।।
-जीभ

693- मुखड़ा के ये ऊँच मकान। देंह मुकुट येला तैं जान।।
टिकली, टीका इहें लगाँय। भाव भजन मा रोज नवाँय।।
-माथा

694- मुखड़ा धड़ के येहा जोर। येखर भीतर कंठ किलोर।।
साधय मुँड़ के भारी भार। दिखय देंह हा सुग्घर सार।।
-टोंटा

695- धकधक धड़कै ये दिनरात। बंद परै ता बिगड़ै बात।।
साफ लहू नस मा बगराय। नान्हें मोटर पंप कहाय।।
-हिरदे

696- सरी देंह के खानादार। पोसन पालन करथे सार।।
खाये जेवन सुघर पचाय। तन-मन ला ये पोठ बनाय।।
-पेट

697- सरी देंह मा बगरे जाल। बहत रहै तन लहू ह लाल।।
पातर-पातर रेशा जान। येखर भीतर बसथे प्रान।
-नस

698- लाली पानी नस बोहाय। कटे-फटे मा बाहिर आय।।
खानपान ले बनथे जान। लाल रंग मा जिनगी मान।।
-लहू

699- सरी देंह के बोहय भार। जाँघ तरी येखर घर द्वार।।
गोल कटोरी हाड़ा ताय। उठक बइठ ला इही कराय।।
-माड़ी

700- एड़ी खाल्हे येला मान। सरी देंह ला बोहे जान।
हाथ हथेली जइसे ताय। येखर बल मा रेंगत जाय।।
-पँउरी

701- नान्हें नोनी फुलमत नाँव। फुँदरा गाँथे बइठे ठाँव।।
नोनी फुँदरा अपन गवाँय। गाँव गली मा खोज कराँव।।
-पैली/काठा

702- कर्रा कुकरा, उज्जर जान। अँइठ पुछी किकियाथे तान।।
मिलथे बहुते येला मान। पूजा खोली पाथे स्थान।।
-शंख

703- पाछू पातर, आगू मोठ। कुछु करै न येहा गोठ।।
मुँह मा येखर आगी बार। भुकभुक कुहरा फेंकय मार।।
-चोंगी

704- करिया, भुरवा होवय रंग। आवय-जावय हमरे संग।
परे रहय परछी, परसार। पुछी उठा के खसले डार।।
-पनही

705- खाकी कपड़ा मा लपटाय। ऊपर ले मुँदरी पहिराय।।
फोंक टोर के फेंकय यार। पाछू कोती चाँटय झार।।
-चोंगी

706- सादा हाड़ा परे उतान। जनम समुंदर मा ये जान।।
राहय बीचे पेट चिराय। दिखथे कुबरा पीठ उठाय।।
-कौड़ी

706- एक गोड़ के घोड़ा यार। दू झन येमा होय सवार।।
आगू-पाछू एक न जाय। बेड़ा ऊपर बिकट भगाय।।
-रैहचूली

707- उतरै घोड़ी ऊँच पहार। चाल रेचकी जानँव सार।।
पिला अठारा कोरी जान। करै नहीं काँही नुकसान।।
-चलनी

708- अटपट छेरी फटफट कान। खड़े पाँव दू मँगरा मान।।
खबखब खावै कतको धान।। पुरखौती के हरय निसान।।
-ढ़ेकी

709- पखरा मा हे खाँच खनाय।  हबर-हबर बहुते ये खाय।।
इँखर पेट मा खिला गड़ाय। कान पकड़ के गोल घुमाय।।
-जाँता

710- एके पइसा के हे मोल। बेनी संगी जावय डोल।।
कोर गाँथ के खोंच पिछोत। आगू-पाछू कोनो कोत।।
-फुंदरा

711- खूब कुटेला कुटते आय। मूँछ ददा के टुटते जाय।।
दाई के तो पेट चिराय।। आगर भुरुवा चोला पाय।।
-गहूँ

712- दिखथे लटके लोढ़ा लाम। ढेंठ़ा खाल्हे बीख तमाम।।
रहै भीतरी तीन मकान। कचर-कचर हे नँगते गान।।
-खीरा

713- रहै पोंगरी गुजगुज पान। फर लड़वा के जइसे जान।।
खेत-खार बखरी मा होय। जौने काटय तौने रोय।।
-गोंदली

714-  लाली करिया दाना सार। भीतर उज्जर सेंदुर यार।।
हरियर पाना धनिया मान। करौ तुरत येखर पहिचान।।
-मसूर

715- फरै न फूलै कोनो डार। येखर बिन उन्ना संसार।।
जनम धरे हन तब ले खान। नुनछुर नँगते, कर पहिचान।।
-नून

716- फरे पान के ओधा जान। हरै माँस के लोंदा मान।।
मुँड़ हा रहिथे काँटादार। राँध संग आलू मिंझार।।
-भाँटा

717- झिमरी नोनी, चुन्दी चार। देंह-पाँव भुँइया के पार।।
दुधवा सादा उज्जर रंग। राँध बने तैं भाटा संग।।
-मुरई

718- देखे मा हावय ये लाल। टमड़े मा गुजगुज हे हाल।।
पहिरे हरियर टोपी आय। संग सबो के रंग जमाय।।
-पताल

719- घेंच कटै धरती मा आय। बचें देंह हा नदी नहाय।।
हाड़ा सादा पटपट ताय। चाम सुरर के बेंचे जाय।।
-पटवा/सन

720- नान्हें लइका बहुते बाढ़। दाढ़ी मेछा हावय गाढ़।।
दिखथे जइसे कुसियार। फरथे फर हा बीच कटार।।
-जोंधरी

721- रिंगी-चिंगी फूले फूल। फर, काँटा घेरा मा झूल।।
बिलई आँखी फर ला मान। उपजै बन कचरा कस जान।।
-भसकटिया

722- मिलै नहीं राजा दरबार। उपजै कोनो खेत न खार।।
नइ बेंचावय कहूँ दुकान। देखत संसो छाय किसान।।
-करा

723- सोन तिजोरी जइसे मान। लोहा ढकना ऊपर जान।।
भीतर निकलै पखरा चार। जंगल हा येखर घर द्वार।।
-तेन्दू

724- रुखुवा लोहा जइसे सार। फूल सोनहा फुलथे मार।।
फर चाँदी कस उज्जर होय। जेखर भीतर पखरा सोय।।
-बंभरी

725- अपन सगा घर सग हा जाय। धरय सगा ला मार ठठाय।।
ठूक-ठाक बस गोठ सुनाय। कोनो नइ तो रोवय गाय।।
-हथौड़ी

726- बिन पानी के उज्जर सूत। गटगट पीयय सबके पूत।।
ताकत के ये हरय खदान। येखर दाता बहुत महान।
-गोरस

727- बीख झार के नोनी जान। बारी बखरी बीच मकान।।
देखत मा येहा डरवाय। धरते मा बहुते रोवाय।।
-मिरचा

728- चार सींग हा मुँड़ मा होय। माल मसाला जिनगी खोय।।
हरियर पाछू नरियर लाल। कारी पर ये करय कमाल।।
-लवाँग

729- फुलुवा फर घूमत रहि जाँय। टोरय एके सब झन खाँय।।
भर-भर टुकना बड़ बेंचाय। जेवन पाछू सोर लमाँय।।
-बिरो पान

730- बिन पानी के महल बनाँय। अखरा पखरा ऊँच रचाँय।।
दू पइसा ला द्वार मढ़ाँय। भीतर लाखों संग समाँय।।
-दियाँर

731- गोड़ चार अउ दूठन पाँख। मुँड़ ले बड़का येखर आँख।।
किरवा पींयर छाता छाय। पुछी कोत मा बीख भराय।।
-दतैया

732- थारी कंचन माढ़े ताल। चिक्कन चाकर हरियर हाल।।
टोरय जोरय लाय मढ़ाँय। पंगत मा सब जेवन पाँय।।
-पुरईन पान

733- चमकै थारी तरिया पार। रंग सोनहा सुग्घर सार।।
नइ तो येहा हाथ धराय। आसमान मा चढ़ते जाय।
-सूरुज

734- एक खेत मा बगरे जान। धान, गहूँ गाड़ा भर मान।।
इँखर बीच मा गोटी एक। सबले सुग्घर सबले नेक।।
-चंदा/चंदैनी

735- लेन-देन के नइ हे बाय। जाथे तेने देते जाय।।
आवय तौने खुल्ला भाय। संगी जानव येहा काय।।
-कपाट

737- घर भर के ये करधन एक। लेकिन कनिहा हवय अनेक।।
घर अँगना के ये रखवार। रहिथे बाहिर डेरा डार।।
-बारी परदा

738- लइका ये रेंगत ना आय। खाँध-खाँध मा बइठे जाय।।
बीच-बीच मा मारे खाय। मार खाय अउ सुर मा गाय।।
-बाजा

739- एक साधु हा तरिया पार। ध्यान लगावै घंटा चार।।
देखय खाल्हे नैन गड़ाय। मेढ़क, मछरी बिन-बिन खाय।।
-कोकड़ा

740- बाप डड़ंगा बहुते लाम। बेटा पोन्डा लेवँय नाम।।
नाती निन्धा छटकू राम। आवँय तीनों बहुते काम।।
-पेड़,फर,फूल

741- जब आना हे तब नइ आय। नइ आना हे आ के छाय।।
बहुते जल्दी ये बउराय। रहिके जुच्झा कभू पहाय।
-नरवा/नँदिया

742- छिंदक-छिंदक छाये फूल। फर हा फरथे डारा झूल।।
बारा राजा होय मँजूर। एक पेड़ बस्ती भर पूर।।
-डूमर

743- कारी छेरी गर मा डोर। जाय हाट मा मारय जोर।।
हाथ अपन दूनों तनियाय। ऊँच-नीच अड़बड़ डोलाय।।
-तराजू

744- नाँगर जोतँय भाई पाँच। नइ आवय कोनो ला आँच।।
कोपर तीरै मिल दस भाय। बिहना-बिहना सबो कमाय।।
-दतुवन

745- एक निसैनी एक्के पाँव। देवय सब ला सुग्घर छाँव।।
पक्ति आठ, बाराठन जान। बरसा, गरमी संगी मान।।
-छाता

