ईश प्रार्थना~जयकारी छंद
हे प्रभु दे अइसन वरदान।
सबझन पावँय अक्षर ज्ञान।।
हाथजोड़ हम करन प्रणाम।
आवँन सदा दुसर के काम।।
सुमता गंगा हमन नहान।
मनखे-मनखे एक समान।।
छुआछूत के भागय रोग।
अंतस जागय सबबर सोग।।
बोली बोलन गुरतुर नीक।
काम करन झन कोनो खीक।।
~~~~~~~~~~~~~~~~~~~~~~~
कन्हैया साहू 'अमित'~भाटापारा छत्तीसगढ़
जानव जनउला
1~
कारी गाय कलिन्दर खाय।
दुहते रहव दुहाते जाय।।
जुच्छा एखर तीर म आँय।
टीप-टीप भरके घर जाँय।।
2~
करिया घोड़ा भागे जाय।
पाछू घोड़ा लाल कुदाय।।
ऊँच अगासे बहुते भाय।।
बोलव संगी एहर काय।
3~
परे मार ता रोवय तान।
धर देबे ता बंद जबान।।
रँधनी खोली म करय राज।
नाँव बतावव झटपट आज।।
4~
पाँच परेवा पाँचों संग।
महल भीतरी एक्के रंग।।
एक जगा जम्मों सकलाय।
नइ कोनो पहिचाने पाय।।
5~
बगर-बगर के भँइस चराय।
बाँधे पँडरू बड़ मोटाय।।
छानी परवा चढ़ते जाय।
कोंवर-कोंवर गजब सुहाय।।
कन्हैया साहू 'अमित'~भाटापारा छत्तीसगढ़
-------------------------------------------------------
1-कुआँ, 2-आगी के लपटा, 3-बरतन, 4-पान सुपारी, 5-मखना,
फुरफुंदी
लइकामन ला भाथे फुरफुंदी।
सादा लाली छिटही बुंदी।।
पकड़े बर लइका ललचाथे।
आगू-पाछू उरभट जाथे ।।
फूल-फूल मा झूमे रहिथें।
कान-कान मा का इन कहिथें।।
थीर-थार नइ थोकुन बइठे।
अपने-अपन अकतहा अँइठे।।
फरफर-फरफर फुर्र उड़ाये।
चिटिक देंह बड़ जीव लड़ाये।।
~~~~~~~~~~~~~~~~~~~~~~~
कन्हैया साहू 'अमित'~भाटापारा-9200252055
मड़ई
गाँव-गाँव मा होथे मड़ई।
महिमा आगर, बहुते बड़ई।।
देव साँहड़ा के हे मातर।
सब सकलाथें भाँठा चातर।।
खेती के जब बुता थिराथे।
मातर मड़ई तभे जगाथे।।
ठौर-ठौर मा सजथे मेला।
मनखे के तब रेलम-पेला।।
नाचा गम्मत बड़ रौताही।
खई खजाना हाहीमाही।।
रौताही=मड़ई
~~~~~~~~~~~~~~~~~~~~~~~
कन्हैया साहू 'अमित'~भाटापारा - 9200252055
बादर
गड़गड़-गड़गड़ करथे बादर।
धीर कहाँ तब धरथे बादर।।
करिया करिया ओन्हा ओढ़े।
झम-झम बिजली बरथे बादर।।
सरसर-सरसर पवन संग मा।
झरझर-झरझर झरथे बादर।।
गरमी ले हलकान परानी।
सबके दुख ला हरथे बादर।।
रुक्खा-झुक्खा चारों कोती।
सब ला हरियर करथे बादर।।
~~~~~~~~~~~~~~~~~~~~~~~
कन्हैया साहू 'अमित'~ भाटापारा -9200252055
