बाल गीत
पटपट पटपट पिटिर पिटिर,
सिटसिट सिटसिट सिटिर सिटिर।
उमड़ै घुमड़ै बादर करिया,
बरसै बरखा भाँठा, परिया।
लइका भागँय गदबिद-बदबिद,
बूँद गिरै जब रदरिद-रदरिद।
कीच कीच बड़ किचिर-किचिर,
पटपट पटपट पिटिर पिटिर।
टपटप चूहय छानी-परवा,
नवा जवानी नदियाँ-नरवा।
चींव चाँव चट चिरई चुरगुन,
रतिहा झींगुर रुनझुन रुनझुन।
लुहुर-लुहुर अउ लिबिर-लिबिर,
पटपट पटपट पिटिर पिटिर।
हवा गरेरा सरसर-सरसर।
पान पतोरा फरफर-फरफर।
बिजली चमकै झमझम-झमझम,
बादर बाजय दमदम-दमदम।
झरय झड़ी झक झिमिर झिमिर,
पटपट पटपट पिटिर पिटिर।
सृजन- कन्हैया साहू 'अमित'©®
शिक्षक- भाटापारा छत्तीसगढ़
गोठबात - 9200252055
कोई टिप्पणी नहीं:
एक टिप्पणी भेजें