746- एक बियारा एक्के द्वार। बत्तीस उहाँ पहरादार।।
खीरा बीजा जइसे जान। हाड़ा सादा कस पहिचान।।
-दाँत

747- अक्कड़ जक्कड़ लकड़ी बाँध। एक पाट मा जम्मों छाँध।।
झिथरी चुन्दी हा छरियाय। कोर-कोर ये हा समराय।।
- ककई

748- चार गोड़ के चप्पो खाय। पीठ बइठ निप्पो इँतराय।।
आइस गप्पो चोंच लमाय। निप्पो धर गप्पो उड़ियाय।।
-भँइसा, मेचका, चील

749- दूनों कोठा गोबर ढेर। एक हाथ मा लेवय हेर।।
कभू-कभू रेरा बोहाय। घेरी-घेरी तब पोंछे जाय।।
-नाक

750- नान्हें नरियर, कुरता लाल, राखै हरियर पुछी सँभाल।।
चटनी येखर चाँटत खाव। तुरते ताही नाँव बताव।।
-बंगाला

751- फूल एकठन फूलय खास। जोत्था फर हा फरै पचास।।
हाड़ा नइ हे, गुदा भराय। फेंक फोकला दुनिया खाय ।।
-केरा फर

752- कहाँ गरू हे पाव छटाक। बात बता का हरै फटाक।।
दू झन मा उचथे ये भार। येखर ले सब बाँचव यार।।
झगरा/ठेनी

753- पानी भीतर समय पहाय। लाम-लाम चुन्दी बगराय।।
बारा लइका ये उपजाय। कहाँ गोसईया मिल पाय।।
-ढुलेना कांदा

754- बिना मुँड़ी के चिरई यार। ओखर पाँखी कई हजार।।
सके नहीं ये कभू उड़ाय। पर सब ला रद्दा देखाय।।
-किताब

755- दू लुगरा अउ नारी एक। पहिरै रहिथे येहा नेक।।
उघरा येखर तभो पिछोत। घूमत राहय चारों कोत।।
-माछी

756- उचकी घोड़ा हा चभरंग। धर लगाम बुड़ येखर संग।।
बइठे राहँय ससुर दमांद। देखत हाँसय अइसन फांद।
-बॉल्टी, डोरी, कुआँ

757- उत्ती कोती जोगी आय। एक गोड़ मा ध्यान लगाय।
सादा टोपी मुँड़ मा डार। घूमय येहा खारे-खार।।
-पिहरी

758- चकरी रे चकरी ये टाँठ। रसा भरे बड़ गाँठे गाँठ।।
भँवरी जइसे गोले गोल। खा के निकलै मीठा बोल।।
-जलेबी

759- रात-रात भर नँगते रोय। लात तान ये दिनभर सोय।।
कुरता बेनी सादा सार। भभकै देखत ये अँधियार।।
-मोमबत्ती

760- नोनी पड़री ला जर आय। टुरा मेछर्रा लेग भगाय।।
दिखै गोलवा पातर पान। चीथ-चीथ ले डारै प्रान।।
-रोटी

761- एक आँख जाला भरमार। दिन भर बइठे डेरा डार।।
रतिहाकुन होवय तैयार। बाँटय बहुते जग उजियार।।
चन्दा

762- दू अक्षर के नाँव सरेख। उलट-पुलट के जादू देख।।
सोज लिखे मा घोड़ा खाय। उलट परे ता नाच नचाय।।
-चना

763- एक मोहना घर-घर पाव। करनी देखत सबो डराव।।
रसा चुहक हाड़ा ला खाय। मुँह कोती आगी उछराय।।
-माचिस

764- कलगी हे कुकरा झन मान। चार पाँव मा रेंगय जान।।
पुछी बेंदरा जइसे लाम। कंठ नील हे, बोलव नाम।।
-टेटका

765- आगू कोती गाँठे गाँठ। पुछी टेड़गा भारी टाँठ।।
आठ पाँव मा रेंगत जाय। छूवय तेला जहर चढ़ाय।।
-बिच्छी

766- लार निकालै जाल बनाय। फाँदा फाँसे चलते जाय।।
माछी, मच्छर, किरवा फाँस। खावय येहा सब ला हाँस।।
-मेकरा

767- बाहिर छछले पाना डार। भीतर फरथे गजब गुदार।।
लाली सादा रंग जमाय। मीठ-मीठ ये सब ला भाय।।
-शंकरकांदा

768- एक महल मा बावन द्वार। राहय सोला सौ पनिहार।।
बिना बनी पानी भरवाय। जुरमिल जम्मों बुता बनाय।।
मछेर के छाता

769- करिया बीजा सादा खेत। देखँय दुनिया करके चेत।।
बोंवइया हा गावय गीत। सबो खवइया बनथें मीत।।
-किताब

770- कोनो मा दू, कोनो तीन। कोनो मा ये एक्के झीन।।
जर सुद्धा सब धरै उखान। दाब खखौरी बहुते खान।।
-चनाबूट

771- सजे एक कुकरा हा आय। रेंगत-रेंगत थक हो जाय।।
लानव चाकू घेंचे काट। फेर चलय वो खटर खटाक।।
शीश/पेंसिल

772- कच्चा मा जम्मों झन भाय। गेदराय हा अबड़ मिठाय।।
सबो जीव बर सिरतों आय। पाके मा ये बड़ करुवाय।।
-तीन अवस्था

773- पिढवा बइठे रानी मान। मुँड़ मा आगी सिरतों जान।।
घेरी-बेरी मुँड़ी कटाय। कोनो येखर पार न पाय।।
-मोमबत्ती

774- दुब्बर पातर बड़ गुणकार। मुँड़ी नवाये रेंगय सार।।
जब आवय ये कखरो हाथ। बिछड़े मन हा पावँय साथ।।
-सुजी सूँत

775- फर येला खावँय दिनरात। येखर बिन तो बनय न बात।
मिलय न ये राजा दरबार। फूलै फरै न कोनो डार।।
-नून

776- हरियर हावय चोला मोर। चरिहा-चरिहा लेवँय टोर।।
जब-जब मोला कोनो खाय। लाली ओखर मुँह हो जाय।।
-पान

777- देंह पाँव पानी टपकाय। देखत तरुवा तिपते जाय।।
तुरते खोजे परथे छाँव। या सपटे बर परथे ठाँव।।
घाम/मँझनिया

778- करिया मुँहुँ के दिखथे यार। येखर वश मा सब संसार।।
मन भीतर भरथे उजियार। जिनगी देथे हमर सँवार।।
-कलम

779- कपड़ा बदलै ये हर साल। फागुन बाँधय मँउर कमाल।।
सबके मुँहुँ देखत पनछाय। अमरैया मा उमर पहाय।।
-आमा

780- एक्के फुलुवा लगय गुलाब। पावय कोनो नहीं नवाब।।
होवय ना माली के बाग। दिखय रात, बिहना ले भाग।।
-चन्दा

781- पहिली-पहिली दही जमाय। पाछू दुहथे जावय गाय।।
लइका ओखर पेट समाय। हेर लेवना हाटे जाय।।
-कपसा

782- एक जीव ये करिया खास। करिया जंगल करय निवास।।
पानी पीयय लाले लाल। अँगठा के नख बनथे काल।।
-जुआँ

783- कपड़ा येखर नहीं तनाय। कोनो येला नइ सिल पाय।।
एक बछर मा एक्के बार। पहिरे लत्ता रखय उतार।।
-साँप के जोंखी

784- नान्हें बस्ती रहै बसाय। घना-घना घर इहाँ बनाय।।
बसे बड़े सब राहँय वीर। पहुना आदर, धरै न धीर।।
दतैया के छाता

785- दँतली हावय येहा यार। फेर दाँत येखर दमदार।।
भूख लगै ता सहि नइ पाय। कच्चा सुख्खा सबो चबाय।।
-आरी

786- एक कुआँ मा घाट हजार। आ घुसरै सौ-सौ पनिहार।।
बिना बनी के करथें काम। सोंच बतावौ का हे नाम।।
-चलनी

787- एक सींग के येहा गाय। जौन खवाले खाते खाय।।
बइठे-बइठे बड़ पगुराय। पेट कोत ले निकले जाय।।
-जाँता

788- टंच टुरी हा टन्नक टाँय। बुता-काम मा साँये साँय।।
ठोंक ठठा के सोज बनाय। हाथ पकड़ येला रेंगाय।।
-हथौड़ी

789- बड़े दुवारी हिरना ताय। पानी पियै न खाना खाय।।
किच-किच ये नँगते नरियाय। छोड़ मुँहाटी कहूँ न जाय।।
-कपाट

790- हरियर डंडी मुँड़ मा जान। कुरता खापे लाल कमान।।
देख ताक के खोल जबान। पानी-पानी करय पठान।।
-हरियर मिरचा

791- एक गहिर बड़ अइसन ताल। देखत मा बड़ होय कमाल।।
पानी तरिया मा हे खूब। राई घलो नइ जावय डूब।।
-करा

792- एक जीव ये असली मान। बिन हाड़ा के येला मान।।
गोड़ बिना ये रेंगत जाय। लाली पानी बहुते भाय।।
-जोंख

793- छोटे मुँह अउ बड़का बात। करथे येहा दिन अउ रात।।
बैरीमन हा देख डराँय। बोली बोलय धाँये धाँय।।
-तोप

794- पानी भीतर उपजै साग। होय जबरहा येखर भाग।।
डारा देखत सबो बिसाय। चना दार के संग मिठाय।।
-ढेसकांदा

795- कहाँ देंह बस मुँड़ देखाय। बड़ दुरिहा मा रहे टँगाय।।
जटा मुड़ी मा बहुते होय। गोरा लइका भीतर सोय।।
-नरियर

796- एक टुरी हा गोली खाय। पेट भीतरी कहाँ पचाय।।
पर येला तो थूँकन भाय। परै जौन ला वो मर जाय।।
-बंदूक

797- रहिथे ऊपर ऊँच अगास। आथे येहा तो चउमास।।
ऊपर-ऊपर चमके जाय। धम-धम खाल्हे पोठ सुनाय।।
-बिजली

798- चार कोकड़ा एक्के साथ। चार बदक पकड़े हे हाथ।।
नौ रंगे मिट्ठू उड़ जाय। फेर तहाँ ले उलट बिछाय।।
-खटिया

799- रोज-रोज बड़ चलना भाय। पाँव नहीं पर आवय जाय।।
हालय डोलय बोल सुनाय। एक इंच पर घुँच नइ पाय।।
-कपाट

800- बिना पंख के उड़ते जाय। आसमान ला छू के आय।।
घेंच बँधे हे पातर डोर। हवा सहारा, गजब हिलोर।।
-पतंग

801- वीर सिपाही सोय उठाय। सुन के येला जोश भराय।।
मार परै तब जगै परान। बिन मारे हे मरे बिहान।।
-नँगाड़ा

802- बहुते हरु हँव मोला जान। फेर गरू हँव येहू मान।।
दू झन बिन मैं उठ नइ पाँव। बने बुता  इनाम ताँव।।
-बड़ई

803- आगी खाथे, नहीं अघोर। पीहू करथे नो हे मोर।।
हाथी जइसे ताकत जान। शेर सहीं चुस्ती हे मान।।
-रेलइंजन

804- बिना पाँव के उड़ै उड़ान। हाथी ले जादा बलवान।।
सरी रातदिन दँउड़ लगाय। कभू थकय ना ये सुरताय।।
-बिजली

805- करिया हे पर नो हे साँप। दाँत बिना डँसथे, तैं भाँप।।
ताकत देथे, नो हे देव। नाँव जानथे तौने लेव।।
-अफीम

806- गेंद सहीं फरथे ये गोल। ऊपर टोपी कटही खोल।।
पोंगा जइसे लमरी फूल। खाय मतौना जाथें झूल।।
-धतूरा

807- पींयर-पींयर बड़ अनमोल। देखत दुनिया जाथे डोल।।
गहना-गुरिया सुघर सुहाय। येखर गुण ला दुनिया गाय।।
-सोन

808- चलते रहना येखर काम। करै कभू नइ ये आराम।।
टिक-टिक टिक-टिक बोल सुनाय। करत इशारा समय बताय।।
-घड़ी

809- लइकामन येला बड़ भाय। नइ तो दाना-पानी पाय।।
पंछी जइसे ऊँच उड़ाय। मुँह मा डोरी नाथ नथाय।।
-पतंग

810- सादा-सादा दिखथे खास। जर के देथे सुघर सुवास।।
पूजा मा ये आवय काम। कोन बताही येखर नाम।।
-कपूर

811- रिंगी-चिंगी होथे रंग। दाँत हजारों रखथे संग।।
नर नारी के आवय हाथ। बगरे चुन्दी देवय गाँथ।।
कंघी

812- बारों महिना थोरे थार। चउमासा मा बाढ़य धार।।
घर अँगना गंदा भर होय। ध्यान रखै ना जौने कोय।।
-मोरी

813- पाना येखर करै कमाल। करदै सबके हाथ निहाल।।
कूट-पीस के रंगत लाय। लाली रचथे जभे सुखाय।।
-मेंहदी

814- खैर पेड़ के येहा छाल। कुटका-कुटका रखैं उबाल।।
सबके मन ला बहुते भाय।। जौन खाय मुँह लाली पाय।।
-कत्था

815- तीन सींग के देखव गाय। तरिया भीतर तँउरे जाय।।
करिया, सादा हावय जान। फर जुड़हा गुणकारी मान।।
-सिंघाड़ा

816- हरियर-हरियर डारा पान। नर नारी के हे मुस्कान।।
जेवन पाछू आवय काम। लाल रचाथे मुँह, का नाम।।
-पान

817- रंग सोनहा, पींयर मार। उड़थे येहा पाँख पसार।।
बिच्छी जइसे नँगते झार। कोन जीव हे जानव यार।।
-दतैया

818- कलजुग काली माता मान। बात हवा ले करथे जान।।
पानी पीयै, आगी खाय। लोहा पटरी भगते जाय।।
रेलगाड़ी

819- नान-नान डबिया भरमाय। डूब-डाब ये करते जाय।।
राजा माँगय देके मोल। मुँह ले नइ दन फूटय बोल।।
-आँखी

820- खाल्हे कोती करिया होय। ऊपर आमा जइसे सोय।।
दिखथे ललहूँ बंदन रंग। आवय फागुन के धर संग।।
-परसा

821- गज भर कपड़ा बारा पाट। सात रंग के लटके टाट।।
सरलग येखर होवय पाठ। गाँठ लगे तीने सौ साठ।।
-साल(कलैंडर)

822- एक महल दू राजा होय। फौज फटाका इन्दर सोय।।
अपने पारी जब-जब आय। मुँड़ी सिपाही के कटवाय।।
-शतरंज

823- शीशी बोतल रस भंडार। रिंगी-चिंगी ये दमदार।।
येखर ले जे करथे प्यार। जिनगी हा होवय बेकार।।
-दारू

824- रतिहाकुन करथे उजियार। येखर बिन लागय अँधियार।।
सादा जुड़हा करय अँजोर। दिन मा भइगे दाँत निपोर।।
-चन्दा

825- मन्दिर जेमा दसठन द्वार। एक जीव होवय भरतार।।
बिना जीव के ये बेकार। हाड़ माँस के रचना सार।।
-मनखे देंह

826- एक पेड़ बिन डारा पान। फर झरथे बरसा कस जान।।
जौन जघा फर ये गिर आय। तुरते वो गिल्ला हो जाय।।
-करा

827- छत मियाँर मा लटके जाय। लइकामन ला बहुते भाय।।
संग सहेली सावन छाय। अमरैया मा बाँधे आय।।
-झूलना

828- सोला रानी, मूँड़ा चार। तीन आदमी मया दुलार।।
जीना मरना इँखरे हाथ। सुन्ना सबके राहय माथ।।
-चौसर/पासा

829- पातर नारी सभा समाय। एक सजन हा होंठ लगाय।।
छाती छेदा छेद बताय। बोली मधुरस वाह कहाय।।
-बँसरी

830- एक पाँव के नारी देख। पहिरे लहँगा घरी सरेख।।
ताने राहय आठों हाथ। बरसा गरमी हमरे साथ।।
-छतरी

831- एक महल मा सबो अमात। चवालीस राहय के जात।।
येखर मन के नारी चार। एक्का चारों होंय सवार।।
-ताश

832- पाँच धातु के मंदिर सार। रहिथें भीतर नर अउ नार।।
अपन हाथ ले करथें काम। जस करनी के तस ईनाम।।
-प्राणी

833- चलते रहना येखर काम। कभू कहाँ करथे आराम।।
सरी जगत के ये कल्याण। छिन भर छोड़य, निकलै प्राण।।
-हवा/साँस

834- हरियर ले पींयर हो जाय। जन-जन येला बहुते भाय।।
ऊपर भीतर फेंकय जान। फर के राजा इही महान।।
-आमा

835- एक नगर मा पशु बत्तीस। जेमा के राहँय नर बीस।।
जब मन होवय लड़ते जाय। लहू, घाव ना कखरो आय।।
-शतरंज

836- बिना बबा के नाती होय। परे-परे भिथिया मा रोय।।
पानी, गोबर बूड़ नहाय। घर कुरिया के चमक बढ़ाय।।
-पोतनी

837- रहै महल घर अँगना द्वार। ईंटा पखरा मिलै न यार।।
तरिया, नँदिया, सागर सार। मिलै न एक्को पानी धार।।
-फोटू

838- खोल म खुसरे खतरा नार। चमकै चमचम उज्जर धार।।
टेढ़ा-मेढ़ा चलथे चाल। लहू रकत पीथे ये लाल।।
-तलवार

839- बिना मुँड़ी के हावय नार। हवै भुजा दू येखर सार।।
चलौ-चलौ के करथे नेंग। संग एक झन धरके रेंग।।
-डोली

840- कपड़ा-लत्ता नो हे थान। सिलय-बिनय ना कोनो जान।।
राखय अपने देंहें डार। छै-छै महिना फेंक उतार।।
-जोंखी

841- नान्हे लइका बड़ दमदार। दाढ़ी मेछा हे भरमार।।
जब बजार मा येहा जाय। हाथ हाथ मा झट बेंचाय।।
-नरियर

842- नारी दू, एक्केठन पेट। कभू होय ना नर ले भेट।।
काज इँखर बड़ अचरज ताय। दूनों मिल लइका जनमाय।।
-सीप

843- बारा पँखड़ी होवय फूल। मुँड़ ऊपर रहिथे ये झूल।।
गरमी, बरसा लेथे थाम। जाड़ समय नइ आवै काम।।
-छतरी

844- मुँड़ मा हरियर कलगी सोय। हाथी दाँत बरोबर होय।।
आथे खाये के ये काम। तुरत बतावौ का हे नाम।।
-मुरई

845- पानी ले रुखुवा उपजाय। जेखर डारा नँगते छाय।।
जुड़हा येखर छँइहा होय। बइठ सकै ना खाल्हे कोय।।
-पानी के फव्वारा

846- मुँड़ मा बइठे रानी दोय। आवत-जावत पानी खोय।।
येखर बिन ये जग अँधियार। नाँव काय हे करव विचार।।
-आँखी

847- रहिथे येहा हमरे संग। फेर अलग हे येखर ढंग।।
कहाँ गढ़य येला लोहार। वार करै जइसे हथियार।।
-नख

848- हाड़ा-गोड़ा नइ हे माँस। रहिथे पर अँगठी मा फाँस।।
इही सुरक्षित हवय उपाय। आगी ले ये डरते जाय।।
-दस्ताना

849- आवत हँव कहिके बतलाय। दुनिया भर पहिली चमकाय।।
आवय तब बहुते धमकाय। आगी जँउहर धर के आय।।
-गाज

850- गुदा, फोकला खाय सिराय। तभो गुठलु बड़ गुरतुर भाय।।
घेरी-बेरी मुँह मा बोज। चुहक-चुहक के फेंकँय सोज।।
-आमा गोही

851- देंह दुसर के चिपकत जाय। लहू-रकत पर के बड़ भाय।।
येखर हाड़ा ना हे गोड़। दुनों मुँड़ा चलथे बेजोड़।।
-जोंकवा

852- खाल्हे ऊपर चपकन ताय। बीच करेजा धड़के जाय।।
दू अँगरी ला सबो फँसाय। धीरे-धीरे तब सरकाय।।
-कैंची

853- माटी के काया सिरजाय। लावा-धक्का सहि नइ पाय।।
कच्चा मा कोनो नइ भाय। पक्का सबके प्यास बुताय।।
-मरकी/गगरी

854- लागय लाड़ू मोती चूर। रहै नशा येमा भरपूर।।
खवईया जावय पगलाय। डमरूधर ला बहुते भाय।।
-धतूरा

855- चार पाँव पर रेंग न पाय। सभा सदन मा मान कमाय।।
येखर खातिर लड़ मर जाय। काय नाँव हे कोन बताय।।
-खुर्सी

856- कनिहा मा धोती लटकाय। येखर मुँड़ आगी लग जाय।।
बीच सभा मा धुआँ उड़ाय। येखर संगत मन भकवाय।।
-चिलम

857- मन के भीतर रहि नइ पाय। ध्यान घलो ना एती जाय।।
गरु नइ हे राई भर जान। दू मनखे ले उठथे मान।।
-बड़ाई

858- रहौं सदा मा तीरे तार। भीतर बाहिर सबले सार।।
मोला कोनो देख न पाय। मोर बिना सब प्रान गँवाय।।
-हवा

859- एक अचंभा देखे जाय। लटके खूँटी समय पहाय।।
बाबू ला जब घाम जनाय। माथा ऊपर दय बइठाय।।
-टोपी

860- फरे पेड़ मा पखरा मान। होय ठोसलग बहुते जान।।
भीतर तरिया सादा पार। फूट जाय ता निकलै धार।।
-नरियर

861- रज्जू राखे चिरई पोस। उड़ जावय ते कतको कोस।।
घेंच बँधे डोरी हे जान। खींच ढ़ील ले भरय उड़ान।।
-पतंग

862- पइसा बिन ये दाउ कहाय। अपन संपत्ति आग लगाय।।
अपने घर भीतर सुत जाय। होत बिहनिया बुता कमाय।।
-कुम्हार

863- तन भुरुवा मा धारी तीन। खावै दाना हाथे बीन।।
रुआ भरे पूछी लहराय। नान्हें हे पर हाथ न आय।।
-चिटरा

864- आ के करथे ये हलकान। जावत बेरा मा नुकसान।।
होय छोट तब्भो बेकार। हरै काय ये करौ विचार।।
-आँखी के रोग

865- खम्भा जइसे ठाड़े जान। थाँघा के नइ नाँव निसान।।
फेंक फोकला फर ला खाव। गुठलू बीजा नइ तो पाव।।
-केरा

866- भरे दूध ले गगरी चार। बिना तोपना उल्टा यार।।
टिटटिप येहा लटके जाय। बछरू पीयय मुँहे लगाय।।
-थन

867- बरसा, गरमी जनमे जान। जाड़ा कमती येला मान।।
बइठ कहूँ ये जेवन जाय। फेर न कोनो वोला खाय।।
-माछी

868- आँखी आगू बुता बजाय। आँख बंद, माड़ा मा जाय।।
दाना-पानी कुछु ना पाय।। अँधियारी मा काम न आय।।
-चश्मा

869- ये पंछी हे गजब सुजान। बोली हरदम मीठ जबान।।
करिया पाँखी लाली चोंच। कुहू-कुहू करथे, तैं सोंच।।
-कोइली

870- बिना पाँव के पहुँचे जाय। बिन मुँहुँ के सब हाल सुनाय।।
कोनो ला ये दय रोवाय। कभू-कभू ये बने हँसाय।।
-चिट्ठी

871- सादा काया सुग्घर जान। मुँड़ी जटा पोथी पहिचान।।
योगी भोगी ना सुल्तान। पंड़ित ज्ञानी झन तैं मान।।
-लहसुन

872- चालिस झन के येहा यार। झीटी सुख्खा तन हा सार।।
राहय ये हा परदा डार।। गाँव शहर बहुते लगवार।।
-चिलम

873- मोर मया हे ऊँच अगास। कइसे जावँव ओखर पास।।
मनखे बैरी पकड़ै जाय। मोर मया मोला छोंड़ाय।।
-परेवा खोंधरा

874- काज करै अचरज इक नार। मार साँप तरिया दै डार।।
धीर लगा तरिया ह सुखाय। साँप घलो मर के चितियाय।।
-दीया, बाती

875- जम्मों गुदड़ी जल मा जाय। जलै एक नइ सुँतरी पाय।।
पानी के सब जीव धराय। जल मोरी ले निकल बोहाय।।
-सौंखी

876- बिन कपड़ा के देखव नार। होय खड़ा ये बीच बजार।।
नाक म नथनी सजे सजाय। छै नाड़ा राहय लटकाय।।
-तराजू

877- लचकै कनिहा बड़ मटकाय। लोहा कारी नार कहाय।।
अनगिनती के धरहा दाँत। खावय लकड़ी फाटा घात।।
-आरी

878- एक पेड़ करुहा हे नाम। डार, पान, फर, बीजा काम।।
बनै दवाई, खातू, तेल। येखर छँइहा खेलव खेल।।
-लीम

879- गोरी नारी शोभा गाल। करिया रंगे करै कमाल।।
खेत खार मा सादा फूल। सुरता राखौ जाव न भूल।।
-तिली

880- धक-धक धड़के ये दिन रात। बुता काम करथे लगिहात।।
रहिथे ये हा डेरी पार। बंद परय जिनगी बेकार।।
-दिल

881- देंह केंवची येहा पाय। खटिया मा रहै लुकाय।।
दिन मा ये सपटे रहि जाय। लहू पियासे रतिहा आय।।
-ढे़कना

882-  सुग्घर मंदिर दसठन द्वार। प्राण बिराजे बन रखवार।।
भीतर के पट खोल उड़ाय। जब हरि से मिलना पर जाय।।
-मनखे देंह

883- नारी हावय एक सचेत। प्रेमी ला ये करय अचेत।।
येखर जे फाँदा फँस जाँय। धन दोगानी मान गँवाँय।।
-मंद/दारु

884- घेरा वाला लहँगा डार। एक पाँव मा ठाड़े नार।।
हाथ आठ येखर हे जान। रिंगी-चिंगी मुखड़ा मान।।
-छतरी

885- राहँय सँघरा ये दू यार। करत चलैं खटपट तकरार।।
दूनों मिल एक्के हो जाय। घर रखवारी इही बढ़ाय।।
-कपाट

886- लइकामन के मया दुलार। लटकै ये परछी परसार।।
रोवत लइका चुप हो जाय। येमा देवय जब बइठाय।।
-झूलना

887- गरमी मा सुख ये पहुँचाय। सरदी मा ये बड़ डरवाय।।
बिना पाँख के चलते जाय। अपन जघा ले रेंग न पाय।।
-पंखा

888- चन्दा जइसे गोल अकार। जेवन संगे रखँय सँघार।।
महतारी हा मोला पोंय। खावत जम्मों, बड़ खुश होंय।।
-रोटी

889- एक नाँव के दू फर जान। अलग-अलग हावय पहिचान।।
खेते उपजै, जम्मों खाय। घर मा उपजै, घर ढह जाय।।
-फुट

890- कटै आखिरी बनथे काम। बीच कटै लेगय यम धाम।।
कटै शुरू ता प्राण बचाय। पूरा आँखी कोर रचाय।।
-काजल

891- चन्दा जइसे चाकर गोल। पान बरोबर पातर झोल।।
जेवन के बेरा मा आय। सबले पहिली मारे जाय।।
-पापड़

892- छोट-छोट डबिया डिबडाब। दिनभर उघरे, रतिहा दाब।।
मूँगा मोती झरथे खूब। येखर भीतर जाथें डूब।।
-आँखी

893- मार परै जिन्दा हो जाय। बिन मारे ये जी नइ पाय।।
पाँव बिना दुनिया घुम आय। आवय-जावय घेंच टँगाय।।
-ढ़ोलक

894- रहै संग मा ये दिनरात। कोनो नइ तो कभू अघात।।
येखर बिन तो निकलै प्राण। करै सुतत जागत कल्याण।।
-पवन/हवा

895- रहै रात भर संगे जाग। होत बिहनिया जावै भाग।।
छोड़ जाय लागै अँधियार। इही अमित के प्राण अधार।।
-दीया

896- द्वार-द्वार मा अलख जगाय। देंह भभूती फिरय लगाय।।
फूँकत सींगी चलते जाय। तन पीतांबर जटा बढ़ाय।।
-सन्यासी

897- उछलकूद ये गजब मचाय। कच्चा-पक्का सब ला खाय।।
रुखुवा ऊपर रात बिताय। पुछी लाम हे, कोन बताय।।
-बेंदरा

898- नो हे कखरो ये हा जीत। चिन्हा दे हे मोला मीत।।
दिनभर ये छाती पोटार। तीर मा राखँव, रात उतार।।
-हार

899- नो हे नारी तभो लजाय। हाथ लगे ले झट सकलाय।।
नान्हें रुखुवा बहुते पान। लजकुरहा हे, अब पहिचान।।
-छुईमुई/लजवंतीन

900- एक गाँव मा अचरज होय। ऊपर रुख फर खाल्हे सोय।।
रंग कोकड़ा, मिट्ठू मान। का हे संगी जल्दी जान।।
-मुरई

901- तीन वर्ण ये सब ला भाय। बीच कटै ता फर बन जाय।।
शुरू कटै प्रभु नाम कहाय। कटै अंत ता चीर मढ़ाय।।
-आराम

902- फर अइसन के आँख मुँदाय। फोरे मा अंड़ा दिख जाय।।
ये अंडा ला जौने खाय। तन-मन अपने पोठ बनाय।।
-बादाम

903- एक जघा ना ये टिक पाय। रूप मनोहर जग भर छाय।।
मानुसमन येमा हे खोय। दीन-हीन येखर बिन होय।।
-रुपिया, पइसा

904- इक नारी के छै औलाद। दू-दू झन ला करथे याद।।
छै झन ला ये संग बलाय। सँघरा येमन कभू न आय।।
-मौसम

905- दू आखर के हावय नाम। हाड़ा भीतर होथे धाम।।
नाड़ी ले ये आवव जाय। कोनो बिरथा नहीं गँवाय।
-लहू

906- तीन वर्ण के हावय नाम। आवय येहा सबके काम।।
रहै देंह ले ये लपटाय। इज्जत हमरे इही बचाय।।
-कपड़ा

907- हाड़ माँस तन नइ हे जान। हाथ-पाँव बिन लमरी मान।।
राहय ये हा जेखर हाथ। सुख-दुख मा ये देवय साथ।।
-लाठी

908- अपने मुख ला देखे जाय। देख-देख मन मा मुस्काय।।
येखर आगू सकल समाज। शोभा बाढ़य करके साज।।
-आईना

909- सोन सहीं चमकै ये खास। रहिथे येहा ऊँच अगास।।
करै कभू नइ ये कल्याण। धमकावत ये हर लै प्राण।।
-गाज

910- बाग, बगीचा, महल, अटार। मंदिर, मस्जिद अउ गुरुद्वार।।
छानी, परवा, रुख लपटाय। चढ़के नँगते ये मुस्काय।।
-नार/बियाँर

911- मेछा, दाढ़ी पहिली आय। पाछू लइका जनमे पाय।।
बाढ़य लइका, कहाँ दुलार। काहँय लत्ता सबो उतार।।
भुट्टा

912- पर्वत ऊपर रथे चलाय। भुँइया मा राखय टेकाय।।
वायु वेग राहय रफ्तार। एक पाँव ना उसलै यार।।
-कुम्हार के चाक

913- पानी मा ही समय बिताय। कोव-कोव ये बड़ चिल्लाय।।
मछरी, मेढ़क, नो हे साँप। थोरिक उड़थे, लेवव भाँप।।
-पनबुड़ी

914- जंगल ले ये होय तियार। उपजै बाढ़य जाय बिसार।।
जिनगी पानी बीच बिताय। बुड़ै मरै ना ये बोहाय।।
-डोंगा

915- अचरज नारी हावय एक। बहुते ओखर बुद्धि विवेक।।
पढ़े-लिखे ना एक्को आय। जियत-मरत ला तुरत बताय।।
-नाड़ी

916- एक गाँव हे बहुते खास। एक महल मा एक निवास।।
पहिरै पींयर सबझन जान। नर नारी नइ हे पहचान।।
-ततैया छाता

917- लोहा के नान्हें औजार। एक आँख येखर हे सार।।
जेखर तीर म येहा जाय। बिछड़ेमन के मिलन कराय।।
-सुजी

918- एक आदमी देंहें गाँठ। लामी-लामा तन हा टाँठ।।
भारी गुरतुर, बहुते स्वाद। चीनी, गुड़ येखर औलाद।।
-कुसियार

919- दू आखर के हावय नाम। शुरू कटै ता मइला काम।।
कटै बीच दूसर दिन जान। कटै आखिरी थोरिक मान।।
-कमल

920- एक आदमी चाम न माँस। धीर रास के चलथे साँस।।
हाड़-हाड़ जेखर छेदाय। बोली सुन के जग मोहाय।।
-बँसरी

921- पिड़वा बइठे रानी एक। मुँड़ मा आगी धरे कतेक।।
तन ले पानी रहै बोहाय। बार-बार मुँड़ काटे जाय।।
-मोमबत्ती

922- एक गोड़ अउ काने चार। अद्भुत अइसन हावय नार।।
तामस बहुते हवै मिजाज। कारी हे पर आवय काज।।
-हींग

923- खात-खात मुँहुँ हा जर जाय। हरियर, लाली फर ये आय।।
दिखथे नान्हें, मन ला भाय। बड़े-बड़े ला दय रोवाय।
-मिरचा

924- साहब खाना येमा खाय। कुआँ गिरे बाल्टी निकलाय।।
रुखराई मा होथे जान। कभू-कभू दुख देथे मान।।
-काँटा

925- रहै शान्त, बहुते चुपचाप। पानी राहय जुड़ टिपटाप।।
पियै बटोही, मिटै पियास। लोटा धरे न एक गिलास।।
-कुआँ

926- दुब्बर, पातर झन तैं जान। गजब हरै ये गुण के खान।।
करिया मुँहुँ ला उज्जर मान। संगत येखर करय सुजान।।
-कलम

927- करिया-करिया जेखर रंग। रहिथे डारा-पाना संग।।
खाबे तब ये जीभ रचाय। गजब मिठाथे नून मिलाय।।
-जामुन

928- अलकर घोड़ी बारा पाँव। रेंगत राहय पाय न ठाँव।।
येखर ऊपर तीन सवार। कोनो कभू न जाय बिसार।।
-घड़ी

929- सदा बढ़ावै शोभा जान। करिया रंग ल तैं पहिचान।।
पारै आँखी तीर निसान। लइका बर शुभ टीका मान।।
-काजर

930- रतिहाकुन सज-धज के आय। दिनभर अपने घर सुरताय।।
चमचम चमकै मन ला भाय। उजियारी जुड़हा बगराय।।
-चंदैनी

931-बिना पाँख के ऊँच उड़ाय। घेंच म पातर डोर बँधाय।।
हवा मितानी येखर जान। पानी देखत त्यागे प्रान।।
-पतंग

932- बिना बरे कुछु काम न आय। बारे मा ये गजब सुहाय।।
परे रहै दिन मा तिरियाय। रतिहाकुन झट सुरता आय।।
-चिमनी

933- अचरिज धन अइसन ये आय। जतके बाँटव बढ़ते जाय।।
नहीं चोर येला चोराय। सदा हमर ये मान बढ़ाय।।
-विद्या

934- एक पेड़ के बड़का ठाँव। खाल्हे राहय छाँवे छाँव।।
मेछा, दाढ़ी लामी लाम। संगी बोलव का हे नाम।।
-बर पेड़

935- दुख पीरा मा झरते जाय। खुशी परे मा थोरिक आय।।
नुनछुर लागय जेखर स्वाद। आँखी ला तैं कर ले याद।।
-आँसू

936- कोनो सकै न येला मार। काटय ना कोनो हथियार।।
संग सबो के रहिथे यार। राजा, मंत्री अउ दरबार।।
-छँइहा

937- करिया कुत्ता झबरू कान। मुकुट खाप के चलै सियान।।
सबो संग जोरय ये खाँध। जोड़ी सबके संगे बाँध।।
-भाँटा

938- खूँटा डाँगा बहुते ताय। गुरतुर येखर दूध मिठाय।।
दिखथे मुखड़ा जइसे गाय। जिनगी पानी बीच पहाय।।
-सिंघाड़ा

939- गोल गोलवा मोला मान। तहूँ हवच जी लमरी जान।।
ऊपर तोर कान तोपाय। हमर देंह ला उघरा पाय।।
आलू-भाँटा

940- तरिया डबरी उपजे जाँव। आरुग फर मैं महूँ कहाँव।।
साधू संतन मानय खास। खावँय मोला रहैं उपास।।
-सिंघाड़ा

941- आथे-जाथे, नइ हे पाँव।  नगर-शहर, बस्ती अउ गाँव।।
शोर संदेशा घर पहुँचाय। पानी मा ये मर-हर जाय।।
-चिट्ठी पत्री

942- पानी भीतर चमके जाय। बिन पानी के मरना आय।।
तरिया नँदिया करै निवास। कतको धो ले हटै न बास।।
-मछरी

943- बड़का उँचहा येला जान। खड़े रथे ये अपने स्थान।।
घर कुरिया के ये रखवार। ईंटा, पखरा ले दमदार।।
-भिथिया

944- भरे खजाना मोती माल। देख-देख बस हो खुशहाल।।
हेर सकै ना कोनो जान। येखर चक्कर छुटथे प्रान।।
-दतैया छाता

945-  बइला जेखर एक न सींग। लाम लाहकर टींगे टींग।।
नाँगर मा नइ जोंते जाय। आगू आबे, प्रान गँवाय।।
-बघवा

946- करिया लउठी लामी लाम। आय नहीं टेंके के काम।।
नइ तो येहा हाथ धराय। देखत येला सबो डराय।।
-साँप

947- फुलवारी के घमघम फूल। उल्टा लटके राहय झूल।।
कोनो येला टोर न पाय। कहाँ हाथ ले ये अमराय।।
-चँदैनी

948- सोन चिरइया येला जान। करिया मुख येखर पहिचान।।
पेट भीतरी दाना चार। जंगल झाड़ी हे घर द्वार।।
-तेंदू

949- खनखन बाजत चलते जाय। तरिया नँदिया बूड़ नहाय।।
जीवमार बड़ इही कहाय। फेर एकठन कुछु नइ खाय।।
-सौंखी

950- नान्हें चिरई येला जान। उँचहा उड़ना हे पहिचान।।
रहिथे लइकामन के साथ। उड़ना गिरना इँखरे हाथ।।
-पतंग

951- सादा उज्जर येखर रंग। रहै शांत, नइ जानय उतलंग।।
सिधवा जइसे दिखथे हाल। बहुते कपटी चतुरा चाल।।
-कोकड़ा

952- रहिथे येहा ताते तात। राँधय येहा जेवन घात।।
हवा देख ये बड़ थर्राय। पानी पीके झट मर जाय।।
-आगी

953- एक पेड़ मा गजब डँगाल। मन मा आथे एक सवाल।।
भारी कटही फर ला जान। भरे रथे फर मा गुन खान।।
-कटहर

954- नान्हें नोनी नटखट जान। येखर हावय छोट मकान।।
देंह केंवची कोंवर घात। पटर-पटर ये करथे बात।।
-जीभ

955- एक पेड़ हे हाथी पाँव। बारी-बखरी येखर ठाँव।।
पाना जइसे हाथी कान। लकड़ी नो हे, ले पहिचान।।
-केरा पेड़

956- एक जिनिस ये कइसे होय। बीच सभा मा बइठे रोय।।
थूँक-थूँक के जम्मों जाय। परे डरे ये कहाँ कहाय।।
-थूँकदानी

957- दाँत बिना ये लेवय काट। बिना पाँव के रेंगय बाट।।
चर्र-चर्र के बोलय बोल। सबो बिसावैं देके मोल।।
-पनही

958- दूध दही के सकला होय। लान मथानी गजब बिलोय।।
सादा उज्जर ये उफलाय। कड़क चुरो के घीव बनाय।।
-लेवना

959- देंह एक हे सुग्घर सार। जेखर ऊपर सात दुवार।।
पंछी येखर भीतर होय। आवाजाही दिखे न कोय।।
-प्राण

960- तन हा हावै येखर एक। दिखै नहीं पर होथे नेक।।
राहय येखर हाथ न पाँव। दँउड़े जाथे दुनिया ठाँव।।
-मन

961- इक नोनी के अलकर नाँव। दू तरपौंरी, छैठन पाँव।।
ओखर मुँड़ मा मेछा यार। जाथे उघरा हाट बजार।।
-तराजू

962- दरजा उँचहा खाल्हे काम। रोज बिहनिया जेखर नाम।।
जौन जघा मा ये नइ जाय। कोनो ला बइठन नइ भाय।।
-बाहरी

963- दू कौड़ी हे करिया जान। येखर आगू दुनिया मान।।
एक कटोरी पानी ताय। बीच-बीच मा टपके जाय।।
-आँखी

964- रिंगी-चिंगी चमकै काँच। लागय सुग्घर सबले साँच।।
नारीमन के मन ला भाय। गोल-गोल ये बाँह म छाय।।
-चूरी

965- मुँड़ खुसरे हे भीतर पार। चोट-बड़े चक्का हे सार।।
निकले पसली बाहिर देख। सूँत बरावय चिटिक सरेख।।
-चरखा

966- जीभ फटे अउ मुँड़ी कटाय। अपने मन के बात बताय।।
आखर करिया उगले जाय। खीसा भीतर ठौर बनाय।।
-कलम

967- पेट बड़े अउ मुँहुँ हे जान। पेंदी चाकर, काँच समान।।
पढ़े-लिखे मा आथे काम। संग कलम के जुड़थे नाम।।
-दवात

968- घेरावाला लँहगा डार। एक पाँव मा फिरै अपार।।
हाथ आठ देवय फैलाय। जाड़ पड़े मा ये सकलाय।।
-छतरी

969- कटै आखिरी पाँव कहाय। शुरू कटै संगी बन जाय।।
तीन वर्ण के हावय नाम। आथे मुँड़ मा पहिरे काम।।
-पगड़ी

970- कटै आखिरी सीता जान। शुरू कटै संगी तैं मान।।
जंगल मा ये रहिथे यार। तीन वर्ण के लिखना सार।।
-सियार

971- चाम, माँस येमा नइ होय। हाड़ा चारों कोती सोय।।
तभो हवै ये बहुते खास। जेखर भीतर जीव निवास।।
-पिंजरा

972- मुँड़ मा चुन्दी जटा समान। सादा उज्जर रंगत जान।।
हाथे पोथी धारे जाय। जोगी, ज्ञानी कहाँ कहाय।।
-लहसुन

973- एक सींग अउ चारे कान। एक पाँव हे येखर मान।।
तामस गुण अउ करिया रंग। रँधनी खोली राहय संग।।
-हींग

974- चोला उज्जर, सादा सोय। जटा मुँड़ी मा येखर होय।।
एक गोड़ मा धरथे ध्यान। भारी कपटी येला जान।।
-कोकड़ा

975- सरी जगत ला देखत जाय। कभू अपन नइ गाँव ल पाय।।
हाँसय-रोवय अपने आप। नँदिया भीतर रहिथे खाप।।
-आँखी के पुतरी

976- कारी गोरी दूझन नार। नाँव एक हे इँखरो यार।।
छोट-बड़े होथें इन खास। एक करू अउ एक मिठास।।
-लायची

977- हरियर लुगरा पहिरे नार। जन-जन के करथे सत्कार।।
जेवन पाछू आगू आय। सबके मुँहुँ ला लाल रचाय।।
-पान

978- एक चिरैया घुमते जाय। भर-भर पानी तँउरे भाय।।
भरे कुआँ मा ये सुरताय। रहि-रहि पानी फेर मँगाय।।
-मथानी

979- एती ओती मैं हा जाँव। सबला ओखर घर पहुँचाँव।।
फेर अपन मैं जघा न पाँव। एक जघा मा बइठ पहाँव।।
-रद्दा

980- करिया हे कौआँ झन मान। खम्भा हे हौआ झन जान।।
लाम नाक ले करथे काम। धम्मक रेंगय, बोलव नाम।।
-हाथी

981- एक अचंभा देखे जाय। मुरदा होके रोटी खाय।।
कोनो कोन्हा रहै लुकाय। मार परै ता चिहुर मचाय।।
-माँदर

982- जइसे नँदिया पूरा पाट। चंदन, चोवा बगरे घाट।।
एक हाथ खूँटा गड़ियाय। चारों मूँड़ा घूमत जाय।।
-जाँता

983- हरियर लुगरा ओढ़े आय। लाखों मोती धरे सुहाय।।
पहुँचै राजा के दरबार। लेंवँय लत्ता तुरत उतार।।
-भुट्टा

984- एती-वोती ले ये आय। चिटिक जघा मा बइठ समाय।।
हाथ धरे ये आये जाय। नाँव काय हे कोन बताय।।
-लाठी

985- कुबरी तन हे, मया जताय। आँखी आगू बइठे जाय।।
पाँव अपन ये नाक मढ़ाय। कान हाथ ले अँइठे पाय।।
-चश्मा

986- शुरू कटै ता 'गरा' कहाय। कटै आखिरी 'आग' लगाय।।
बीच कटै 'आरा' बन जाय। तीन वर्ण के शहर बताय।।
-आगरा

987- बीच कटै ता 'बरी' कहाय। मुँड़ी कटै ता 'करी' बनाय।।
कटै आखिरी 'बक' बन जाय। तीन वर्ण के जीव सुहाय।।
-बकरी

988- शुरू कटै ता 'नर' कहलाय। कटै आखिरी धनुष चढ़ाय।।
बीच कटै ता दिन बन जाय। जीव बहुत ये उधम मचाय।।
-वानर

989- बीच कटै चंचल भटकाय। शुरू कटै सब बात सुनाय।।
कटै आखिरी 'मका' कहाय। तीन वर्ण हे सब ला भाय।।
-मकान

990- चार वर्ण के येखर नाम। विष्णु, कृष्ण के करथे काम।।
शुरू कटै ता दर्शन होय। भगवन अँगरी येहा सोय।।
-सुदर्शन चक्र

991- कटै शुरु ता कम पर जाय। बीच कटै दर्जन कहलाय।।
कटै आखिरी चिरई होय। तीन वर्ण हे, जानव कोय।।
-बाजरा

992- पाँख हवै पर कहाँ उड़ाय। पाँव हवै पर रेंग न पाय।।
हाथ धरे चक्का ल चलाय। लामी लामा सूँत लमाय।।
-चरखा

993- शुरू कटै तरिया बन जाय। बीच कटै ता 'केर' कहाय।।
कटै आखिरी मुँड़ी सजाय। तीन वर्ण हे, कोन बताय।।
-केसर

994- रतिहाकुन ऊपर ले आय। डारा पाना मा इँतराय।।
मोती जइसे येखर रूप। एकोकन सहि सकै न धूप।।
ओस

995- हाथ बोलथे सुनथे हाथ। बोल न होवय येखर साथ।।
छुअत बतावै जम्मों हाल। हे जनऊला बड़े कमाल।।
-नाड़ी

996- पानी थोरिक रहै भराय। ऊपर मुँहड़ा आग धराय।।
गुड़गुड़ बोली गजब सुनाय। बीच-बीच मा धुआँ उड़ाय।।
-हुक्का

997- पाँव तीन हे, चलै न एक। एक जघा राहय ये टेक।।
जो जन येखर तीरे जाय। येखर ऊपर बइठे पाय।।
-तिपाया

998- घटै बढ़ै चंदा झन जान। करिया हे कोयल झन मान।।
आगू-पाछू फिरना काम। बोलव संगी का हे नाम।।
-छँइहाँ

999- घोड़ा माटी के तैं जान। ऊपर लोहा गोल मकान।।
बइठै येमा गिल्ला राम। निकलै हो के सुख्खा श्याम।।
-तावा

1000- आवय तब ये करै अचेत। बइठै मा अँधरा कर देत।।
उठै तभो पीरा दे जाय। जावत खानी खूब सताय।।
-आँखी रोग

1001- लाली डब्बा हावै साँच। भीतर बहुते पींयर खाँच।।
खाँचा मा बड़ मोती दाँत। खावँय दुनिया मजा उड़ाँत।।
-अनार

1002- आजे भर उपयोगी जान। काली बर ये रद्दी मान।।
घर बइठे सब जानँय हाल। कागज कुटका करै कमाल।।
-अखबार

1003- करिया घोड़ा बइठे ताय। बइठे-बइठे ये ललियाय।।
खूब सवारी सादा आय। उतरै एक दुसर चढ़ जाय।।
-तावा अउ रोटी

1004- गोल हवै पर नो हे गेंद। कहाँ माढ़थे, नइ हे पेंद।।
पुछी हवय पर नो हे गाय। लइकामन हा बहुते भाय।।
-फुग्गा

1005- शुरू कटै ता 'दर' बन जाय। कटै आखिरी 'बंद' कहाय।।
तीन वर्ण के हावय नाँव। जंगल झाड़ी जेखर ठाँव।
-बंदर

1006- कटै शुरू ता 'गर' बन जाय। बीच कटै ता मनुज कहाय।।
कटै आखिरी 'नग' पढ़ पाय। तीन वर्ण हे, बोलव काय।।
-नगर

1007- आँखी ऊपर रहिथे तान। पातर करिया परे निसान।
कुकुर बोल येखर हे नाँव। सोंचव संगी एको घाँव।।
-भौं

1008- एक मुँड़ी अउ तीनों हाथ। रहिथन जम्मो एक्के साथ।।
गोल-गोल बड़ घूमँन रोज। गरमी मा सब करथें खोज।।
-पंखा

1009- एक पाँव अउ धोती आठ। आनी-बानी जेखर ठाठ।।
सावन-भादो बहुते ताय। बाँकी बेरा खुँटी थिराय।।
-छाता

1010- जाथे मनखे हाट बजार। लाथें मोला पइसा डार।।
खाये खातिर मोल बिसाँय। पर मोला कोनो नइ खाँय।।
प्लेट, चम्मस

1011- रतिहाकुन इन रोजे आँय। नइ तो काँही कुछु चोराँय।।
दिनभर येमन अमित लुकाँय। अँधियारी मा मुँहुँ देखाँय।।
-चंदैनी

1012- दू आखर के सुग्घर नाम। आथे येहा सबके काम।।
उल्टा लिख दे होय जवान। बिन येखर तो हाय परान।।
-वायु

1013- पानी बिन ये भवन बनाय। देवय सबके संग मिलाय।।
बइठे-बइठे जोहत जाय। फाँस-फाँस के भोजन पाय।।
-मेकरा के जाला

1014- हावय येखर बहुते दाँत। बिन मुँहुँ के ये करथे बात।।
गुरतुर-गुरतुर बोलय बोल। सुन-सुन जाथे मन हा डोल।।
-हारमोनियम

1015- हवै सींग, छेरी झन जान। काठी हे, घोड़ा झन मान।।
ब्रेक हवै पर नो हे कार। घंटी हे पर नो हे द्वार।।
-साइकिल

1016- तीन वर्ण के हावय नाम। आवय ये खाये के काम।।
बीच कटे ता 'हवा' कहाय। कटै अंत 'नाँगर' बन जाय।।
-हलवा

1017- दिनभर बेरा देख बिताय। सूरुज कोती मुँहें लमाय।।
काय बात मा जाय रिसाय। रतिहाकुन ये मुँड़ी नवाय।।
-सुरजमुखी

1018- फूल एकठन अइसन जान। अजब कहानी जेखर मान।।
पाना ऊपर पाना छाय। दुनिया भर मा बहुते भाय।।
-पत्ता गोभी

1019- दू आँगुर के सड़क कहाय। आदत अपने कड़क बताय।।
सबके घर मा आवय काम। आग लगइया येखर नाम।।
-माचिस

1020- रुखराई मा रात बिताय। चींव-चींव कहि गीत सुनाय।।
संझा, बिहना उड़ते जाय। रिंगी चिंगी पाँख रचाय।।
-चिरई

1021- अचरिज करथे येउउखर खेल। जलथे बिन बाती बिन तेल।।
पाँव बिना ये रेंगत जाय। अँधियारी ला मार भगाय।।
सूरुज

1022- कटै शुरू ता नून कहाय। बीच कटै ता बोल सुनाय।।
कटै आखरी कनवा जान। तीन वर्ण हे झट पहिचान।।
-कानून

1023- शुरू कटै ता ये बंदूक। कटै आखिरी आगी लूक।।
बीच कटै ता देखव शान। तीन वर्ण के मोला जान।।
-आँगन

1024- ना तो येहा आगी आय। ना तो ये कोनो ल जलाय।।
परथे येला तभो बुझाय। संगी देवव तुरत बताय।।
-प्यास

1025- एक फसल हे बिन बोंवाय। खातू माटी नइ तो पाय।।
हब-हब येहा बाढ़े जाय। काटे बर बनिहार लगाय।।
-चुन्दी

1026- तीन पाँव, रेंगे नइ पाँव। एक ठौर मा बइठ पहाँव।।
भाग सकँव ना मैं हा यार। बाँध रखय मोला संसार।।
-घड़ी

1027- मोर एक ना हाथे पाँव। तभो पहुँच जावँव हर ठाँव।।
बिन मुँहुँ के मैं बात बताँव। झोला बइठे आवँव जाँव।।
-चिट्ठी

1028- नाँव सुनत मा सब थर्राय। पर के इच्छा नाँव धराय।।
करँय तियारी सब संसार। पायेबर
येखर ले पार।।
-परीक्षा

1029- आगी हा नइ सके जलाय। पानी हा नइ सके भिगाय।।
संगे आवय संगे जाय।। चतुरा संगी नाँव बताय।।
-अपन छँइहा

1030- फूल नहीं पर ये ममहाय। जरथे पर इरखा न कहाय।।
पूजा घर मा येखर ठाँव। सोंच बताऔ का हे नाँव।।
-अगरबत्ती

1031- एती ओती गजब घुमाय। नींद परे मा ही ये आय।।
आँख मूँद के देखन भाय। छूये मा ये नइ छूवाय।।
-सपना

1032- ना ये एक्को तनखा पाय। कहाँ कभू ये जेवन खाय।।
घर के बाहिर लटक बिताय। डँट के पहरा घलो निभाय।।
-ताला

1033- मिलथे जेला मन खिल जाय। जादा होगे ता रोवाय।।
लगन मेहनत जौन कमाय। ओखर तीरे बहुते आय।।
-खुशी

1034- डबिया हावय अइसन एक। बिन ढ़कना तारा हे नेक।।
पेंदी कोन्हा नइ तो जान। भीतर सोना चाँदी मान।।
-अण्डा

1035- अंत कटै मनखे बन जाय। कटै बीच ता जम कहलाय।।
शुरू कटै ता नरम पढ़ाय। तीन वर्ण हे, कौन बताय।
-जनम

1036- बिन आगी के खीर बनाय। नुनछुर-गुरतुर स्वाद जनाय।।
चिटिक चाँटबे खूब मिठाय। जादा खाबे जीभ कटाय।।
-खाये के चूना

1037- रोवत ला येहा हँसवाय। आनी-बानी नाच दिखाय।।
नाचा गम्मत मा ये छाय। सर्कस भीतर देखे जाय।।
-जोक्कड़

1038- लगै प्यास ता पीते जाव। भूख लगै ता खाते खाव।।
लगै जाड़ ता इही जलाव। काय हरै झट नाँव बताव।।
-नरियर

1039- एक चीज अचरिज हे मान। पानी ले बनथे ये जान।।
सूरुज नइ तो सकै सुखाय। तन मा उपजै, कौन बताय।।
-पछीना

1040- सुतत साठ ये हा सुत जाय। उठत बेर ये झट उठ आय।।
येहा बहुते हरू जनाय। आँखी के परदा कहलाय।।
-आँखी के पलक

1041- धरती ले ये उपजे आय। बादर कोती मुँड़ी उठाय।।
हालै-डोलै, रेंग न पाय।। अपन पाँव ले जेवन खाय।।
-रुखराई

1042- चार कुआँ बिन पानी जान। चोर अठारा घूमँय मान।।
चोर बीच मा रानी एक। पुलिस कुआँ मा डारय फेंक।।
कैरमबोर्ड

1043- मुकुट मुँड़ी मा खापे लाल। घेंच ओरमे झोला झाल।।
पाँखी डेना शोभा आय। चिरई होके नइ उड़ियाय।।
-कुकरा

1044- राजमहल हरियर हे एक। हावय भिथिया पींयर नेक।।
भीतर बइठे करिया चोर। राजमहल ला दय बिल्होर।।
-अरंमपपई

1045- चक्का दूठन येखर सार। महिमा हावय अपरंपार।।
बइठ सीट अउ पैडिल मार। चढ़व फिरौ सुग्घर संसार।।
-साइकिल

1046- घर अँगना मा आवय मोर। चींव-चींव के करके शोर।।
दाना पानी खाय उड़ाय। बड़े बिहनिया गीत सुनाय।।
- गौरइया चिरई

1047- कँसे डोकरी कनिहा एक। बुता करय ये रोजे नेक।।
घर अँगना सुग्घर चमकाय। बुता निपटगे सुते पहाय।।
-बहरी

1048- हाथ लगै ता चलते जाय। जौन पाय सब काट मढ़ाय।।
थक जावय ता ये सुरताय।। पखरा चाटै जोश बढ़ाय।।
-चाकू

1049- रोज बिहनिया हाथे आय।। गजब चाबथें फेर न खाय।।
करै सफाई जिभिया दाँत। फेंकय करके सब दूँ फाँत।।
-दतुवन

1050- तीन वर्ण हँव मोला जान। उल्टा सीधा एक समान।।
शुरू कटै ता 'टक' बन जाँव। कटै आखिरी 'कट' कहलाँव।।
-कटक

1051- नोनी-बाबू खेलँय जान। खंभा दू गाड़ै मैदान।।
आठ खिलाड़ी टीम बनाय। भागय तेला छू दँउड़ाय।।
-खो-खो

1052- भुँइया मा ये खेले जाय। दाँव सुघर दू दल देखाय।।
सात खिलाड़ी एक्के पार। जौन छुवावै ओखर हार।।
-कबड्डी

1053- फुदुक-फुदुक ये खेले जाय। उँखरू बइठे पाँव चलाय।।
नोनीमन ला बहुते भाय। चिटिक जघा मा काम चलाय।।
-फुगड़ी

1054- दू दल येमा खेलँय जान। भर-भर साँसा गावँय गान।।
गावत खानी साँसा टूट। होवय बाहिर, जावय छूट।।
-खुड़वा

1055- गेंद न बल्ला येमा जान। बस चाही खुल्ला मैदान।।
लकड़ी नान्हें छोल बनाय। डंड़ा मारत, दाम पदाय।।
-गिल्ली डंडा

1056- एक पाँव मा उछले जाय। डब्बा-डब्बा डाँड़ खिंचाय।।
खपरा, पखरा कुटका लान। मुक्का-बोली खेलँय जान।।
-बिल्लस

1057- डब्बा बनथें येमा चार। खपरा कुटका खेले सार।।
पाँच गड़ी मिल खेलँय खेल। हार जीत के सुग्घर मेल।।
-फल्ली

1058- लकड़ी छोले गोल बनाय। खाल्हे कोती खिला धराय।।
फरिया बर नेती बनवाँय। फेंक पटक के खूब चलाँय।
-भौंरा

1059- होथे चीनी या ते काँच। खेलँय लइका गड्डा खाँच।।
गिनथें सब दस बीस पचास। जेखर जल्दी सौ, वो पास।।
-बाँटी

1060- लइका बइठैं गोल बनाय। दाम पदे वो बाहिर जाय।।
पटका धरके रहे लुकाय। कखरो पाछू जाय मढ़ाय।।
-फोदा

1061- डारा पाना जम्मों लाल। कोंवर भाजी करय कमाल।।
कमी लहू के पूरा होय। विटामीन 'सी' बहुते सोय।।
-लाल भाजी

1062- चिक्कन-चिक्कन रहिथे पान। येमा गुण के भरे खदान।।
राँधव भाजी आलू डार। खावव सुग्घर दार बघार।।
-पालक भाजी

1063- चउमासा मा उपजै झार। पान केंवची येखर सार।।
बिन पइसा के येला पाव। बड़ गुणकारी, खच्चित खाव।।
-चरौंटा भाजी

1064- बहुते मँहगी होथे जान। उँचहा भाजी उँचहा शान।।
होय पेड़ के पाना फूल। फागुन मा ये आथे झूल।।
-बोहार भाजी

1065- रहिथे पानी जिहाँ भराय। उँहचे छछले बहुते जाय।।
पाना डारा आवय काम। गजब मिठाथे, जानँव नाम।।
-करमत्ता भाजी

1066- अमसुरहा अम्मट भरमार। कोंवर पाना फर हे सार।।
भरे आयरन बड़ गुणकार। फर के चटनी, सुकसा सार।।
-अमारी भाजी

1067- कटही पाना हे पहिचान। हावय येमा गुण के खान।।
जाड़ा मा ये बहुते आय। गुणकारी हे, दुनिया खाय।।
-कुसुम भाजी

1068- नइ तो कोनो हा उपजाय। नँदिया तीर मा बहुते छाय।।
पेट रोग जब बहुत सताय। खच्चित ये भाजी ला खाय।।
-गुमी भाजी

1069- चउमासा अउ जाड़े आय। कोंवर पाना साग बनाय।।
गिल्ला जुड़हा जघा सहोय। दुनिया स्वादे येखर खोय।।
- तिनपनिया भाजी

1070- नान्हें झाड़ी येला जान। खाथे कोंवर डारा पान।।
बनय मसलहा, अम्मट डार। दार अमारी राँध सँघार।।
-चेंच भाजी

1071- भुँइया भीतर कांद कहाय। ऊपर पाना बाँस सुहाय।।
चाय, साग मा डारे जाय। चुरपुर पर गुणकारी आय।।
-आदा

1072- ऊपर पाना झाफर होय। भुँइया भीतर काँदा सोय।।
दिखथे पींयर लकड़ी गाँठ। भुरका करथें, पिसथें टाँठ।।
-हरदी

1073- गंजी मा पानी डबकाय। शक्कर, आदा, दूध मिलाय।।
डारँय करिया भुरका पान। फूँक-फूँक के पियै जहान।।
चाय

1074- घर अँगना मा चौंरा पाय। नान्हें बिरवा बढ़ते जाय।।
फूल मंजरी पान सहाय। गजब गुणी ये पौध कहाय।।
-तुलसी

1075- बारी बखरी उपजे जाय। पाना पिस के चटनी खाय।।
महर-महर बड़ ये ममहाय। येहा मुँहुँ के बास भगाय।।
-पदीना

1076- कथा महाभारत के गाय। धरे तमूरा मंचे जाय।।
कौरव-पांडव बात बताय। लोकरंग मा रहे रँगाय।
-पंडवानी

1077- जैतखाम ला माथ नवाय। गुरु घासी के कथा सुनाय।।
नाचँय, माँदर, झाँझ बजात। सत के सुग्घर बात बतात।।
-पंथी

1078- चइत कुँवारे मा नवरात। देवी सेवा गीत सुनात।।
माँदर, ढ़ोलक, झाँझ बजाय। दाई महिमा गाय सुनाय।।
-जस गीत

1079- करम करे के देवय सीख। करौ मेहनत, झन लव भीख।।
इही भाव ले खुशी मनाँय। गोल घेर सब नाचैं गाँय।।
-करमा

1080-  लोक गीत के रानी आय। मया पिरित के गोठ सुनाय।।
काम बुता के संगे संग। नाच-गान ये जिनगी रंग।।
-ददरिया

1081- अपन जँहुरिया मिल सकलाय। माटी मिट्ठू बीच बिठाय।।
सज-धज सुग्घर गोल बनाय। पिट-पिट ताली गीत सुनाय।।
-सुवा गीत

1082- देवारी के दिन जब आय। राउत भाई सब सकलाय।।
सजे-धजे बड़ खुशी मनाय। दोहा लउठी धरे सुनाय।।
-राउत नाचा

1083- चउमासा मा गजबे गाँय। दू भाई के कथा सुनाँय।।
नस-नस मा ये जोश जगाय। लोककथा ये सब ला भाय।।
-आल्हा

1084- गौरा-गौरी मुरत बनाय। बर बिहाव के नेंग मढ़ाय।।
फूल कुचरना पहिली आय। सुग्घर उत्सव, गीत सुनाय।।
-गौरा गीत

1085- चुलमाटी, मड़वा जब छाय। देवतला अउ तेल चघाय।।
नेंग भड़ौनी भाँवर होय। बेर बिदाई, जम्मों रोय।।
-बिहाव गीत

1086- जनम धरे घर लइका आय। माई-पिल्ला खुशी मनाय।।
मिलके गावँय मंगल गान। राम, कृष्ण के जनम समान।।
-सोहर गीत

1087- सावन के अंजोरी आय। भरे गहूँ टुकनी तब बोंवाय।।
नोनीमन हा सेवा गाँय। देवी गंगा गीत सुनाँय।।
-भोजली गीत

1088- राजा घर ला छोड़े जाय। कइसे वो योगी बन आय।।
सुख दुख पीरा मरम बताय। इही बात सब गीत सुनाय।।
-भरथरी गीत

1089- गोदरिया धर तमुरा आय। घर-घर जय गंगान सुनाय।।
दान दक्षिणा तुरते पाय। गौंटनीन जय कहते जाय।।
-बसदेवा गीत

1090- नाच-गान येखर पहिचान। हँसी ठिठोली बहुते जान।।
परी संग जोक्कड़ हा आय। जिनगी खातिर सीख सिखाय।।
-नाचा

1091- तीन गोड़ के तितली ताय। बुड़के रोजे तेल नहाय।।
चटनी संगे बड़ इँतराय। लइका छउआ नँगते भाय।।
-समोसा

1092- शुरू कटै ता मन कहलाँव। कटै आखिरी 'नम' हो जाँव।।
बीच कटै ता कुछु नइ पाँव। ईश प्रार्थना, माथ नवाँव।।
-नमन

1093- कटै शुरू ता 'रस' हो जाय। कटै आखिरी 'सार, कहाय।।
बीच कटै ता 'सास' पढ़ाय। सादा रंगे चिरई आय।।
-सारस

1094- बीच कटै ता 'चाल' बताय। कटै आखिरी 'चाव' कहाय।।
तीन वर्ण के हावय नाम। आथे ये खाये के काम।।
-चावल

1095- शुरू कटै ता 'बड़ी' कहाय। कटै आखिरी 'ईश' बलाय।।
हरै मिठाई के ये नाम। आये ये खाये के काम।।
-रबड़ी

1096- बीच कटै ता 'खरा' जनाय। कटै आखिरी चिट्ठी ताय।।
तीन वर्ण के नाँव सरेख। सावचेत राहँय सब देख।।
-खतरा

1097- तीन वर्ण हे येला जान। उल्टा-सीधा एक समान।।
शुरू कटै ता नाक कहाय। कटै आखिरी कान सुनाय।।
-कनक

1098- शुरू कटै ता कान कहाय। बीच कटै ता दूध पियाय।।
जम्मों चाहँय करन अराम। तीन वर्ण हे, का हे नाम।
-थकान

1099- कटै आखिरी 'नक' बन जाय। बीच कटै नाली हो जाय।।
कटै शुरू ता फूल खिलाय। तीन वर्ण हे, अमित बताय।।
-नकली

1100- उल्टा सीधा एक समान। तीन वर्ण हे येला जान।
शुरू कटै ता लाज कहाय। बीच कटै ता सजा सुनाय।।
-जलज

1101- शुरू कटै ता 'गर' बन जाय। बीच कटै ता 'नर' कहलाय।।
कटै आखिरी 'नग' गिनवाय। तीन वर्ण हे, कोन बताय।।
-नगर
---------------------------------
- मोर बिना ना होवय काम। दू आखर के हावय नाम।।
अपन जघा ले चल नइ पाँव। आथे-जाथे तभो कहाँव।।
-नल

- शुरू कटै ता देंह समान। कटै बीच ता जंगल जान।।
येखर रक्षा पहिली काम। तीन वर्ण हे, जानव नाम।।
-वतन

- तीन वर्ण हे लव पहिचान। सोन चिरैया देश महान।।
बीच कटै ता भात कहाय। कटै आखिरी वजन जनाय।।
-भारत

नदियाँ जम्मों इहाँ समाय। तभो कभू नइ पूरा आय।।
पानी येखर बहुते खार। नाव बतावव, सोच विचार।।
-सागर

महतारी के दाई जान। का कहिथे येला पहिचान।
नाती-पंथी लय पोटार। अंतस राखय मया अपार।।
-नानी

हमर ममा के येहा बाप। महतारी मा येखर छाप।।
बात सियानी, कथा सुनाय। बोलव संगी, कोन कहाय।।
-नाना

येखर अलगे होथे शान। ससुरारे मा बहुते मान।।
नेंग-जोख मा येला देख। गजब दुलरवा, नाव सरेख।।
-भाँटो

सबो नता के येहा सार। जात-पात ला अमित बिसार।।
सुख-दुख मा देवय संग। लागय जइसे एके अंग।।
-संगी
~~~~~~~~~~~~~~~~~~~~~~
सृजन- कन्हैया साहू 'अमित'
शिक्षक- भाटापारा छत्तीसगढ़
गोठबात- 9200252055

स्वरचित सामग्री... सर्वाधिकार सुरक्षित